আইচিচিয়ে প্ৰতিযোগিতাখনৰ শ্ৰেষ্ঠ খেলুৱৈ একাদশ ঘোষণা কৰিছে । টি-২০ বিশ্বকাপৰ ইতিহাসত দ্ৰুততম শতক অৰ্জন কৰা ফিন এলেনকো তালিকাৰ পৰা বাদ দিয়া হৈছে ।
টি-২০ বিশ্বকাপ ২০২৬ৰ সামৰণিৰ পিছতে আইচিচিয়ে প্ৰতিযোগিতাখনৰ শ্ৰেষ্ঠ খেলুৱৈ একাদশ ঘোষণা কৰিছে । চাৰিগৰাকী ভাৰতীয় খেলুৱৈয়ে এই তালিকাত স্থান লাভ কৰাৰ বিপৰীতে নিউজীলেণ্ডৰ কোনো এজন খেলুৱৈয়ে স্থান লাভ কৰা নাই । আনকি টি-২০ বিশ্বকাপৰ ইতিহাসত দ্ৰুততম শতক অৰ্জন কৰা ফিন এলেনকো তালিকাৰ পৰা বাদ দিয়া হৈছে । জিম্বাবুৱেৰ যুৱ অ’পেনাৰ ব্রায়ান বেনেটো এই দলত নাই । প্ৰতিযোগিতাখনত তেওঁ গড় ১৪৬ত ২৯২ ৰান সংগ্ৰহ কৰে ।
আইচিচিৰ টীম অব্ দ্য টুৰ্ণামেন্ট-
প্ৰতিযোগিতাখনৰ আইচিচি টিমত নিৰ্বাচিত হৈছে অ’পেনাৰ চাহিবজাদা ফাৰহান আৰু সঞ্জু ছেমছন । ঈশান কিষান আৰু এইডেন মাৰ্কৰামকো দলত স্থান দিয়া হৈছে, মাৰ্কৰামক অধিনায়ক হিচাপে নিযুক্তি দিয়া হৈছে । হাৰ্দিক পাণ্ডিয়া আৰু উইল জেকছকো দলত অন্তৰ্ভুক্ত কৰা হৈছে । ৱেষ্ট ইণ্ডিজৰ অলৰাউণ্ডাৰ জেছন হোল্ডাৰেও এই দলত স্থান লাভ কৰিছে । যশপ্ৰীত বুমৰাহ, লুংগী ঙিদি, আদিল ৰছিদ আৰু ব্লেছিং মুজাৰাবানীকো দলত অন্তৰ্ভুক্ত কৰা হৈছে । তদুপৰি আমেৰিকাৰ শ্বেডলী ভান শ্বেইকৱিককো দলত অন্তৰ্ভুক্ত কৰা হৈছে ।
আইচিচিয়ে নিৰ্বাচন কৰা এঘাৰগৰাকী খেলুৱৈঃ
চাহিবজাদা ফাৰহান, সঞ্জু ছেমছন, ঈশান কিষান, এইডেন মাৰ্কৰাম, হাৰ্দিক পাণ্ডিয়া, উইল জেকছ, জেছন হোল্ডাৰ, যশপ্ৰীত বুমৰাহ, লুংগী ঙিদি, আদিল ৰছিদ আৰু ব্লেছিং মুজাৰাবানী ।
উল্লেখ্য যে, আইচিচিৰ এই দলত স্থান লাভ কৰা ভাৰতীয় খেলুৱৈ সঞ্জু ছেমছনে টি-২০ বিশ্বকাপত ৫খন মেচত ৮০.২৫ গঢ়ে ৩২১ ৰান সংগ্ৰহ কৰে । তেওঁৰ ষ্ট্ৰাইক ৰেট ২০০ৰ ওচৰত আছিল । ইফালে ঈশান কিষানে ৯খন খেলত ৩৫.২২ গড়ে ৩১৭ ৰান সংগ্ৰহ কৰে । তেওঁৰ ষ্ট্ৰাইক ৰেট ১৯২.২৯ । আনহাতে হাৰ্দিক পাণ্ডিয়াই ৯খন মেচত ২১৭ ৰান সংগ্ৰহ কৰাৰ লগতে ৯টা উইকেটো দখল কৰে । এই প্ৰতিযোগিতাত ভাৰতীয় দলৰ বলিং আক্ৰমণক গুৰি ধৰা যশপ্ৰীত বুমৰাহে ৮খন মেচত ১৪টা উইকেট দখল কৰাৰ বিপৰীতে তেওঁৰ ইকনমি ৰেট প্ৰতি অভাৰত ৬.২১ আছিল ।
লগতে পঢ়ক : ৫ বাৰকৈ সলনি কৰা হৈছে আই পি এলৰ সূচী, ভয়ংকৰ যুদ্ধৰ বাবে স্থগিত হৈছিল প্ৰতিযোগিতা
