আল্লু অৰ্জুন-ৰশ্মিকা মন্দনাৰ ছবি পুষ্পা ২ মুক্তিৰ পঞ্চম দিনত ভৰি দিছে । এই কেইটামান দিনৰ ভিতৰতে ছবিখন ব্লকবাষ্টাৰ হিচাপে প্ৰমাণিত হৈছে । প্ৰথম দিনাই ১৬৪.২৫ কোটি টকাৰ দৰ্শনীয় উপাৰ্জনেৰে বৃহৎ অপেনিং লোৱা প্ৰথমখন ভাৰতীয় ছবি হিচাপে পৰিগণিত হয় ‘পুষ্পা ২’ ।
মুক্তিৰ পঞ্চম দিনাও ছবিখন চাবলৈ দৰ্শকৰ লানি নিছিগা ভিৰ পৰিলক্ষিত হৈছে । ছবিখনৰ বক্স অফিচ সংগ্ৰহৰ সৈতে জড়িত প্ৰাৰম্ভিক পৰিসংখ্যায়ো একেই কথা কৈছে ।
পুষ্পা ২ বক্স অফিচ সংগ্ৰহ-
মুক্তিৰ এদিন পূৰ্বে অৰ্থাৎ ৪ ডিচেম্বৰত পেইড প্ৰিভিউৰ পৰা পুষ্পাই ১০.৬৫ কোটি টকা উপাৰ্জন কৰিছিল । ইয়াৰ পিছত প্ৰথম আৰু দ্বিতীয় দিনত ১৬৪.২৫ কোটি আৰু ৯৩.৮ কোটি টকা উপাৰ্জন কৰে । তৃতীয় দিনা ছবিখনে ১১৯.২৫ কোটি টকা সংগ্ৰহ কৰে ।
চতুৰ্থ দিনৰ উপাৰ্জন প্ৰথম দিনাতকৈ কিছু কম হয় । চতুৰ্থ দিনা ছবিখনে ১৪১.০৫ কোটি টকা উপাৰ্জন কৰে । এতিয়া পঞ্চম দিনৰ ছবিখনৰ উপাৰ্জনৰ সৈতে জড়িত প্ৰাৰম্ভিক পৰিসংখ্যা অনুসৰি পুষ্পা ২এ বিয়লি ৩:৪৫ বজালৈকে ১৮.৮৮ কোটি টকা সংগ্ৰহ কৰি মুঠ ৫৪৭.৮৮ কোটি টকা উপাৰ্জন কৰিছে । এই সকলোবোৰ তথ্য চূড়ান্ত নহয় আৰু ইয়াত হয়তো এতিয়া পৰিৱৰ্তন দেখা যাব পাৰে ।
পঞ্চম দিনত শ্বাহৰুখ খান আৰু ৰণবীৰ কাপুৰৰ অভিলেখ ভংগ কৰিলে পুষ্পা ২এ-
পুষ্পা ২এ ভাৰতৰ সৰ্বকালৰ শীৰ্ষ ২০ খন ব্লকবাষ্টাৰ ছবি যেনে গদৰ ২, বাহুবলী, ডংগল, চালাৰ আৰু সঞ্জুৰ অভিলেখ ভংগ কৰাই নহয়, আজি ই পাঠান (৫৪৩.০৯)ৰ লাইফ টাইম কালেকশ্যনো অতিক্ৰম কৰিছে । ইয়াতেই ক্ষান্ত নাথাকি পুষ্পা ২এ ২০২৩ চনত মুক্তি পোৱা ৰণবীৰ কাপুৰৰ ছবি এনিমেল (৫৫৩.৮৭)ৰ অভিলেখো ভংগ কৰিছে ।
‘স্ত্ৰী ২’ৰ লাইফটাইম কালেকশ্যনো বিপদত-
এতিয়া পুষ্পা ২ৰ বক্স অফিচ উপাৰ্জনে অতি সোনকালে ৰাজকুমাৰ ৰাও-শ্ৰদ্ধা কাপুৰ অভিনীত ছবি স্ত্ৰী ২ৰ বক্স অফিচৰ ফিগাৰ স্পৰ্শ কৰিবলৈ ওলাইছে । চলিত বৰ্ষত মুক্তি পোৱা স্ত্ৰী ২ এ ৫৯৭.৯৯ কোটি টকা উপাৰ্জন কৰিছিল, যাৰ পৰা পুষ্পা ২ এতিয়া মাত্ৰ কেইখোজমান দূৰত ।
