দুদিনীয়া ভ্ৰমণসূচীৰে উপস্থিত হোৱা প্ৰধানমন্ত্ৰী নৰেন্দ্ৰ মোদীক শনিবাৰে কুৱেইটত উষ্ম আদৰণি জনোৱা হয় । দেশখনত উপস্থিত হোৱাৰ লগে লগে তেওঁ প্ৰথমে ১০১ বছৰীয়া প্ৰাক্তন আমোলা মংগল ছেইন হাণ্ডাক লগ পোৱাৰ প্ৰতিশ্ৰুতি পূৰণ কৰে । আৰবী ভাষাত ৰামায়ণ আৰু মহাভাৰত প্রকাশ কৰা আব্দুল্লাতিফ আলনেছিফ আৰু আৰবী ভাষালৈ অনুবাদ কৰা আব্দুল্লা বাৰেনকো সাক্ষাৎ কৰে তেওঁ ।
আৰবী অনুবাদক লৈ সুখ প্ৰকাশ-
আব্দুল্লাতিফ আলনেছিফ আৰু আব্দুল্লা বেৰেনৰ সৈতে হোৱা বৈঠকত প্ৰধানমন্ত্ৰী মোদীয়ে কয় যে ৰামায়ণ আৰু মহাভাৰতৰ আৰবী সংস্কৰণ দেখি তেওঁ আনন্দিত হৈছে । অটোগ্ৰাফ দি তেওঁ এই কামক প্ৰশংসনীয় বুলি অভিহিত কৰে । প্ৰধানমন্ত্ৰীয়ে কয় যে তেওঁলোকৰ এই পদক্ষেপে বিশ্বজুৰি ভাৰতীয় সংস্কৃতিৰ জনপ্ৰিয়তাক উজ্জ্বল কৰি তুলিছে ।
উল্লেখ্য যে, প্ৰধানমন্ত্ৰী মোদী হোটেলত উপস্থিত হোৱাৰ লগে লগে তাত সমবেত ভাৰতীয় সম্প্ৰদায়ৰ লোকে তেওঁক কথকলী নৃত্যৰে আদৰণি জডনাই । ইয়াত প্ৰধানমন্ত্ৰীয়ে প্ৰাক্তন আই এফ এছ বিষয়া মংগল ছেইন হাণ্ডাকে ধৰি ভাৰতীয় সম্প্ৰদায়ৰ সদস্যসকলক সাক্ষাৎ কৰে । মংগল ছেইনে বৈদেশিক সেৱাত কাৰ্যনিৰ্বাহ কৰি থকাৰ ইৰাক, কুৱেইট, চীন, আৰ্জেণ্টিনা, ব্ৰিটেইন, আৰু কম্বোডিয়াত নিযুক্তি লাভ কৰিছিল । হুইল চেয়াৰত আহি উপস্থিত হোৱা হাণ্ডাক প্ৰধানমন্ত্ৰীৰ সৈতে হাত মিলাই খুব সুখী যেন পৰিলক্ষিত হয় ।
প্ৰধানমন্ত্ৰীয়ে শনিবাৰে পুৱা ছ’চিয়েল মিডিয়াৰ এটা পোষ্টত লিখিছিল যে প্ৰবাসী সম্প্ৰদায়ৰ সৈতে হোৱা বৈঠকৰ সময়ত হাণ্ডাক লগ পাবলৈ তেওঁ আগ্ৰহী । ইয়াৰ পূৰ্বে শ্ৰেয়া জুনেজাই কৰা এটা পোষ্টত প্ৰধানমন্ত্ৰীক তেওঁৰ ককাদেউতাকক লগ কৰিবলৈ অনুৰোধ জনাইছিল । কুৱেইট চহৰৰ ফটো শ্বেয়াৰ কৰি প্ৰধানমন্ত্ৰীয়ে লিখে যে এই আদৰণিত তেওঁ আপ্লুত হৈ পৰিছে ।
