যুঁজখন গুজৰাট টাইটানছ আৰু ৰাজস্থান ৰয়েলছৰ মাজত হ’ব যদিও, বিশেষজ্ঞসকলৰ মতে আচল যুঁজখন হ’ব গুজৰাটৰ শক্তিশালী বলাৰ বাহিনী আৰু ৰাজস্থানৰ বৈভৱ সূৰ্যবংশীৰ মাজত

 আজি নিউ চণ্ডীগড়ৰ ষ্টেডিয়ামত অনুষ্ঠিত হ’বলগীয়া আই পি এলৰ দ্বিতীয় কোৱালিফায়াৰ মেচখনক লৈ ক্ৰিকেট প্ৰেমীসকলৰ মাজত ব্যাপক উত্তেজনা বিৰাজ কৰিছে । কাগজ-কলমত এই যুঁজখন গুজৰাট টাইটানছ (GT) আৰু ৰাজস্থান ৰয়েলছ (RR)ৰ মাজত হ’ব যদিও, বিশেষজ্ঞসকলৰ মতে আচল যুঁজখন হ’ব গুজৰাটৰ শক্তিশালী বলাৰ বাহিনী আৰু ৰাজস্থানৰ ‘ৱণ্ডাৰ কিড’ বৈভৱ সূৰ্যবংশীৰ মাজত ।

‘বেবী বছ’ৰ ভয়ংকৰ ফৰ্ম :

১৫ বছৰীয়া বৈভৱ সূৰ্যবংশীয়ে এই ছিজনত নিজৰ বেটিঙেৰে ক্ৰিকেট বিশ্বক আচৰিত কৰি তুলিছে । এলিমেটৰত ছানৰাইজাৰ্ছ হায়দৰাবাদৰ বিৰুদ্ধে ২৯ বলত ৯৭ ৰানৰ বিস্ফোৰক ইনিংছ খেলি তেওঁ প্ৰমাণ কৰিছে যে তেওঁ কেৱল এজন উদীয়মান খেলুৱৈ নহয়, তেওঁ বিপক্ষৰ বাবে এক আতংক । পেট কামিন্সৰ দৰে বিশ্বমানৰ বলাৰৰ বিৰুদ্ধেও তেওঁৰ নিৰ্ভীক বেটিঙে দৰ্শকক মন্ত্ৰমুগ্ধ কৰিছে ।

পৰিসংখ্যাই কয় কাহিনী :

এই ছিজনত বৈভৱে ২৪২.৮৫ ষ্ট্ৰাইক ৰেটত ৬৮০ ৰান সংগ্ৰহ কৰিছে আৰু ৬৫টা আকাশলংঘী ছয় কোবাইছে । তেওঁৰ বেটিঙত বীৰেন্দ্ৰ ছেহৱাগৰ নিৰ্ভীকতা, এ বি ডিভিলিয়াৰ্ছৰ কল্পনা আৰু ব্ৰায়ান লৰাৰ স্বাধীনতাৰ এক বিৰল সংমিশ্ৰণ দেখা গৈছে । যশপ্ৰীত বুমৰাহৰ পৰা আৰম্ভ কৰি কাগিছো ৰাবাডালৈ— সকলো ডাঙৰ বলাৰেই এতিয়া বৈভৱৰ সন্মুখত অসহায় যেন লাগিছে ।

গুজৰাটৰ আক্ৰমণ বনাম বৈভৱ :

আনফালে, গুজৰাট টাইটানছৰ বলাৰ বাহিনী অতি শক্তিশালী । মহম্মদ ছিৰাজৰ ছুইং, কাগিছো ৰাবাডাৰ গতি, জেছন হোল্ডাৰৰ অতিৰিক্ত বাউন্স আৰু ৰছিদ খানৰ স্পীন মেজিক যিকোনো বেটিং লাইনআপৰ বাবে ভাবুকি । কিন্তু ছিৰাজ বা ৰাবাডাৰ বিৰুদ্ধেও ইতিমধ্যে বৈভৱে নিজৰ সাহস প্ৰদৰ্শন কৰিছে । এতিয়া প্ৰশ্ন উঠিছে— গুজৰাটে বৈভৱৰ এই মানসিকতাক ৰখাব পাৰিবনে ?

