বৰ্তমান সময়ত ফিলিপাইনছত ৰাষ্ট্ৰপতি আৰু উপ-ৰাষ্ট্ৰপতিৰ মাজত এক অদ্ভুত পৰিস্থিতিৰ সৃষ্টি হৈছে । ইয়াত উপ-ৰাষ্ট্ৰপতি চাৰা ডুটেৰ্টেই ৰাষ্ট্ৰপতি ফাৰ্ডিনাণ্ড মাৰ্কছ জুনিয়ৰক এজন অযোগ্য ৰাষ্ট্ৰপতি আৰু মিছা কথা কোৱাৰ অভিযোগ উত্থাপন কৰিছে । কেৱল এয়াই নহয়, তেওঁ এজন হত্যাকাৰীক ৰাষ্ট্ৰপতি ফাৰ্ডিনাণ্ড মাৰ্কছ জুনিয়ৰ, তেওঁৰ পত্নী লিজা আৰানেটা-মাৰ্কছ আৰু প্ৰতিনিধি সদনৰ অধ্যক্ষ মাৰ্টিন ৰমুৱাল্ডেজক হত্যা কৰাৰ চুপাৰীও দিছে বুলি উল্লেখ কৰিছে ।
ডুটেৰ্টেই মুকলিকৈ কৈছে যে তেওঁ হত্যাকাৰীক কৈছে যে যদি তেওঁক (ডুটেৰ্টক) হত্যা কৰা হয়, তেন্তে এই তিনিজনক হত্যা নকৰালৈকে তেওঁ ৰৈ নাথাকিব । ডুটেৰ্টেই এই ভাবুকিক সহজভাৱে ল’ব নালাগে বুলি সকীয়াই দি কয় যে তেওঁ ধেমালি কৰা নাই ।
এতিয়া কি হ’ব ?
ভাৰপ্ৰাপ্ত সচিব লুকাছ বেৰছামিনে মাৰ্কছক দিয়া ভাবুকিৰ বিৰুদ্ধে “তাৎক্ষণিক উপযুক্ত ব্যৱস্থা” গ্ৰহণৰ বাবে ৰাষ্ট্ৰপতিৰ প্ৰহৰী বাহিনীলৈ এই বিষয়টো প্ৰেৰণ কৰে । অৱশ্যে উপ-ৰাষ্ট্ৰপতিগৰাকীৰ বিৰুদ্ধে কি ব্যৱস্থা গ্ৰহণ কৰা হ’ব সেয়া এতিয়াও স্পষ্ট হোৱা নাই । এই ভাবুকিৰ প্ৰতি লক্ষ্য ৰাখি ৰাষ্ট্ৰপতি নিৰাপত্তা কমাণ্ডে ৰাষ্ট্ৰপতি মাৰ্কছৰ নিৰাপত্তা বৃদ্ধি কৰিছে ।
নিৰাপত্তাৰ সৈতে জড়িত ডাঙৰ বিষয়-
উপ-ৰাষ্ট্ৰপতিৰ এই মুকলিকৈ আৰু নিৰ্লজ্জ দিয়া ভাবুকিক তেওঁ ৰাষ্ট্ৰীয় নিৰাপত্তাৰ সৈতে জড়িত বিষয় হিচাপে গণ্য কৰে বুলি কৈছে বৰছামিনে । ৰাষ্ট্ৰপতিৰ নিৰাপত্তা কমাণ্ডে কয় যে তেওঁলোকে “ৰাষ্ট্ৰপতি আৰু তেওঁৰ পৰিয়ালৰ প্ৰতি যিকোনো ভাবুকি ধৰা পেলাবলৈ, বাধা দিবলৈ আৰু ৰক্ষা কৰিবলৈ আইন প্ৰয়োগকাৰী সংস্থাসমূহৰ সৈতে সমন্বয় সাধন কৰি আছে ।”
একেলগে প্ৰচাৰ চলাইছিল-
আচৰিত কথাটো হ’ল যে উপ-ৰাষ্ট্ৰপতি ডুটেৰ্টেই ৰাষ্ট্ৰপতি মাৰ্কছৰ ওপৰত খং কৰি তেওঁক হত্যা কৰিব বিচাৰিলেও ২০২২ চনৰ মে’ মাহত দুয়োজনে একেলগে ৰাষ্ট্ৰপতি আৰু উপ-ৰাষ্ট্ৰপতি পদৰ বাবে নিৰ্বাচনত অৱতীৰ্ণ হৈছিল । আনকি এই দুয়োজন নেতাৰ প্ৰচাৰ অভিযানো জাতীয় ঐক্যৰ আহ্বানৰ ওপৰত কেন্দ্ৰিত আছিল, যাৰ বাবে তেওঁলোকে ডাঙৰ জয় সাব্যস্ত কৰিছিল ।
নিজৰ সুৰক্ষাৰ প্ৰশ্ন-
স্পষ্টভাৱে ৰাষ্ট্ৰপতিক হত্যাৰ চুপাৰী দিয়া ডুটেৰ্টৰ নিজৰ নিৰাপত্তাও বিপদত পৰিছে । সংবাদমেলত এই সন্দৰ্ভত এটা প্ৰশ্ন সোধাত তেওঁ কয়, ‘মোৰ সুৰক্ষাৰ বাবে চিন্তা নকৰিব, কাৰণ মই কাৰোবাৰ লগত কথা পাতিছো । মই কৈছো যে যদি মোক হত্যা কৰা হয় তেন্তে আপুনি বি বি এম, লিজা আৰু ৰোমুৱাল্ডেজক ৰেহাই নিদিব । এই কথাটো সহজভাৱে ল’ব নালাগে, এইটো কোনো ধেমালি নহয় ।”
