দুদিনীয়া কুৱেইট ভ্ৰমণৰ সামৰি দেওবাৰে নিশা দিল্লীৰ আই এফ এছ পালাম বিমানবন্দৰত উপস্থিত হয় প্ৰধানমন্ত্ৰী নৰেন্দ্ৰ মোদী । ৪৩ বছৰৰ পিছত ভাৰতৰ কোনো প্ৰধানমন্ত্ৰীৰ এয়া আছিল প্ৰথম কুৱেইট ভ্ৰমণ । কুৱেইটৰ আমিৰ শ্বেইখ মেছাল আল আহমদ আল জাবেৰ আল ছাবাহৰ আমন্ত্ৰণত উপস্থিত হৈছিল প্ৰধানমন্ত্ৰী মোদী । তেওঁ কুৱেইটত কেইবাটাও কাৰ্যসূচীত অংশগ্ৰহণ কৰি ভাৰত-কুৱেইটৰ সম্পৰ্ক আৰু অধিক গভীৰ কৰাৰ বাবে ৰাষ্ট্ৰপতিগৰাকীক সাক্ষাৎ কৰে ।

উপসাগৰীয় দেশখনত যোগৰ প্ৰচাৰ কৰা কুৱেইটৰ ছ’চিয়েল মিডিয়াৰ প্ৰভাৱশালী ব্যক্তিৰ সৈতেও প্ৰধানমন্ত্ৰীয়ে মত বিনিময় কৰে । তেওঁ কুৱেইটৰ আমিৰ মেছাল আল-আহমদ আল-জাবেৰ আল-ছাবাহৰ সৈতে ফাৰ্মাচিউটিকেল, আই টি, ফিনটেক আৰু নিৰাপত্তাৰ দৰে মূল খণ্ডত সহযোগিতাৰ বিষয়ে আলোচনা কৰে । দুয়োজন নেতাই দ্বিপাক্ষিক সম্পৰ্কক ‘কৌশলগত অংশীদাৰিত্ব’লৈ উন্নীত কৰিবলৈ সন্মত হয় । কুৱেইটৰ প্ৰধানমন্ত্ৰীয়ে প্ৰধানমন্ত্ৰী মোদী ভাৰতলৈ ওভতাৰ সময়ত বিমানবন্দৰত বিদায় দিবলৈয়ো উপস্থিত হয় ।

কুৱেইটৰ শীৰ্ষ নেতৃত্বৰ সৈতে হোৱা আলোচনাৰ পূৰ্বে প্ৰধানমন্ত্ৰী মোদীক বায়ান পেলেচত আনুষ্ঠানিকভাৱে আদৰণি জনোৱাৰ লগতে গাৰ্ড অৱ অনাৰ দিয়া হয় । প্ৰধানমন্ত্ৰী মোদীৰ কুৱেইট ভ্ৰমণৰ দ্বিতীয় দিনা তেওঁক উষ্ম আদৰণি জনায় কুৱেইটৰ প্ৰধানমন্ত্ৰী আহমেদ আল আব্দুল্লাহ আল আহমদ আল ছাবাহে । ভাৰত আৰু কুৱেইটৰ মাজত শক্তিশালী ঐতিহাসিক আৰু বন্ধুত্বপূৰ্ণ সম্পৰ্কক স্মৰণ কৰি দুয়োগৰাকী নেতাই দ্বিপাক্ষিক সহযোগিতাক আৰু অধিক উচ্চতালৈ লৈ যোৱাৰ প্ৰতিশ্ৰুতি প্ৰকাশ কৰে ।

প্ৰধানমন্ত্ৰী মোদীয়ে ইনষ্টাগ্ৰামৰ এটা পোষ্টত কয়, ‘কুৱেইটৰ আমিৰ শ্বেখ মেছাল আল আহমদ আল-জাবেৰ আল ছাবাহৰ সৈতে হোৱা বৈঠক অতি উত্তম আছিল । আমি ফাৰ্মাচিউটিকেলছ, আই টি, ফিনটেক, আন্তঃগাঁথনি আৰু নিৰাপত্তাৰ দৰে মূল ক্ষেত্ৰত সহযোগিতাৰ বিষয়ে আলোচনা কৰিলোঁ । আমাৰ দেশসমূহৰ মাজত থকা ঘনিষ্ঠ সম্পৰ্কৰ লগত খাপ খুৱাই আমি আমাৰ অংশীদাৰিত্বক কৌশলগত স্তৰলৈ উন্নীত কৰিছো আৰু মই আশা কৰিছো যে আগন্তুক সময়ত আমাৰ বন্ধুত্ব আৰু অধিক শক্তিশালী হৈ উঠিব আৰু কুৱেইটৰ অধ্যক্ষতাত ভাৰত আৰু উপসাগৰীয় সহযোগিতা পৰিষদৰ মাজৰ সম্পৰ্ক অধিক শক্তিশালী হ’ব ।‘