ফাইনেলৰ টিকটৰ যুঁজ :

ৰাজস্থান ৰয়েলছৰ সমগ্ৰ বেটিং লাইনআপ শুভমন গীল, চাই সুদৰ্শন আৰু জছ বাটলাৰৰ দৰে তাৰকাৰ ওপৰত নিৰ্ভৰশীল । যদি বৈভৱ আজিৰ মেচত চলি যায়, তেন্তে ৰাজস্থানৰ তৃতীয়বাৰৰ বাবে ফাইনেলত প্ৰৱেশ কৰাটো প্ৰায় নিশ্চিত হৈ পৰিব । নিউ চণ্ডীগড়ৰ প্ৰচণ্ড গৰমৰ মাজত ষ্টেডিয়ামত উপস্থিত থকা হাজাৰ হাজাৰ দৰ্শকে আজি ক্ৰিকেটৰ ইতিহাসৰ এক নতুন অধ্যায় দেখা পোৱাৰ আশা ৰাখিছে ।

আজিৰ এই হাই-ভল্টেজ মেচখনত কেৱল দল দুটাই নহয়, বৰঞ্চ এখন নতুন ক্ৰিকেটৰ যুগৰ আৰম্ভণিও পৰীক্ষিত হ’ব— য’ত ৩০০ ৰানৰ লক্ষ্যও এতিয়া দূৰৈত যেন নালাগে ।

লগতে পঢ়ক : ‘নিউ ছিক্স মেচিন’ বৈভৱ সূৰ্যবংশীক প্ৰশংসা ক্ৰিছ গেইলৰ

ৰাজস্থানৰ এই ঐতিহাসিক জয়ৰ আটাইতকৈ ডাঙৰ নায়ক আছিল ১৫ বছৰীয়া যুৱ বেটছমেন বৈভৱ সূৰ্যবংশী

ইণ্ডিয়ান প্ৰিমিয়াৰ লীগ ২০২৬-ৰ প্লে-অফত এক দৰ্শনীয় মেচ দেখিবলৈ পোৱা গ’ল । এলিমিনেটৰ মেচখনত ছানৰাইজাৰ্ছ হায়দৰাবাদাক ৪৭ ৰানত পৰাস্ত কৰি ধমাকাদাৰ শৈলীত কোৱালিফায়াৰ-২ত প্ৰৱেশ কৰিছে ৰাজস্থান ৰয়েলছে । ৰাজস্থানৰ এই জয়ে কেৱল ফাইনেলৰ আশা সজীৱ কৰাই নহয়, বৰঞ্চ গুজৰাট টাইটানছৰ বাবেও এক প্ৰকাৰৰ বিপদৰ ঘণ্টা বজাই দিছে । কিয়নো পৰৱৰ্তী কোৱালিফায়াৰ-২ মেচখনো মুল্লনৰপুৰৰ (নিউ চণ্ডীগড়) এই একেখন খেলপথাৰতে অনুষ্ঠিত হ’ব, য’ত ৰাজস্থানে ইতিমধ্যে পৰিস্থিতি সম্পূৰ্ণৰূপে আয়ত্ত কৰি লৈছে ।

শুকুৰবাৰে (২৯ মে’) হ’বলগীয়া এই গুৰুত্বপূৰ্ণ কোৱালিফায়াৰ-২ মেচত ৰাজস্থান ৰয়েলছ মুখামুখি হ’ব গুজৰাট টাইটানছৰ । এই মেচৰ বিজয়ী দলে অহা ৩১ মে’ত অনুষ্ঠিত হ’বলগীয়া মহা-ফাইনেলত ৰয়েল চেলেঞ্জাৰ্ছ বেংগালুৰুৰ বিৰুদ্ধে খিতাপ যুঁজত অৱতীৰ্ণ হ’ব । ক্ৰিকেট অনুৰাগীসকলে আশা কৰিছে যে ধাৰাবাহিকভাৱে একপক্ষীয় হৈ থকা প্লে-অফৰ মেচসমূহৰ পিছত এইবাৰ কোৱালিফায়াৰ-২ত এক তীব্ৰ প্ৰতিদ্বন্দিতা দেখিবলৈ পোৱা যাব ।

