ছিৰিয়াৰ বিদ্ৰোহীসকলে দেশখনৰ ৰাজধানী দামাস্কাছ আৰু ৰাষ্ট্ৰপতি বাছাৰ আল-আসাদৰ ৰাজকীয় প্ৰাসাদ দখল কৰিছে।
৫৯ বছৰীয়া স্বৈৰাচাৰী ৰাষ্ট্ৰপতি বাছাৰ আল-আসাদে যুদ্ধবিধ্বস্ত দেশ ছিৰিয়া ত্যাগ কৰি মস্কোত উপস্থিত হৈছে। য’ত তেওঁক ৰাছিয়াই আশ্ৰয় দিছে।
একে সময়তে, আমেৰিকাই বিদ্ৰোহীসকলৰ দখলৰ মাজতে ছিৰিয়াত ইছলামিক ষ্টেট (আইএছআইএছ)ৰ ঠিকনাত কেইবাটাও বিমান আক্ৰমণ চলাইছে।
আমেৰিকা যুক্তৰাষ্ট্ৰৰ কেন্দ্ৰীয় কমাণ্ডে কৈছিল যে তেওঁলোকৰ সুৰক্ষা বাহিনীয়ে দেওবাৰে মধ্য ছিৰিয়াত ইছলামিক ষ্টেটৰ অৱস্থান সমূহত ১২খনতকৈও অধিক বিমানেৰে আক্ৰমণ চলাইছিল।
আমেৰিকা যুক্তৰাষ্ট্ৰৰ বিমান আক্ৰমণৰ উদ্দেশ্য হৈছে যুদ্ধবিধ্বস্ত দেশখনত ইছলামিক ষ্টেটৰ পুনৰ উত্থান প্ৰতিহত কৰা।
এই অভিযানত বি-১৫, এফ-১০ আৰু এ-৭৫কে ধৰি আমেৰিকা যুক্তৰাষ্ট্ৰৰ বায়ু সেনা বাহিনীক ব্যৱহাৰ কৰি ৭৫ টাতকৈও অধিক লক্ষ্যত আক্ৰমণ কৰা হৈছে। আমেৰিকাই চিৰিয়াত আইএছআইএছৰ বৰ্ধিত আধিপত্য বন্ধ কৰিবলৈ আক্ৰমণ অব্যাহত ৰাখিব।
জেনেৰেল মাইকেল এৰিক কুৰিলাই কৈছিল, ‘কোনো সন্দেহ থাকিব নালাগে যে আমি আইএছআইএছক পুনৰ গোট খাবলৈ আৰু ছিৰিয়াৰ সাম্প্ৰতিক পৰিস্থিতিৰ সুযোগ ল’বলৈ নিদিওঁ”।
“ছিৰিয়াৰ সকলো গোটে জানিব লাগে যে যদি তেওঁলোকে যিকোনো প্ৰকাৰে আইএছআইএছৰ সৈতে অংশীদাৰী বা সমৰ্থন কৰে, তেন্তে আমি তেওঁলোকক কঠোৰ সঁহাৰি দিম” বুলিও তেওঁ মন্তব্য কৰে।
ৰাষ্ট্ৰপতিয়ে দেশৰ পৰা পলায়ন কৰাৰ লগে লগে ছিৰিয়াৰ বিদ্ৰোহীসকলে আসাদৰ শাসনকালত কেইবা দশক ধৰি কাৰাগাৰত বন্দী হৈ থকা শ শ বন্দীক মুকলি কৰি দিয়ে। এই উৎসৱৰ পৰিৱেশত, কিছুমান লোকে তাত থকা দোকান বোৰো ভাঙি শেষ কৰি দিছে।
বিদ্ৰোহীসকলে কাৰ্ফিউ ঘোষণা কৰাৰ পূৰ্বেই চহৰখনৰ মানুহে অত্যাৱশ্যকীয় সামগ্ৰী লৈ গুচি গৈছিল। চিৰিয়াৰ বিভিন্ন স্থানত আসাদ আৰু তেওঁৰ পৰিয়ালৰ পোষ্টাৰ, বেনাৰৰ লগতে মূৰ্তিসমূহো ভাঙি পেলাইছে।
