নিশা প্ৰায় ১০ বজাত অগ্নিকাণ্ড সংঘটিত হয় আৰু প্ৰায় চাৰি ঘণ্টা ধৰি এই জুই জ্বলি থাকে । এই ঘটনাত প্ৰায় ১০০০ ঘৰ সম্পূৰ্ণৰূপে ধ্বংস হয় ।
দক্ষিণ ফিলিপাইনছৰ এটা সৰু দ্বীপত সংঘটিত হোৱা এক বৃহৎ অগ্নিকাণ্ডৰ ফলত হাজাৰ হাজাৰ লোক গৃহহীন হৈ পৰিছে । প্ৰকাশিত খবৰ অনুসৰি বাৰাংগাই লামিয়ানত নিশা প্ৰায় ১০ বজাত অগ্নিকাণ্ড সংঘটিত হয় আৰু প্ৰায় চাৰি ঘণ্টা ধৰি এই জুই জ্বলি থাকে । এই ঘটনাত প্ৰায় ১০০০ ঘৰ সম্পূৰ্ণৰূপে ধ্বংস হয় । প্ৰচণ্ড বতাহৰ ফলত জুই দ্ৰুতগতিত বিয়পি পৰে আৰু ঘন জনবসতিপূৰ্ণ অঞ্চলটো আগুৰি ধৰে ।
সমগ্ৰ অঞ্চলটোত এই অগ্নিকাণ্ডই বিধ্বংসী ৰূপ ধাৰণ কৰে । জানিব পৰা মতে এই ঘটনাৰ পিছত ৫ হাজাৰৰো অধিক লোকক স্থল আৰু সাগৰীয় পথেৰে উলিয়াই অনা হয় আৰু বৰ্তমান তেওঁলোকক অস্থায়ীভাৱে দুটা সাহায্য শিবিৰত ৰখা হৈছে ।
বুধবাৰে স্থানীয় প্ৰশাসনে প্ৰাদেশিক চৰকাৰৰ সহযোগত প্ৰাথমিক সাহায্য অভিযান আৰম্ভ কৰে । গ্ৰাম্য স্বাস্থ্য ইউনিটৰ স্বাস্থ্যকৰ্মীসকলকো মোতায়েন কৰি ভুক্তভোগী লোকসকলৰ চিকিৎসা আৰু চিকিৎসাৰ প্ৰয়োজনীয়তা পূৰণৰ বাবে নিয়োগ কৰা হয় ।
প্ৰশাসনে প্ৰকাশ কৰা অনুসৰি এই ঘটনাত কোনো লোকৰ মৃত্যু হোৱা নাই যদিও কেইবাখনো ফুটব্ৰিজৰ ক্ষতিসাধন হোৱাৰ ফলত অগ্নিনিৰ্বাপন আৰু উদ্ধাৰ অভিযানত বাধাৰ সৃষ্টি হৈছে । অগ্নিনিৰ্বাপক বাহিনীয়ে নিশ্চিত কৰে যে প্ৰায় ২ বজাত জুই নিয়ন্ত্ৰণলৈ আহে । কৰ্তৃপক্ষই অগ্নিকাণ্ডৰ কাৰণৰ তদন্ত আৰম্ভ কৰি সা-সম্পত্তিৰ মুঠ ক্ষতিৰ মূল্যায়ন কৰি আছে ।
লগতে পঢ়ক : স্পেইন আৰু গ্ৰীচ চৰকাৰৰ ডাঙৰ সিদ্ধান্ত; ১৬ বছৰৰ তলৰ যুৱক-যুৱতীৰ বাবে নিষিদ্ধ হ’ব ছ’চিয়েল মিডিয়া