কুৱেইটৰ আমিৰ শ্বেখ মিছাল আল আহমদ আল-জাবেৰ আল-ছাবাহৰ আমন্ত্ৰণত অহা ২১ আৰু ২২ ডিচেম্বৰত কুৱেইট ভ্ৰমণ কৰিব প্ৰধানমন্ত্ৰী নৰেন্দ্ৰ মোদীয়ে । বৈদেশিক পৰিক্ৰমা মন্ত্ৰালয়ে প্ৰকাশ কৰা অনুসৰি এয়া ৪৩ বছৰৰ পাছত ভাৰতৰ কোনো প্ৰধানমন্ত্ৰীৰ প্ৰথম কুৱেইট ভ্ৰমণ হ’ব । এই ভ্ৰমণৰ সময়ত প্ৰধানমন্ত্ৰী প্ৰধানমন্ত্ৰী মোদীয়ে কুৱেইটৰ নেতৃত্বৰ সৈতে আলোচনাত মিলিত হোৱাৰ লগতে ভাৰতীয় সম্প্ৰদায়ৰ সৈতেও মত বিনিময় কৰিব ।

বৈদেশিক পৰিক্ৰমা মন্ত্ৰালয়ে কয় যে ভাৰত আৰু কুৱেইটৰ মাজত পৰম্পৰাগতভাৱে ঘনিষ্ঠ আৰু বন্ধুত্বপূৰ্ণ সম্পৰ্ক আছে । লগতে দুয়োখন দেশৰ জনসাধাৰণৰ মাজত আছে সুদৃঢ় সম্পৰ্ক । ভাৰত কুৱেইটৰ অন্যতম শীৰ্ষ বাণিজ্যিক অংশীদাৰ দেশ । ভাৰতীয় সম্প্ৰদায়েই হৈছে কুৱেইটৰ সৰ্ববৃহৎ প্ৰবাসী বৰ্গ । এই ভ্ৰমণে ভাৰত আৰু কুৱেইটৰ বহুমুখী সম্পৰ্ক আৰু অধিক শক্তিশালী কৰিব । শেহতীয়াকৈ কুৱেইটৰ বৈদেশিক মন্ত্ৰী আব্দুল্লা আলী আল-য়াহিয়াই ভাৰত ভ্ৰমণ কৰিছিল । এই সময়ত তেওঁ বৈদেশিক পৰিক্ৰমা মন্ত্ৰী এছ জয়শংকৰক সাক্ষাৎ কৰে ।

১৯৮১ চনত ইন্দিৰা গান্ধীয়ে শেষবাৰৰ বাবে কুৱেইট ভ্ৰমণ কৰিছিল-

উল্লেখযোগ্য যে ভাৰতীয় প্ৰধানমন্ত্ৰীয়ে শেষবাৰৰ বাবে কুৱেইট ভ্ৰমণ কৰিছিল ১৯৮১ চনত । তেতিয়া প্ৰয়াত ইন্দিৰা গান্ধীয়ে কুৱেইট ভ্ৰমণ কৰিছিল । ২০২৩-২৪ বিত্তীয় বৰ্ষত ভাৰত আৰু কুৱেইটৰ মাজত দ্বিপাক্ষিক বাণিজ্য ১০.৪৭ বিলিয়ন ডলাৰ । কুৱেইট ভাৰতৰ অন্যতম শীৰ্ষ বাণিজ্যিক অংশীদাৰ দেশ । কুৱেইট ভাৰতৰ ষষ্ঠ বৃহত্তম খাৰুৱা তেল যোগানকাৰী দেশ । ইয়াৰ দ্বাৰা দেশৰ শক্তিৰ প্ৰয়োজনীয়তাৰ ৩ শতাংশ পূৰণ হয় । প্ৰথমবাৰৰ বাবে কুৱেইটলৈ ভাৰতৰ ৰপ্তানি ২ বিলিয়ন ডলাৰ হোৱাৰ বিপৰীতে ভাৰতত কুৱেইট বিনিয়োগ কৰ্তৃপক্ষৰ বিনিয়োগে ১০ বিলিয়ন ডলাৰ অতিক্ৰম কৰিলে । ভাৰতৰ সৈতে সামুদ্ৰিক বাণিজ্য আছিল ইয়াৰ অৰ্থনীতিৰ মেৰুদণ্ড ।

১৯৬১ চনলৈকে কুৱেইটত ভাৰতীয় টকা আইনী মুদ্ৰা আছিল-

১৯৬১ চনলৈকে কুৱেইটত ভাৰতীয় টকা আইনী মুদ্ৰা আছিল । ই দুয়োখন দেশৰ মাজত চিৰস্থায়ী অৰ্থনৈতিক আৰু সাংস্কৃতিক সম্পৰ্কৰ প্ৰতীক । ১৯৬১ চনত দুয়োখন দেশৰ মাজত আনুষ্ঠানিকভাৱে কূটনৈতিক সম্পৰ্ক স্থাপন কৰা হয় । আমিৰ শ্বেখ মিছাল আল আহমদ আল-জাবেৰ আল-ছাবাহে ২০১৭ চনৰ জুলাই মাহত ব্যক্তিগত ভ্ৰমণসূচীৰে ভাৰত ভ্ৰমণ কৰিছিল ।