ৰয়েল চুইডিছ একাডেমী অফ চাইন্সে ২০২৪ চনৰ ৰসায়ন বিজ্ঞানৰ নোবেল বঁটা ডেভিদ বেকাৰ, ডেমিছ হাছাবিছ আৰু জন জাম্পাৰক প্ৰ’টিনৰ ওপৰত কৰা কামৰ বাবে প্ৰদান কৰাৰ সিদ্ধান্ত লৈছে । বেকাৰে ছিয়েটলৰ ৱাশ্বিংটন বিশ্ববিদ্যালয়ত কৰ্মৰত, আনহাতে হাছাবিছ আৰু জাম্পাৰ দুয়ো লণ্ডনৰ গুগল ডিপমাইণ্ডত কৰ্মৰত ।
ৰয়েল চুইডিছ একাডেমী অফ চাইন্সেছৰ চেক্ৰেটেৰী জেনেৰেল হান্স এলেগ্ৰেনে এই পুৰস্কাৰ ঘোষণা কৰে । ২০০৩ চনত, বেকাৰে এটা নতুন প্ৰ’টিন ডিজাইন কৰিছিল আৰু তেতিয়াৰ পৰা, তেওঁৰ গৱেষণা গোটে এটাৰ পিছত এটা কল্পনাপ্ৰসূত প্ৰ’টিন সৃষ্টি কৰিছে, য’ত ঔষধ, ভেকচিন, নেন’মেটেৰিয়েল আৰু ক্ষুদ্ৰ চেন্সৰ হিচাপে ব্যৱহাৰ কৰিব পৰা প্ৰ’টিনকে ধৰি বিভিন্ন প্ৰ’টিনৰ সৃষ্টি হৈছে বুলি নোবেল কমিটীয়ে জনায় ।
হাছাবিছ আৰু জাম্পাৰে এটা কৃত্ৰিম বুদ্ধিমত্তাৰ আৰ্হি তৈয়াৰ কৰিছিল যিয়ে গৱেষকসকলে চিনাক্ত কৰা প্ৰায় সকলো ২০ কোটি প্ৰটিনৰ গঠন ভৱিষ্যদ্বাণী কৰিবলৈ সক্ষম হৈছে বুলি সমিতিখনে লগতে কয় । যোৱা বছৰ কোৱাণ্টাম বিন্দুৰ ওপৰত কৰা কামৰ বাবে তিনিজন বিজ্ঞানীক এই ৰসায়ন বিজ্ঞানৰ বঁটা দিয়া হৈছিল — মাত্ৰ কেইটামান নেন’মিটাৰ ব্যাসৰ ক্ষুদ্ৰ কণা যিয়ে অতি উজ্জ্বল ৰঙৰ পোহৰ নিৰ্গত কৰিব পাৰে আৰু যাৰ দৈনন্দিন জীৱনত প্ৰয়োগৰ ভিতৰত ইলেক্ট্ৰনিক্স আৰু মেডিকেল ইমেজিং অন্তৰ্ভুক্ত ।
