ইৰাণৰ বিৰুদ্ধে যুঁজত ইজৰাইলৰ পক্ষত জি-৭ দেশ
জি-৭ দেশসমূহে ইৰাণৰ বিৰুদ্ধে যুঁজত ইজৰাইলক মুকলিকৈ সমৰ্থন কৰিছে । সোমবাৰে সন্ধিয়া জাৰি কৰা এক বিবৃতিত জি-৭ দেশসমূহে ইজৰাইলৰ প্ৰতি সমৰ্থন প্ৰকাশ কৰি দেশখনৰ প্ৰতিদ্বন্দ্বী ইৰাণক পশ্চিম এছিয়াৰ অস্থিৰতাৰ মূল কাৰণ বুলি অভিহিত কৰে । বিবৃতিটোত অঞ্চলটোত শান্তি আৰু স্থিতিশীলতাৰ আহ্বান জনোৱা হৈছে । শুকুৰবাৰে ইৰাণ আৰু ইজৰাইলৰ মাজত যুদ্ধ আৰম্ভ হৈছিল, যেতিয়া ইজৰাইলে ইৰাণৰ ওপৰত আক্ৰমণ চলাইছিল । ইয়াৰ প্ৰতিক্ৰিয়া স্বৰূপে ইৰাণেও ড্ৰোন আৰু মিছাইলেৰে ইজৰাইলক আক্ৰমণ কৰে । ইয়াৰ ফলত অঞ্চলটোত উত্তেজনা আৰু উদ্বেগ বৃদ্ধি পাই । ২০২৩ চনৰ অক্টোবৰ মাহত ইজৰাইলে গাজাত সামৰিক আক্ৰমণ আৰম্ভ কৰাৰ পৰাই ইয়াত উত্তেজনা সৃষ্টি হৈছিল ।
বৈশ্বিক চাপ সম্পৰ্কীয় কেইবাটাও বিষয়ৰ ওপৰত আলোচনা আৰু সমাধানৰ বাবে জি-৭ দেশসমূহৰ নেতাসকল কানাডাত একত্ৰিত হৈছিল । কিন্তু ইৰাণৰ পাৰমাণৱিক কাৰ্যসূচীক লৈ হোৱা সংঘাতৰ বাবে এই কাৰ্যসূচী সম্পূৰ্ণৰূপে ব্যাহত হৈ পৰে । ইজৰাইল আৰু ইৰাণৰ মাজত চলি থকা সংঘাত এতিয়া যেন অধিক বিপজ্জনক আৰু অনিয়ন্ত্ৰিত হৈ পৰিছে । চাৰিদিন ধৰি দুয়োখন দেশে ইখনে সিখনৰ ওপৰত বোমা আক্ৰমণ কৰি আহিছে ।
জি-৭ৰ সময়ত ড’নাল্ড ট্ৰাম্পৰ সতৰ্কবাণী-
জি-৭ সন্মিলনত ড’নাল্ড ট্ৰাম্পে সকীয়াই দিছিল যে তেহৰানে বহু দেৰি হোৱাৰ আগতেই নিজৰ পাৰমাণৱিক কাৰ্যসূচী বন্ধ কৰাটো প্ৰয়োজন । তেওঁ কয় যে ইৰাণৰ নেতাসকলে আলোচনা কৰিব বিচাৰিব, কিন্তু তেওঁলোকৰ হাতত ইতিমধ্যে ৬০ দিনৰ সময় আছে তেওঁলোকৰ পাৰমাণৱিক উচ্চাকাংক্ষাৰ ওপৰত চুক্তিত উপনীত হ’বলৈ । ইজৰাইলৰ আক্ৰমণ আৰম্ভ হোৱাৰ আগতে যদি তেওঁলোকে তেনে কৰিব নোৱাৰে তেন্তে তেওঁলোকে চুক্তিত উপনীত হ’ব লাগিব ।
লগতে পঢ়ক : ‘যুদ্ধবিৰতিৰ সৈতে কোনো সম্পৰ্ক নাই’… জি-৭ৰ পৰা হঠাতে উভতিল ট্ৰাম্প