বৈভৱ সূৰ্যবংশীৰ ঐতিহাসিক ইনিংছ : লক্ষ্য কেৱল ট্ৰফী

ৰাজস্থানৰ এই ঐতিহাসিক জয়ৰ আটাইতকৈ ডাঙৰ নায়ক আছিল ১৫ বছৰীয়া যুৱ বেটছমেন বৈভৱ সূৰ্যবংশী । তেওঁ মাত্ৰ ২৯ টা বলত ১২ টা আকৰ্ষণীয় ছিক্সাৰ আৰু ৫ টা বাউণ্ডাৰীৰ সহায়ত ৯৭ ৰানৰ এক বিস্ফোৰক ইনিংছ খেলি মেচৰ গতিপথ সম্পূৰ্ণ সলনি কৰি দিয়ে । মেচৰ অন্তত তেওঁক ‘প্লেয়াৰ অব্ দ্য মেচ’ হিচাপে নিৰ্বাচিত কৰা হয় । ইয়াৰ লগতে তেওঁ ক্ৰিছ গেইলৰ ১৪ বছৰ পুৰণি এক ছিজনত সৰ্বাধিক ছিক্সাৰ কোবোৱাৰ ৰেকৰ্ডো (৬৫ টা ছিক্সাৰ) ভংগ কৰে ।

He's always aiming for the stars 💫

Relive his record-breaking six ▶️ https://t.co/7D6JymqfsM#TATAIPL | #Eliminator | #TheFinalLeap | #SRHvRR | @rajasthanroyals pic.twitter.com/8YODkB5QJy

— IndianPremierLeague (@IPL) May 27, 2026

অৱশ্যে মাত্ৰ ৩ ৰানৰ বাবে IPL ইতিহাসৰ আটাইতকৈ দ্ৰুততম শতকৰ পৰা বঞ্চিত হোৱাৰ পিছতো বৈভৱৰ লক্ষ্য ৰেকৰ্ডৰ ওপৰত নহয়, বৰঞ্চ দলক ট্ৰফী জয় কৰোৱাৰ ওপৰতহে আছে । মেচৰ পিছত তেওঁ কয় :

“মই আউট হোৱাৰ পিছতহে এই ৰেকৰ্ডৰ বিষয়ে জানিব পাৰিছিলোঁ । মোৰ সম্পূৰ্ণ মনোযোগ কেৱল দলৰ বাবে সৰ্বাধিক ৰান সংগ্ৰহ কৰাৰ ওপৰত আছিল । শতক ভৱিষ্যতেও হ’ব, কিন্তু এই মুহূৰ্তত আটাইতকৈ গুৰুত্বপূৰ্ণ কথাটো হ’ল IPL ট্ৰফী জয় কৰা ।”

নিজৰ মানসিক দৃষ্টিভংগীৰ সন্দৰ্ভত যুৱ খেলুৱৈগৰাকীয়ে স্পষ্ট কৰে যে তেওঁ বেছি চিন্তা কৰাত বিশ্বাস নকৰে আৰু কেৱল চলিত মেচ আৰু পৰিস্থিতিৰ ওপৰতহে গুৰুত্ব দিয়ে । মেচৰ পূৰ্বে তেওঁ প্ৰতিপক্ষৰ বলাৰ, উইকেট আৰু বাউণ্ডাৰীৰ ওপৰত কৰা গৱেষণাই তেওঁক ইতিবাচক ক্ৰিকটে খেলিবলৈ সহায় কৰে, যাৰ ফলত চাপটো বলাৰসকলৰ ওপৰলৈ গুচি যায় ।

সুন্দৰ ফৰ্মত ৰাজস্থান: চিন্তাত গুজৰাট

ৰাজস্থান ৰয়েলছৰ বাবে আটাইতকৈ ডাঙৰ সকাহৰ কথাটো হ’ল দলটোৰ প্ৰতিগৰাকী মূল খেলুৱৈ বৰ্তমান সুন্দৰ ফৰ্মত আছে । বেটিং লাইন-আপত বৈভৱ সূৰ্যবংশীৰ উপৰিও ধ্ৰুৱ জুৰেল আৰু যশস্বী জয়ছোৱালে উন্নত প্ৰদৰ্শন দাঙি ধৰিছে । আনহাতে, বলিং বিভাগত জোফ্ৰা আৰ্চাৰৰ তীব্ৰ গতিয়ে প্ৰতিপক্ষৰ বাবে ধাৰাবাহিকভাৱে ত্ৰাসৰ সৃষ্টি কৰিছে । হায়দৰাবাদৰ বিৰুদ্ধেও আৰ্চাৰে পাৱাৰপ্লে’তে ৩ টা গুৰুত্বপূৰ্ণ উইকেট দখল কৰি মেচখন একপ্ৰকাৰ থিতাতে নিস্তেজ কৰি দিছিল ।

