‘পুষ্পা ২: দ্য ৰুল’ক লৈ অনুৰাগীৰ মাজত প্ৰচণ্ড উন্মাদনা পৰিলক্ষিত হৈছে । ৫ ডিচেম্বৰত ভাৰতৰ লগতে বিশ্বজুৰি মুক্তি পাব আল্লু অৰ্জুন অভিনীত বহু প্ৰতিক্ষীত এই ছবিখনে । ইয়াৰ পূৰ্বে আল্লু অৰ্জুন অভিনীত ছবিখনৰ এডভান্স বুকিং আৰম্ভ হৈছে । ‘পুষ্পা ২: দ্য ৰুল’ অগ্ৰিম বুকিঙত দ্ৰুতগতিত উপাৰ্জন কৰিছে ।
মুক্তিৰ ৬ দিন পূৰ্বে, ৩০ নৱেম্বৰৰ পৰা ‘পুষ্পা ২: দ্য ৰুল’ৰ আগতীয়া বুকিং আৰম্ভ হৈছে । আল্লু অৰ্জুনৰ ছবিখনে আগতীয়া বুকিংত যথেষ্ট টকা উপাৰ্জন কৰা দেখা গৈছে । আগতীয়া বুকিং আৰম্ভ হোৱাৰ মাত্ৰ ২৪ ঘণ্টাত ছবিখনে লাখ লাখ টিকট বিক্ৰী কৰি ১২ কোটিৰ সীমা অতিক্ৰম কৰিছে ।
‘পুষ্পা ২’ৰ অগ্ৰিম বুকিং ৰিপৰ্ট-
এক প্ৰতিবেদন অনুসৰি মুক্তিৰ প্ৰথম দিনাই আগতীয়াকৈ বুকিং আৰম্ভ হোৱাৰ ২৪ ঘণ্টাৰ ভিতৰতে ‘পুষ্পা ২: দ্য ৰুল’ৰ ২ লাখ ৪৮ হাজাৰ ৩৮৪ টিকট বিক্ৰী হৈছে । ইয়াৰ লগে লগে ছবিখনে এই পৰ্যন্ত ৭.৪৯ কোটি টকা সংগ্ৰহ কৰিছে । ব্লক আসনৰ সৈতে এই সংখ্যা হৈছে ১২.৮৪ কোটি টকা ।
‘পুষ্পা ২’ৰ বক্স অফিচ সংগ্ৰহ-
‘পুষ্পা ২: দ্য ৰুল’ৰ এডভান্স বুকিং ৰিপ’ৰ্টলৈ চালে দেখা যায় যে এই ছবিখনে বক্স অফিচত এক ডাঙৰ অপেনিং কৰিবলৈ সাজু হৈছে । প্ৰতিবেদন অনুসৰি আল্লু অৰ্জুন আৰু ৰশ্মিকা মন্দনাৰ এই ছবিখনে প্ৰথম দিনাই ঘৰুৱা বক্স অফিচত ২০০ কোটিৰো অধিক ধন সংগ্ৰহ কৰিব । একে সময়তে বিশ্বজুৰি ৩০০ কোটিৰো অধিক ব্যৱসায় কৰি ইতিহাস সৃষ্টি কৰিব ‘পুষ্পা ২: দ্য ৰুলে’ ।
পাঁচটা ভাষাত মুক্তি পাব ছবিখনে-
সুকুমাৰৰ পৰিচালনাত নিৰ্মিত ‘পুষ্পা ২: দ্য ৰুল’ ৫টা ভাষাত মুক্তি পাব – তামিল, তেলেগু, মালয়ালম, কানাড়া আৰু হিন্দী । ছবিখনত পুষ্পৰাজৰ অৱতাৰত পুনৰ ঘূৰি আহিছে আল্লু অৰ্জুন । শ্ৰীৱল্লীৰ অৱতাৰত দেখা যাব ৰশ্মিকা মন্দনাক । ছবিখনত খলনায়কৰ চৰিত্ৰত অভিনয় কৰিছে ফাহাদ ফাছিলে ।
