পৰাজয়ৰ পিছতো সজীৱ ভাৰতীয় দলৰ আশা
ইন্দোৰৰ হোলকাৰ ষ্টেডিয়ামত দেওবাৰে ভাৰতক ৪ ৰানত পৰাস্ত কৰি ২০২৫ চনৰ মহিলা বিশ্বকাপৰ ছেমি ফাইনেলত স্থান দখল কৰিবলৈ সক্ষম হয় ইংলেণ্ড দলে । টছত জয়ী হোৱাৰ পিছত প্ৰথমে বেটিং কৰি ইংলেণ্ডে ৫০ অভাৰত ৮ উইকেটত ২৮৮ ৰান সংগ্ৰহ কৰে । অধিনায়ক হিথাৰ নাইটে ৯১ বলত (১৫ টা চাৰি, ১ টা ছয়) ১০৯ ৰান সংগ্ৰহ কৰে । এয়া তেওঁৰ ৩০০ সংখ্যক এদিনীয়া মেচ আছিল । এমি জ’নেও ৫৬ ৰান (৬৮ টা বল, ৮ টা চাৰি)ৰে এক শক্তিশালী অৱদান আগবঢ়ায় ।
ইংলেণ্ডে ৪৫ নং অভাৰত ৩ উইকেটত ২৪৯ ৰান সংগ্ৰহ কৰিছিল যদিও অফ স্পীনাৰ দীপ্তী শৰ্মা (৪/৫১) আৰু অভিষেক ঘটোৱা শ্ৰী চৰাণী (২/৬৮)ৰ নেতৃত্বত ভাৰতীয় বলাৰে শেষৰ পাঁচ অভাৰত ৫টা উইকেট দখল কৰি ইংলেণ্ডক ৩০০ ৰানত সীমাবদ্ধ কৰি ৰাখে ।
ইয়াৰ প্ৰত্যুত্তৰত স্মৃতি মন্ধানা (৮৮ ৰান), অধিনায়ক হৰমনপ্ৰীত কৌৰ (৭০) আৰু দীপ্তি শৰ্মাই ৫০ ৰান কৰে যদিও ৫০ অভাৰত ৬ উইকেটত ২৮৪ ৰানহে সংগ্ৰহ কৰিবলৈ সক্ষম হয় ভাৰতীয় দলটোৱে ।
এই জয়েৰে ইংলেণ্ডে ছেমিফাইনেলত নিজৰ স্থান নিশ্চিত কৰে । ইতিমধ্যে অষ্ট্ৰেলিয়া আৰু দক্ষিণ আফ্ৰিকাই ছেমিফাইনেলৰ বাবে যোগ্যতা অৰ্জন কৰিছে । ইয়াৰ পূৰ্বে দক্ষিণ আফ্ৰিকা আৰু অষ্ট্ৰেলিয়াৰ হাতত পৰাস্ত হোৱা ভাৰতীয় মহিলা দলৰ এয়া একেৰাহে তৃতীয়টো পৰাজয় । ভাৰত এতিয়া কৰো অথবা মৰো এই পৰিস্থিতিত আছে । এই বিশ্বকাপত এতিয়ালৈকে ভাৰতীয় মহিলা দলটোৱে খেলা পাঁচখন খেলত কেৱল পাকিস্তান আৰু শ্ৰীলংকাৰ বিৰুদ্ধেহে জয়লাভ কৰিছে । অৱশ্যে ভাৰতীয় দলে এতিয়াও ছেমিফাইনেলৰ বাবে যোগ্যতা অৰ্জন কৰিব পাৰে ।
ভাৰতীয় দলৰ ছেমি ফাইনেলত প্ৰৱেশৰ সম্ভাৱনা কিমান ?
ছেমি ফাইনেলত এতিয়া কেৱল এটা স্থান বাকী আছে । নিউজীলেণ্ডৰ বিৰুদ্ধে ভাৰতৰ পৰৱৰ্তী মেচ দুয়োটা দলৰ বাবে অতি গুৰুত্বপূৰ্ণ । বৰ্তমান পইণ্ট তালিকাত ভাৰত চতুৰ্থ স্থানত আছে আৰু নিউজীলেণ্ড পঞ্চম স্থানত আছে । দুয়োটা দলৰ চাৰিটাকৈ পইণ্ট আছে যদিও ভাৰতৰ নেট ৰান ৰেট নিউজীলেণ্ডতকৈ অলপ উন্নত ।
নিউজীলেণ্ডৰ হাতত ভাৰত পৰাস্ত হ’লেও হৰমনপ্ৰীত কৌৰ নেতৃত্বাধীন দলটোৱে ছেমি ফাইনেলত প্ৰৱেশৰ সম্ভাৱনা এতিয়াও আছে । ইয়াৰ বাবে ভাৰতে প্ৰায় দৌৰৰ বাহিৰত থকা বাংলাদেশক পৰাস্ত কৰিব লাগিব আৰু আশা কৰিব লাগিব যে প্ৰতিযোগিতাখনৰ লীগ ৰাউণ্ডৰ অন্তিমখন খেলত ইংলেণ্ডৰ হাতত নিউজীলেণ্ড পৰাস্ত হওক । যদিহে ভাৰতীয় মহিলা দলে নিউজীলেণ্ডৰ বিৰুদ্ধে জয়লাভ কৰে তেন্তে ছেমি ফাইনেলত প্ৰৱেশ কৰিব পাৰিব ।
লগতে পঢ়ক : প্ৰত্যাৱৰ্তন মেচত নচলিল ৰোহিত-কোহলীৰ যাদু; শুভমনেও কৰিলে হতাশ
