কালমাইগীৰ বিধ্বংসী ৰূপ

ফিলিপাইনছত শক্তিশালী ধুমুহা কালমাইগীয়ে বিধ্বংসী ৰূপ ধাৰণ কৰিছে । এই ধ্বংসলীলাত এতিয়ালৈকে ৫২ জন লোকৰ মৃত্যু হোৱাৰ বিপৰীতে ১৩ জন নিৰুদ্দেশ হৈছে । এই কাল ধুমুহাই আটাইতকৈ বেছি ক্ষতিসাধন কৰিছে চেবু প্ৰদেশত, যিখন প্ৰদেশ শেহতীয়াকৈ বিধ্বংসী ভূমিকম্পৰ ধ্বংসলীলাৰ পৰা উদ্ধাৰৰ বাবে চেষ্টা চলাই আছিল । জানিব পৰা মতে প্ৰচণ্ড বৰষুণ আৰু বানপানীৰ ফলত বহু লোক ঘৰৰ ছাদত আবদ্ধ হৈ পৰিছে । ৰেড ক্ৰছে সহায়ৰ বাবে শ শ আহ্বান লাভ কৰিছে ।

উদ্ধাৰৰ বাবে প্ৰয়োজনীয় সকলো প্ৰস্তুতি চলোৱা হৈছিল যদিও হঠাতে অহা বানে এই প্ৰচেষ্টাত বাধা প্ৰদান কৰে বুলি প্ৰশাসনে জনায় । দীৰ্ঘম্যাদী খনন আৰু দুৰ্বল বান নিয়ন্ত্ৰণ প্ৰকল্পই পৰিস্থিতি আৰু বেয়া কৰি তোলা বুলিও স্বীকাৰ কৰে প্ৰশাসনে ।

ইফালে কালমাইগী ক্ষতিগ্ৰস্ত অঞ্চললৈ সাহায্য সামগ্ৰী কঢ়িয়াই অনা ফিলিপাইনছৰ বায়ুসেনাৰ এখন হেলিকপ্টাৰ আগুছান ডেল ছুৰ প্ৰদেশত দুৰ্ঘটনাগ্ৰস্ত হোৱাৰ ফলত ৬ জন জোৱান নিহত হয় । দক্ষিণ আগুছান ডেল ছুৰ প্ৰদেশৰ লৰেটো চহৰৰ ওচৰত দুৰ্ঘটনাগ্ৰস্ত হয় ছুপাৰ হুই হেলিকপ্টাৰখন । ইষ্টাৰ্ণ মিন্দানাও মিলিটাৰী কমাণ্ডে প্ৰাৰম্ভিক বিবৃতিত কয় যে কালমাইগী ক্ষতিগ্ৰস্ত প্ৰদেশসমূহত মানৱীয় সাহায্য প্ৰদানৰ বাবে নিয়োজিত হেলিকপ্টাৰখনত থকা বায়ুসেনাৰ জোৱানসকলক বিচাৰি উলিয়াবলৈ প্ৰচেষ্টা চলোৱা হৈছে । প্ৰকাশিত এক প্ৰতিবেদন অনুসৰি এই দুৰ্ঘটনাত হেলিকপ্টাৰখনত থকা ৬ জন জোৱানৰ মৃত্যু হৈছে ।

আনহাতে চেবুত নদী উফন্দি উঠিছে । বহু অঞ্চল প্লাৱিত হৈ ঘৰ-বাৰী বুৰাই পেলাইছে । ক্ষিপ্ৰতাৰে কৰ্তৃপক্ষই প্ৰদেশখনক ৰাজ্যিক দুৰ্যোগ পিড়ীত অঞ্চল হিচাপে ঘোষণা কৰিছে । ইতিমধ্যে ভূমিকম্পৰ ফলত স্থানচ্যুত হোৱা হাজাৰ হাজাৰ লোকক আশ্ৰয় শিবিৰলৈ স্থানান্তৰিত কৰা হৈছে, যাৰ ফলত বহু লোকৰ প্ৰাণ ৰক্ষা পৰিছে । চেবুৰ গৱৰ্ণৰে দুৰ্বল নিৰ্মাণৰ ওপৰত প্ৰশ্ন উত্থাপন কৰি বান নিয়ন্ত্ৰণ প্ৰকল্পৰ তদন্তৰ আহ্বান জনাইছে আৰু জীৱন হেৰুৱাৰ বাবে দায়ীসকলক জবাবদিহি কৰিবলৈ আহ্বান জনাইছে ।

বুধবাৰে পালাৱান দ্বীপৰ উপকূলীয় অঞ্চলৰ ওপৰেৰে কালমাইগী ধুমুহা ঘণ্টাত ১২০ কিলোমিটাৰ পৰ্যন্ত বেগেৰে পাৰ হয় । বতৰ বিজ্ঞান বিভাগৰ তথ্য অনুসৰি দক্ষিণ চীন সাগৰৰ দিশে গতি কৰিছে এই ধুমুহাই । কালমাইগীৰ বাবে এই পৰ্যন্ত ৩,৮৭,০০০ৰো অধিক লোকক নিৰাপদ স্থানলৈ স্থানান্তৰ কৰা হৈছে, আনহাতে ১৮৬খন বিমান বাতিল কৰা হৈছে । বন্দৰত আবদ্ধ হৈ আছে প্ৰায় ৩৫০০ যাত্ৰী আৰু ট্ৰাক চালক । ফিলিপাইনছ প্ৰতি বছৰে প্ৰায় ২০টা ধুমুহা আৰু কেইবাটাও ভূমিকম্পৰ সন্মুখীন হয় । ইয়াৰ উপৰিও ইয়াত কেইবা ডজনো সক্ৰিয় আগ্নেয়গিৰি আছে, যাৰ ফলত ই বিশ্বৰ অন্যতম দুৰ্যোগপ্ৰৱণ দেশ ।

লগতে পঢ়ক : পুনৰ মাজ আকাশত ভয়ংকৰ বিমান দুৰ্ঘটনা; ধ্বংসস্তূপত পৰিণত এটা বৃহৎ অঞ্চল