লগতে পঢ়ক : ‘নিউ ছিক্স মেচিন’ বৈভৱ সূৰ্যবংশীক প্ৰশংসা ক্ৰিছ গেইলৰ

বৈভৱ সূৰ্যবংশীৰ বিধ্বংসী বেটিং আৰু জ’ফ্ৰা আৰ্চাৰৰ ঘাটক বলিংৰ সহায়ত ৰাজস্থানে এই বৃহৎ জয় সাব্যস্ত কৰে

বুধবাৰে অনুষ্ঠিত হোৱা আইপিএলৰ এক ৰোমাঞ্চকৰ এলিমিনেটৰ মুখামুখিত ৰাজস্থান ৰয়েলছে ছানৰাইজাৰ্ছ হায়দৰাবাদাক ৪৭ ৰানৰ ব্যৱধানত পৰাস্ত কৰে । বৈভৱ সূৰ্যবংশীৰ বিধ্বংসী বেটিং আৰু জ’ফ্ৰা আৰ্চাৰৰ ঘাটক বলিংৰ সহায়ত ৰাজস্থানে এই বৃহৎ জয় সাব্যস্ত কৰে । এই পৰাজয়ৰ সৈতে ছানৰাইজাৰ্ছ হায়দৰাবাদৰ চলিত ছিজনৰ যাত্ৰা ইমানতে অন্ত পৰিল আৰু দলটো আইপিএলৰ পৰা বাহিৰ হৈ যায় ।

আনহাতে, জয়ী হোৱা ৰাজস্থান ৰয়েলছৰ দলটোৱে এতিয়া ২৯ মে’ত কোৱালিফায়াৰ ২ মেচত গুজৰাট টাইটানছৰ বিৰুদ্ধে মুল্লনপুৰতে অৱতীৰ্ণ হ’ব । উল্লেখ্য যে, গুজৰাট টাইটানছে পূৰ্বৰ মেচত ৰয়েল চেলেঞ্জাৰ্ছ বেংগালুৰুৰ হাতত পৰাজয় বৰণ কৰিছিল । যিটো দলেই ২৯ মে’ৰ কোৱালিফায়াৰ ২ মেচখনত জয়লাভ কৰিব, সেই দলটোৱে ৩১ মে’ত আহমেদাবাদৰ নৰেন্দ্ৰ মোদী ষ্টেডিয়ামত ৰয়েল চেলেঞ্জাৰ্ছ বেংগালুৰুৰ বিৰুদ্ধে ফাইনেল খেলি খেলিব ।

মেচখনত ৰাজস্থান ৰয়েলছে প্ৰথমে বেটিং কৰিবলৈ নামি নিৰ্ধাৰিত ২০ অভাৰত ৮ টা উইকেট হেৰুৱাই ২৪৩ ৰানৰ এক বিশাল স্ক’ৰ সংগ্ৰহ কৰে । প্ৰত্যুত্তৰত ২৪৪ ৰানৰ এক বিশাল লক্ষ্য আগত লৈ খেলিবলৈ নামি ছানৰাইজাৰ্ছ হায়দৰাবাদৰ দলটো ১৯.২ অভাৰত ১৯৬ ৰানতে অলআউট হয় ।

