মঙলবাৰে দক্ষিণ কোৰিয়াৰ ৰাষ্ট্ৰপতি ইউন চুক-ইয়লে জৰুৰীকালীন সামৰিক আইন (মাৰ্শ্বাল ল’) জাৰি কৰাৰ কথা ঘোষণা কৰে । তেওঁ দেশৰ বিৰোধীয়ে সংসদ নিয়ন্ত্ৰণ কৰা, উত্তৰ কোৰিয়াৰ প্ৰতি সহানুভূতিশীল হোৱা, ৰাষ্ট্ৰবিৰোধী কাৰ্যকলাপৰ জৰিয়তে চৰকাৰক অস্থিৰ কৰি তোলাৰ অভিযোগ উত্থাপন কৰে ।
সংবিধান ৰক্ষাৰ বাবে এই পদক্ষেপ প্ৰয়োজনীয় : ৰাষ্ট্ৰপতি ইউন
ৰাষ্ট্ৰপতি ইউনে টেলিভিছনৰ এটা অনুষ্ঠানৰ জৰিয়তে এই ঘোষণা কৰে । তেওঁ কয় যে দেশৰ সংবিধান আৰু আইন ৰক্ষাৰ বাবে এই পদক্ষেপ অতি প্ৰয়োজনীয় । কিন্তু এই সিদ্ধান্তই দেশৰ চৰকাৰ আৰু গণতন্ত্ৰত কি প্ৰভাৱ পেলাব সেয়া তৎক্ষণাত স্পষ্ট হোৱা নাই । ২০২২ চনত ইউনে ৰাষ্ট্ৰপতিৰ দায়িত্ব গ্ৰহণ কৰিছিল । তেতিয়াৰ পৰাই তেওঁ নিজৰ নীতি ৰূপায়ণত প্ৰবল বিৰোধিতাৰ বাবে অসুবিধাৰ সন্মুখীন হ’বলগীয়া হৈ আহিছে ।
বিৰোধী ডেম’ক্ৰেটিক পাৰ্টিৰ সাংসদসকলে বৈঠক আহ্বান কৰে-
অহা বছৰৰ বাজেট বিধেয়ক সন্দৰ্ভত ৰাষ্ট্ৰপতি ইউন চুক-ইয়লৰ পিপল পাৱাৰ পাৰ্টি আৰু বিৰোধী ডেম’ক্ৰেটিক পাৰ্টিৰ মাজত একমতত উপনীত হ’ব নোৱাৰাৰ সময়তে এই ঘোষণা কৰা হৈছে । ইয়াৰ উপৰিও ইউনে তেওঁৰ পত্নী আৰু কিছুমান শীৰ্ষ বিষয়াৰ সৈতে জড়িত কথিত কেলেংকাৰীৰ স্বতন্ত্ৰ তদন্তৰ দাবী নাকচ কৰি বিৰোধীৰ তীব্ৰ সমালোচনাৰ সন্মুখীন হৈছে । প্ৰতিবেদন অনুসৰি ইউনৰ এই ঘোষণাৰ পিছত ডেম’ক্ৰেটিক পাৰ্টিয়ে নিজৰ সাংসদসকলৰ জৰুৰী বৈঠক আহ্বান কৰে ।
