ভাৰতে পাকিস্তানৰ সৈতে দশক পুৰণি সিন্ধু জল সন্ধি স্থগিত ৰখাৰ সিদ্ধান্তৰ পাছত মঙলবাৰে প্রধানমন্ত্রী নৰেন্দ্র মোদীয়ে প্রথম ৰাজহুৱাকৈ প্ৰতিক্ৰিয়া প্ৰকাশ কৰে ৷ তেওঁ কয় যে ভাৰতৰ বাবে নিৰ্ধাৰিত পানী এতিয়া দেশৰ ভিতৰতে থাকিব আৰু ব্যৱহাৰ কৰা হ’ব ।
ব্যক্তিগত নিউজ চেনেলৰ এক অনুষ্ঠানত ভাষণ দি প্ৰধানমন্ত্ৰীগৰাকীয়ে কয়, “আগতে ভাৰতৰ অধিকাৰৰ পানীও দেশৰ বাহিৰলৈ ওলাই গৈছিল । এতিয়া ভাৰতৰ পানী ভাৰতৰ অধিকাৰৰ বাবে বৈ যাব, ভাৰতৰ পক্ষত থাকিব আৰু কেৱল ভাৰতৰ কামত আহিব ।” চৰকাৰে সিন্ধু জল সন্ধি স্থগিত ৰখাৰ কথা ঘোষণা কৰাৰ কেইদিনমান পিছতে এই প্ৰতিক্ৰিয়া প্ৰকাশ কৰিছে প্ৰধানমন্ত্ৰী মোদীয়ে । বিশ্ব বেংকৰ মধ্যস্থতাত ১৯৬০ চনত পাকিস্তানৰ সৈতে স্বাক্ষৰিত এইখন ঐতিহাসিক পানী ভাগ-বতৰা চুক্তি । পহলগামত সংঘটিত হোৱা মাৰাত্মক সন্ত্ৰাসবাদী আক্ৰমণৰ ফলত ২৬ জন সাধাৰণ নাগৰিকৰ প্ৰাণ কাঢ়ি নিয়াৰ পিছত এই চুক্তি স্থগিত ৰখা হয় ।
এই সন্ধি স্থগিত ৰখাৰ সিদ্ধান্ত গ্ৰহণ কৰে ৰাষ্ট্ৰীয় নিৰাপত্তাৰ ক্ষেত্ৰত চৰকাৰৰ সৰ্বোচ্চ সিদ্ধান্ত গ্ৰহণকাৰী সংস্থা কেবিনেট কমিটি অন ছিকিউৰিটিয়ে । পাকিস্তানে সীমা অতিক্ৰম কৰি সন্ত্ৰাসবাদক সমৰ্থন কৰা বন্ধ নকৰালৈকে এই নিলম্বন কাৰ্যকৰী হৈ থাকিব বুলি স্পষ্ট কৰি দিছে ভাৰতে । এই সন্ধিৰ আৰম্ভণিৰ পাছত প্ৰথমবাৰৰ বাবে ভাৰতে আনুষ্ঠানিকভাৱে ইয়াৰ কাৰ্যকৰীকৰণত বাধা আৰোপ কৰিছে । এয়া ভাৰতৰ কূটনৈতিক স্থিতিৰ এক উল্লেখযোগ্য পৰিৱৰ্তন । বছৰ বছৰ ধৰি ধাৰাবাহিক উত্তেজনাৰ বাবে সময়ে সময়ে পুনৰীক্ষণৰ আহ্বান জনোৱাৰ পিছতো এতিয়ালৈকে সন্ধিখন অস্পৃশ্য হৈ আছে ।
পূৰ্বৰ চৰকাৰসমূহক কঠোৰ সিদ্ধান্ত লোৱাত অনিচ্ছা প্ৰকাশ কৰাৰ বাবে মঙলবাৰে প্ৰধানমন্ত্ৰী মোদীয়ে কয় যে, “এটা সময় আছিল যেতিয়া মানুহে যিকোনো প্ৰয়োজনীয় পদক্ষেপ লোৱাৰ আগতে বিশ্বই কি ভাবিব সেই বিষয়ে চিন্তা কৰিছিল । তেওঁলোকে ভোট পাব নে নাপাব, তেওঁলোকৰ আসনখন নিৰাপদ হ’ব নে নহয়, সেই কথা ভাবিছিল । এই কাৰণসমূহৰ বাবেই বৃহৎ সংস্কাৰ পলম হৈছিল । কোনো দেশ এনেকৈ আগবাঢ়িব নোৱাৰে । দেশখন তেতিয়াহে আগবাঢ়ি যায় যেতিয়া আমি ৰাষ্ট্ৰক প্ৰথম স্থান দিওঁ ।”