ৰাজস্থানৰ ইনিংছ-

ৰাজস্থানৰ ইনিংছৰ মূল আকৰ্ষণ আছিল যুৱ বেটছমেন বৈভৱ সূৰ্যবংশীৰ চমৎকাৰ বেটিং । বৈভৱে অতি আক্ৰমণাত্মক শৈলীৰে আৰম্ভণি কৰি মাত্ৰ ২৯ টা বলত ৯৭ ৰানৰ এক অনবদ্য ইনিংছ খেলে । তেওঁৰ এই ইনিংছটোত আছিল ৫ টা চাৰি আৰু ১২ টা আকাশলংঘী ছয় । এই ইনিংছৰ জৰিয়তে তেওঁ ক্ৰিছ গেইলৰ এটা ছিজনত সৰ্বাধিক ৫৯ টা ছয় কোবোৱাৰ অভিলেখো ভংগ কৰে ।

পেট কামিন্সে কৰা ইনিংছৰ তৃতীয়টো অভাৰত বৈভৱে ৩ টা ছয় আৰু ১ টা চাৰিৰে মুঠ ২৫ ৰান সংগ্ৰহ কৰে । অৱশ্যে তেওঁ মাত্ৰ ৩ ৰানৰ বাবে ক্ৰিছ গেইলৰ দ্ৰুততম টি-২০ শতকৰ অভিলেখ গঢ়াৰ পৰা বঞ্চিত হয় । বৈভৱক প্ৰফুল্ল হিঙে আউট কৰে । বৈভৱৰ উপৰিও যশস্বী জয়ছোৱালে ২৯ বলত ২৯ ৰান, ধ্ৰুৱ জুৰেলে ৫০ ৰান আৰু অধিনায়ক ৰিয়ান পৰাগে ২৬ ৰানৰ বৰঙণি যোগায় । ছানৰাইজাৰ্ছ হায়দৰাবাদৰ হৈ প্ৰফুল্ল হিঙে আটাইতকৈ সফল বলাৰ আছিল আৰু তেওঁ ৫৪ ৰান দি তিনিটা উইকেট লাভ কৰে ।

ছানৰাইজাৰ্ছৰ ইনিংছ-

আনহাতে, ২৪৪ ৰানৰ লক্ষ্য খেদিবলৈ নামি ছানৰাইজাৰ্ছ হায়দৰাবাদৰ আৰম্ভণিৰে পৰা বেটিং বিপৰ্যয় ঘটে । ৰাজস্থানৰ বেগী বলাৰ জ’ফ্ৰা আৰ্চাৰে নতুন বলেৰে ত্ৰাসৰ সৃষ্টি কৰি মাত্ৰ ৪.৪ অভাৰতে হায়দৰাবাদৰ ৫৭ ৰানত ৪ টা গুৰুত্বপূৰ্ণ উইকেট কাঢ়ি লয় । ইনিংছৰ দ্বিতীয়টো বলতে আৰ্চাৰে অভিষেক শৰ্মাক শূন্য ৰানতে ধ্ৰুৱ জুৰেলৰ হাতত কেচ দিয়াই প্ৰথমটো আঘাত হানে । ইয়াৰ পিছত স্মৰণ ৰবিচন্দ্ৰনো মাত্ৰ ১ ৰান কৰি নান্দ্ৰে বাৰ্গাৰৰ বলত আউট হয় । আনটো মূৰত ঈশান কিষাণে বিস্ফোৰক বেটিং কৰি মাত্ৰ ১১ টা বলত ৩ টা চাৰি আৰু ৩ টা ছয়েৰে ৩৩ ৰান সংগ্ৰহ কৰে যদিও ডনোভান ফেৰেইৰাই তেওঁৰ সুন্দৰ কেচ ধৰি আৰ্চাৰক তৃতীয়টো সফলতা প্ৰদান কৰে । ট্ৰেভিছ হেডেও কিছু আক্ৰমণাত্মক শ্বট খেলি ৮ টা বলত ১৭ ৰান কৰে যদিও আৰ্চাৰে তেওঁকো পেভিলিয়নৰ পথ দেখুৱায় ।

