গুজৰাটত প্ৰধানমন্ত্ৰী মোদীৰ গৰ্জন
দুদিনীয়া গুজৰাট ভ্ৰমণৰ দ্বিতীয় দিনা প্ৰধানমন্ত্ৰী নৰেন্দ্ৰ মোদীয়ে বিগত দুটা দশকত গুজৰাটত কৰা সংস্কাৰৰ সৈতে জড়িত এক অনুষ্ঠানত অংশগ্ৰহণ কৰে । এই সময়ত গান্ধী নগৰৰ মহাত্মা মন্দিৰত ৫,৫৩৬ কোটি টকাৰ বিভিন্ন উন্নয়নমূলক প্ৰকল্পৰ শুভাৰম্ভ আৰু আধাৰশিলা স্থাপন কৰে প্ৰধানমন্ত্ৰীগৰাকীয়ে । কাৰ্যসূচীৰ সময়ত প্ৰধানমন্ত্ৰী মোদীয়ে কয় যে আমি আমাৰ দেশৰ ব্ৰেণ্ডক লৈ গৌৰৱ কৰা উচিত । আমি মেক ইন ইণ্ডিয়াক লৈ গৌৰৱ কৰা উচিত । প্ৰধানমন্ত্ৰী মোদীয়ে কয় যে আমি আমাৰ বেছিভাগ প্ৰয়োজনৰ বাবে আন দেশৰ ওপৰত নিৰ্ভৰশীল হৈ আহিছো । কিন্তু এইবোৰ বস্তু এতিয়া দেশতে উপলব্ধ । আমাৰ প্ৰয়োজনীয় আৰু ভাল সামগ্ৰীৰ ৯০% তকৈ অধিক দেশতে উপলব্ধ । আমি সেইবোৰ ব্যৱহাৰ কৰা উচিত ।
কাৰ্যসূচীৰ সময়ত প্ৰধানমন্ত্ৰী মোদীয়ে কয়, ‘মোৰ মনত আছে যে আমি ষষ্ঠ স্থানৰ পৰা পঞ্চম স্থানলৈ গতি কৰি উদযাপন কৰিছিলো । এই মুহূৰ্তটো বিশেষভাৱে গুৰুত্বপূৰ্ণ আছিল, কিয়নো আমি ২৫০ বছৰ ধৰি আমাক শাসন কৰা একেখন দেশক অতিক্ৰম কৰিলো । এতিয়া আমি চতুৰ্থ স্থানত উপনীত হোৱাৰ লগে লগে তৃতীয় বৃহত্তম অৰ্থনীতি হোৱাৰ হেঁচা বাঢ়িছে । তাতকৈও অধিক দৃঢ়তাৰ প্ৰয়োজন । এই দেশখনে আৰু ৰৈ থাকিব নিবিচাৰে । কোনোবাই যদি আমাক ধৈৰ্য্য ধৰিব লাগে বুলি পৰামৰ্শ দিয়ে তেন্তে ‘মোদী হায় তোহ মোমকিন হায়’ বুলি কোৱা মাত শুনা যায় । গতিকে আমাৰ স্পষ্ট লক্ষ্য ২০৪৭ চনৰ ভিতৰত ভাৰতক এখন উন্নত ৰাষ্ট্ৰ হিচাপে গঢ়ি তোলা ।‘
প্ৰধানমন্ত্ৰী মোদীয়ে কয় যে ২০১৪ চনৰ ২৬ মে’ত মই প্ৰথমবাৰৰ বাবে দেশৰ প্ৰধানমন্ত্ৰী হিচাপে শপত লোৱাৰ সুযোগ পাইছিলোঁ । সেই সময়ত ভাৰতৰ অৰ্থনীতি বিশ্বৰ ১১ নম্বৰ স্থানত আছিল । এই সময়ছোৱাত আমি কৰ’নাৰ বিৰুদ্ধে যুঁজিছিলো আৰু লগতে ওচৰ-চুবুৰীয়াৰ পৰাও বিপদৰ সন্মুখীন হৈছিলো । প্ৰাকৃতিক দুৰ্যোগৰ সন্মুখীন হৈও আমি ইমান কম সময়ৰ ভিতৰতে ১১ নং বৃহত্তম অৰ্থনীতিৰ পৰা ৪ৰ্থ বৃহত্তম অৰ্থনীতিলৈ গতি কৰিবলৈ সক্ষম হ’লোঁ । প্ৰধানমন্ত্ৰীয়ে কয় যে আমি উন্নয়ন বিচাৰো, আমি প্ৰগতি বিচাৰো । প্ৰধানমন্ত্ৰীয়ে কয়, “আমাৰ লক্ষ্য হৈছে… ২০৪৭ চনত ভাৰতৰ বিকাশ হ’ব লাগিব । আমি স্বাধীনতাৰ ১০০ বছৰ এনেদৰে উদযাপন কৰিম যাতে উন্নত ভাৰতৰ পতাকা বিশ্বত সগৌৰৱে উৰি থাকিব ।”
লগতে পঢ়ক : জাপানক অতিক্ৰমি বিশ্বৰ চতুৰ্থ বৃহত্তম অৰ্থনীতিত পৰিণত হ’ল ভাৰত…
