চণ্ডীগড়ৰ মুলনপুৰৰ মহাৰাজা যাদবীন্দ্ৰ সিং আন্তঃৰাষ্ট্ৰীয় ক্ৰিকেট ষ্টেডিয়ামত পঞ্জাব কিংছ (পি বি কে এছ) আৰু ৰাজস্থান ৰয়েলছ (আৰ আৰ)ৰ মাজত অনুষ্ঠিত হয় চলিত আই পি এলৰ ১৮ সংখ্যক মেচ । এই মেচত ৰাজস্থান দলে পঞ্জাবক ৫০ ৰানত পৰাস্ত কৰে । প্ৰথমে বেটিং কৰি ৰাজস্থানে পঞ্জাৱৰ সন্মুখত ২০৬ ৰানৰ লক্ষ্য নিৰ্ধাৰণ কৰিছিল । ইয়াৰ প্ৰত্যুত্তৰত পঞ্জাৱে দুৰ্বল আৰম্ভণিৰে ২০ অভাৰত ৯টা উইকেট হেৰুৱাই মাত্ৰ ১৫৫ ৰানহে কৰিবলৈ সক্ষম হয় ।
পঞ্জাৱৰ ইনিংছ-
২০৬ ৰানৰ লক্ষ্যৰ প্ৰত্যুত্তৰত পঞ্জাৱৰ আৰম্ভণি অতি দুৰ্বল আছিল । প্ৰথম অভাৰতে জফ্ৰা আৰ্চাৰে প্ৰিয়ংশ আৰিয়া আৰু অধিনায়ক শ্ৰেয়াছ আয়াৰক পেভিলিয়নলৈ প্ৰেৰণ কৰে । ইয়াৰ পিছত মাৰ্কাছ ষ্টয়নিছো চতুৰ্থ অভাৰত আউট হয় । তেওঁৰ বেটৰ পৰা মাত্ৰ এটা ৰানহে আহে । কাৰ্তিকেয়াই ৭ম অভাৰত প্ৰভসীমৰণক নিজৰ চিকাৰ কৰে ।
ইয়াৰ পিছত গ্লেন মেক্সৱেল আৰু নেহাল বাধেৰাই এক উজ্জ্বল অংশীদাৰিত্ব গঢ়ে । নেহালে ৬২ ৰানৰ ইনিংছ খেলে । মেক্সৱেলে ৩০ ৰান সংগ্ৰহ কৰে । কিন্তু দুয়োজনেই অগা-পিছাকৈ আউট হয় । ইয়াৰ পিছত পঞ্জাৱৰ এজনো বেটছমেন ক্ৰীজত অধিক সময় তিষ্ঠিবলৈ সক্ষম নহ’ল আৰু পঞ্জাবে ২০ অভাৰত মাত্ৰ ১৫৫ ৰানহে সংগ্ৰহ কৰে । এই পৰাজয়ৰ পিছত পঞ্জাৱৰ বিজয়ৰথ স্তব্ধ হৈ পৰে ।
ৰাজস্থানৰ হৈ জফ্ৰা আৰ্চাৰে সৰ্বাধিক ৩টা উইকেট দখল কৰে । সন্দীপ শৰ্মা আৰু মহীশ তীক্ষনাই ২টা, কুমাৰ কাৰ্তিকেয়া আৰু ৱানিন্দু হাছাৰাংগাই ১টাকৈ উইকেট দখল কৰে ।
ৰাজস্থানৰ ইনিংছ-
প্ৰথমে বেটিং কৰিবলৈ অহা ৰাজস্থানৰ আৰম্ভণি ভাল আছিল । সঞ্জু চেমচন আৰু যশস্বী জয়ছোৱাল দুয়োকে ভাল ছন্দত দেখা গৈছিল । দুয়োজনে ভাল আৰম্ভণি কৰে । ৰাজস্থানে ৮৯ ৰান সংগ্ৰহ কৰি প্ৰথমটো আঘাত লাভ কৰে যেতিয়া চেমচন ৩৮ ৰান সংগ্ৰহ কৰি আউট হয় । অৱশ্যে আনটো মূৰত যশস্বী জয়ছোৱালক আগ্ৰাসী ৰূপত দেখা যায় । ৬৭ ৰান সংগ্ৰহ কৰি আউট হয় যশস্বী । ইয়াৰ পিছত ৰিয়ান পৰাগ আৰু শ্বিমৰন হেটমায়াৰে ইনিংছৰ দায়িত্ব লয় । দুয়োজনে কিছু উজ্জ্বল শ্বট খেলে, যাৰ বাবে ৰাজস্থান দলে ২০ অভাৰত ৪ উইকেট হেৰুৱাই ২০৫ ৰান সংগ্ৰহ কৰে ।
