এম এছ ধোনীৰ অধিনায়কত্বত ২০১১ চনৰ আজিৰ দিনটোতে ভাৰতে শ্ৰীলংকাক ফাইনেলত পৰাস্ত কৰি দ্বিতীয়টো এদিনীয়া বিশ্বকাপ খিতাপ দখল কৰিছিল । ২৭৫ ৰানৰ লক্ষ্য অনুসৰণ কৰি বীৰেন্দ্ৰ ছেহৱাগ আৰু শচীন টেণ্ডুলকাৰ কম সময়ৰ ভিতৰতে পেভিলিয়নমুখী হোৱাৰ পিছত গৌতম গম্ভীৰ আৰু বিৰাট কোহলীয়ে ইনিংছ চম্ভালি লয় । ইয়াৰ পাছত এম এছ ধোনীয়ে ৯১ ৰানৰ অপৰাজিত ইনিংছ খেলি টিম ইণ্ডিয়াক জয়ৰ দিশে আগুৱাই লৈ যায় । তাৰ পিছত ধোনীৰ মেচ বিজয়ী ছয় আইকনিক হৈ পৰে ।
শ্ৰীলংকাৰ অধিনায়ক কুমাৰ ছাগ্গাকাৰাই টছত জয়লাভ কৰি প্ৰথমে বেটিং কৰাৰ সিদ্ধান্ত লয় । মহেলা জয়ৱৰ্ধনেৰ শতক (১০৩)ৰ সহায়ত দলটোৱে ২৭৪ ৰান সংগ্ৰহ কৰে । ভাৰতৰ হৈ জাহীৰ খান আৰু যুৱৰাজ সিঙে ২টাকৈ উইকেট দখল কৰে । ইয়াৰ পাছত লক্ষ্য অনুসৰণ কৰাৰ সময়ত লাচিথ মালিংগাৰ দ্বাৰা কৰা বলিঙৰ প্ৰথম অভাৰৰ দ্বিতীয়টো বলত এল বি ডব্লিউ হয় বীৰেন্দ্ৰ ছেহৱাগ ।
শচীন আউট হোৱাৰ লগে লগে উশাহ বন্ধ হৈ পৰিছিল ভাৰতীয় অনুৰাগীৰ-
মলিংগাই সপ্তম অভাৰৰ প্ৰথম বলত শচীন টেণ্ডুলকাৰ (১৮)ক আউট কৰে । এই সময়ত ৩১ ৰানত দুয়োগৰাকী অপেনিং বেটছমেনক হেৰুৱাই শলঠেকত পৰা টিম ইণ্ডিয়াৰ অনুৰাগীসকল শ্বাসৰুদ্ধ হৈ পৰিছিল । কিন্তু ইয়াৰ পাছতে গৌতম গম্ভীৰে প্ৰথমে বিৰাট কোহলী (৩৫)ৰ সৈতে ৮৩ ৰানৰ অংশীদাৰিত্ব গঢ়ে । ইয়াৰ পিছত তেওঁ এম এছ ধোনীৰ সৈতে ১০৯ ৰানৰ অংশীদাৰিত্ব গঢ়ে । গম্ভীৰ আউট হোৱাৰ সময়ত ভাৰতে মেচখনত নিজৰ স্থিতি সবল কৰিছিল । গৌতম গম্ভীৰে ১২২টা বলত ৯৭ ৰানৰ শক্তিশালী ইনিংছ খেলিছিল ।
এম এছ ধোনীৰ মেচ বিজয়ী ছয়, আবেগিক হৈ পৰিছিল ভাৰতীয় খেলুৱৈ-
এম এছ ধোনীয়ে, গম্ভীৰৰ সৈতে অংশীদাৰিত্বৰ গঢ়াৰ পিছত, যুৱৰাজ সিঙৰ সৈতে ইনিংছ আগুৱাই লৈ যায় । ধোনীয়ে ৭৯টা বলত ৯১ ৰান সংগ্ৰহ কৰে, তেওঁ নূৱন কুলাছেকাৰাৰ বিৰুদ্ধে মেচ বিজয়ী ছয় আঘাত কৰে । লগে লগে ২৮ বছৰৰ পাছত ভাৰতে দ্বিতীয়টো এদিনীয়া বিশ্বকাপ লাভ কৰে । এই নিশা ভাৰতত দীপাৱলী উদযাপন কৰা হয়, সমগ্ৰ দেশৰ ৰাজপথত ৰাইজে ভাৰতীয় দলৰ বিজয় উদযাপন কৰিছিল । ফাইনেলত জয়লাভ কৰাৰ পিছত ভাৰতীয় কিংবদন্তি খেলুৱৈসকলে চকুপানী ৰোধ কৰিব নোৱাৰিলে । খেলপথাৰখনতে তেওঁলোকে আনন্দতে কান্দিবলৈ ধৰে । শচীন, গম্ভীৰ, হৰভজন, ধোনী, যুৱৰাজ সিং আদি কিংবদন্তিৰ চকু আনন্দত সিক্ত হৈ পৰিছিল ।
২০১১ চনৰ বিশ্বকাপৰ ফাইনেলত ভাৰতৰ মূল একাদশ-
বীৰেন্দ্ৰ চেহৱাগ, শচীন তেণ্ডুলকাৰ, গৌতম গম্ভীৰ, বিৰাট কোহলী, এম এছ ধোনী, যুৱৰাজ সিং, সুৰেশ ৰাইনা, হৰভজন সিং, জাহীৰ খান, মুনাফ পেটেল, শ্ৰীশান্ত ।