এছিয়া কাপৰ পৰা আৰম্ভ কৰি ভাৰতৰ বিশ্বকাপ জয়লৈকে ২০২৫ বৰ্ষটো ক্ৰিকেট জগতৰ বাবে স্মৰণীয় আছিল । এই বৰ্ষটো ক্ৰিকেটৰ বাবে আছিল স্মৰণীয় আৰু পৰিঘটনাপূৰ্ণ বছৰ ।
ভাৰতীয় ক্ৰিকেট দলৰ বাবে ২০২৫ বৰ্ষটো আছিল স্মৰণীয় আৰু পৰিঘটনাপূৰ্ণ বছৰ । এই বছৰটোত পুৰুষৰ দলটোৱে চেম্পিয়নছ ট্ৰফী আৰু এছিয়া কাপ জয় কৰাৰ বিপৰীতে মহিলা দল প্ৰথমবাৰৰ বাবে বিশ্ব চেম্পিয়ন হয় । বিৰাট কোহলী আৰু আৰ চি বিয়েও এইবাৰ আই পি এলৰ প্ৰথমটো ট্ৰফী লাভ কৰে । জানক ২০২৫ চনৰ ক্ৰিকেটৰ ১০টা স্মৰণীয় মুহূৰ্ত…
ভাৰতৰ চেম্পিয়নছ ট্ৰফী জয়-
ৰোহিত শৰ্মাৰ অধিনায়কত্বত ভাৰতে ২০১৩ চনৰ পিছত প্ৰথমবাৰৰ বাবে চেম্পিয়নছ ট্ৰফীৰ খিতাপ দখল কৰে । গ্ৰুপ পৰ্যায়ৰ সকলো খেলতে ভাৰতে জয়লাভ কৰি ২০২৫ চনৰ ৯ মাৰ্চত খেলা ফাইনেলত নিউজীলেণ্ডক ৪ উইকেটত পৰাস্ত কৰি খিতাপ দখল কৰে । ফাইনেলত ৰোহিত শৰ্মাই ৭৬ ৰান সংগ্ৰহ কৰে, যাৰ বাবে তেওঁ খেলৰ শ্ৰেষ্ঠ খেলুৱৈ হিচাপে নিৰ্বাচিত হয় ।
ডব্লিউ টি চি চেম্পিয়ন হয় দক্ষিণ আফ্ৰিকা-
১৪ জুনত দক্ষিণ আফ্ৰিকাই বিশ্ব টেষ্ট চেম্পিয়নশ্বিপৰ ফাইনেলত অষ্ট্ৰেলিয়াক পৰাস্ত কৰে । এইটো আছিল দক্ষিণ আফ্ৰিকাৰ প্ৰথমটো ডব্লিউ টি চি খিতাপ । দ্বিতীয় ইনিংছত ১৩৬ ৰান সংগ্ৰহ কৰি এইডেন মাৰ্ক্ৰামে ফাইনেলত প্লেয়াৰ অৱ দ্য মেচৰ সন্মান লাভ কৰে ।
আই পি এলত ভাৰতীয় বেটছমেনৰ দ্ৰুততম শতক-
২০২৫ বৰ্ষটো ক্ৰিকেট বিস্ময় বৈভৱ সূৰ্য্যবংশীৰ বাবে উল্লেখযোগ্য আৰু স্মৰণীয় বৰ্ষ আছিল । আই পি এলত অভিষেক ঘটাই ২৮ এপ্ৰিলত ৰাজস্থান ৰয়েলছৰ হৈ ঐতিহাসিক ইনিংছ খেলে বৈভৱে । গুজৰাটৰ বিৰুদ্ধে ৩৫টা বলত শতক অৰ্জন কৰি আই পি এলৰ ইতিহাসত দ্ৰুততম শতক অৰ্জন কৰা ভাৰতীয় হিচাপে পৰিগণিত হয় তেওঁ । ইয়াৰ উপৰিও টি-২০ত শতক অৰ্জন কৰা আটাইতকৈ কম বয়সীয়া খেলুৱৈ হিচাপে পৰিগণিত হয় বৈভৱ ।
আই পি এলৰ প্ৰথম খিতাপ লাভ আৰ চি বিৰ-
২০২৫ চনত বিৰাট কোহলী আৰু ৰয়েল চেলেঞ্জাৰছ বাংগালুৰুৰ ১৮ বছৰীয়া অপেক্ষাৰ অন্ত পৰে । ৩ জুনত আই পি এল ২০২৫ৰ ফাইনেলত আৰ চি বিয়ে পঞ্জাব কিংছক ৬ ৰাণত পৰাস্ত কৰি খিতাপ দখল কৰে । এয়া আৰ চি বিৰ প্ৰথম আই পি এল খিতাপ ।
নো-হেণ্ডশ্বেক বিতৰ্ক-
এইবাৰ ভাৰতীয় খেলুৱৈসকলে পাকিস্তানৰ বিৰুদ্ধে এক অনন্য ৰূপত প্ৰতিবাদ সাব্যস্ত কৰে । দলটোৱে তেওঁলোকৰ বিৰুদ্ধে মেচ খেলিছিল যদিও তেওঁলোকৰ খেলুৱৈক হেণ্ডশ্বেক কৰিবলৈ অস্বীকাৰ কৰিছিল । ছলমান আলী আঘাক হেণ্ডশ্বেক কৰিবলৈ অস্বীকাৰ কৰি এছিয়া কাপত এই ধাৰা আৰম্ভ কৰিছিল সূৰ্যকুমাৰ যাদৱে । প্ৰতিযোগিতাখনত তিনিখন মেচ অনুষ্ঠিত হৈছিল, আটাইকেইখনতে এনেকুৱাই হৈছিল ।
এছিয়া কাপত ভাৰতৰ জয়লাভ-
২৮ ছেপ্টেম্বৰত ভাৰতীয় দলটোৱে ফাইনেলত পাকিস্তানক পৰাস্ত কৰি এছিয়া কাপত জয়লাভ কৰে । এছিয়া কাপৰ খেলখনত অপৰাজিত ৬৯ ৰান সংগ্ৰহ কৰি তিলক বাৰ্মাই খেলৰ শ্ৰেষ্ঠ খেলুৱৈৰ বঁটা লাভ কৰে ।
ভাৰতীয় মহিলা দলৰ প্ৰথম বিশ্বকাপ জয়-
২০২৫ বৰ্ষটো ভাৰতীয় মহিলা ক্ৰিকেট দলৰ বাবেও স্মৰণীয় আছিল । কিয়নো দলটোৱে প্ৰথমবাৰৰ বাবে বিশ্বকাপৰ খিতাপ দখল কৰিছিল । ইয়াৰ পূৰ্বে দলটোৱে দুবাৰকৈ ফাইনেলত প্ৰৱেশ কৰিছিল যদিও খিতাপ দখল কৰিব পৰা নাছিল । যোৱা ২ নৱেম্বৰত ফাইনেলত দক্ষিণ আফ্ৰিকাক পৰাস্ত কৰি প্ৰথমবাৰৰ বাবে বিশ্বকাপৰ খিতাপ দখল কৰে টিম ইণ্ডিয়াই ।
ঘৰুৱা খেলত দক্ষিণ আফ্ৰিকাৰ হাতত পৰাস্ত টিম ইণ্ডিয়া-
টেষ্ট ক্ৰিকেটত ভাৰতীয় দলৰ বাবে ২০২৫ চনটো ভাল নাছিল আৰু শেষো একেধৰণৰ আছিল । ২৫ বছৰৰ পিছত প্ৰথমবাৰৰ বাবে নিজৰ মাটিতে ভাৰতক হোৱাইট ৱাশ্ব কৰিছিল । দুখন মেচৰ শৃংখলাত ২-০ ব্যৱধানত পৰাস্ত হয় ভাৰত ।
বহু বছৰৰ পিছত বিজয় হাজাৰেত বিৰাট কোহলী আৰু ৰোহিত শৰ্মা-
২৪ ডিচেম্বৰতো স্মৰণীয় তাৰিখ আছিল, কিয়নো বিৰাট কোহলী আৰু ৰোহিত শৰ্মাই বহু বছৰৰ পাছত বিজয় হাজাৰে ট্ৰফীত খেলিছিল । ২০১০ চনৰ পিছত প্ৰথমবাৰৰ বাবে কোহলীয়ে আৰু ২০১৭ চনৰ পিছত প্ৰথমবাৰৰ বাবে ৰোহিতে বিজয় হাজাৰে ট্ৰফীত খেলে । দুয়োজনে ভাল প্ৰদৰ্শন আগবঢ়ায় ।
১৫ বছৰৰ পাছত অষ্ট্ৰেলিয়াত ইংলেণ্ডৰ জয়-
মেলবৰ্ণত অনুষ্ঠিত বক্সিং ডে টেষ্টত ইংলেণ্ডে অষ্ট্ৰেলিয়াক ৪ উইকেটত পৰাস্ত কৰে । এইটো আছিল এক ঐতিহাসিক মুহূৰ্ত । কিয়নো ১৫ বছৰৰ পাছত প্ৰথমবাৰৰ বাবে ইংলেণ্ডে নিজৰ মাটিত টেষ্ট মেচত অষ্ট্ৰেলিয়াক পৰাস্ত কৰে । মাত্ৰ ২ দিনৰ ভিতৰতে সমাপ্ত হয় টেষ্ট মেচখন ।
লগতে পঢ়ক : ২০২৫ বৰ্ষত আন্তঃৰাষ্ট্ৰীয় ক্ৰিকেটৰ ৯টা ডাঙৰ অভিলেখ; এই ক্ৰিকেটাৰসকলে ৰচিলে ইতিহাস…