ইয়াৰ পিছত হেনৰিখ ক্লাচেন ১৮ ৰান কৰি নৱাগত যশৰাজ পুঞ্জাৰ স্পীনৰ জালত পৰে । নীতিশ ৰেড্ডীয়ে কিছু সময় যুঁজ দি ৩৮ ৰান কৰে যদিও ৰবীন্দ্ৰ জাডেজাৰ বলত দানুশ শানাকাক কেচ দি বিদায় লয় । ইয়াৰ ঠিক পিছতে হায়দৰাবাদৰ অধিনায়ক পেট কামিন্স মাত্ৰ ১ ৰান কৰি সুশান্ত মিশ্ৰৰ বলত আউট হয় । অৱশেষত শিৱাং কুমাৰে কিছু সংগ্ৰাম কৰে যদিও সেয়া দলক জিকাবলৈ পৰ্যাপ্ত নাছিল আৰু তেৱোঁ শেষৰজন বেটছমেন হিচাপে আউট হয় । ৰাজস্থান ৰয়েলছৰ হৈ জ’ফ্ৰা আৰ্চাৰে ৩ টা উইকেট লৈ হায়দৰাবাদৰ শীৰ্ষ ক্ৰম ধ্বংস কৰে । আনহাতে নান্দ্ৰে বাৰ্গাৰ, সুশান্ত মিশ্ৰ আৰু ৰবীন্দ্ৰ জাডেজাই সমানে ২ টাকৈ উইকেট লাভ কৰে ।

ৰাজস্থান ৰয়েলছৰ মূল একাদশ-

যশস্বী জয়ছোৱাল, বৈভৱ সূৰ্যবংশী, ধ্ৰুৱ জুৰেল, ৰিয়ান পৰাগ, ডনোভান ফেৰেইৰা, দাসুন শানাকা, ৰবীন্দ্ৰ জাডেজা, জ’ফ্ৰা আৰ্চাৰ, নান্দ্ৰে বাৰ্গাৰ, ব্ৰিতেশ শৰ্মা আৰু যশ ৰাজ পুঞ্জা ।

ছানৰাইজাৰ্ছ হায়দৰাবাদৰ মূল একাদশ-

অভিষেক শৰ্মা, ট্ৰেভিছ হেড, ঈশান কিষাণ, হেনৰিখ ক্লাচেন, স্মৰণ ৰবিচন্দ্ৰন, নীতিশ কুমাৰ ৰেড্ডী, পেট কামিন্স, শিৱাং কুমা, ইশান মালিংগা, সাকিৱ হুছেইন আৰু প্ৰফুল্ল হিঙে ।

লগতে পঢ়ক : ৰজত পাটিদাৰে সলনি কৰিলে আৰচিবিৰ ইতিহাস; আই পি এলত গঢ়িলে অভিলেখ

ৰাজস্থান ৰয়েলছ, পঞ্জাৱ কিংছ, কলকাতা নাইট ৰাইডাৰ্ছ আৰু চেন্নাই ছুপাৰ কিংছৰ সন্মুখত এতিয়াও প্লে-অফৰ পথ খোলা আছে

আই পি এল (IPL 2026) এতিয়া একেবাৰে শেষ পৰ্যায়ত উপনীত হৈছে । লীগ পৰ্যায়ত মাত্ৰ ৫খন খেল বাকী থকা অৱস্থাত চতুৰ্থ স্থানটো হস্তগত কৰিবলৈ এতিয়া ৪টা দলৰ মাজত যুদ্ধংদেহী পৰিৱেশৰ সৃষ্টি হৈছে । ৰাজস্থান ৰয়েলছ, পঞ্জাৱ কিংছ, কলকাতা নাইট ৰাইডাৰ্ছ আৰু চেন্নাই ছুপাৰ কিংছৰ সন্মুখত এতিয়াও প্লে-অফৰ পথ খোলা আছে । আনহাতে, দিল্লী কেপিটেলছৰ বাবে অংকটো গাণিতিকভাৱে জীয়াই থাকিলেও অতি দুৰ্বল নেট ৰান-ৰেটৰ (NRR) বাবে তেওঁলোকৰ আশা প্ৰায় নগণ্য ।

আহক চকু ফুৰাওঁ দলসমূহৰ সমীকৰণৰ ওপৰত :

ৰাজস্থান ৰয়েলছ (পইণ্ট : ১৪, খেল বাকী : ১ বনাম মুম্বাই)

ৰাজস্থানৰ ভাগ্য সম্পূৰ্ণৰূপে তেওঁলোকৰ নিজৰ হাতত আছে । দেওবাৰে মুম্বাই ইণ্ডিয়ানছক হৰুৱাব পাৰিলেই তেওঁলোকে ১৬ পইণ্টেৰে পোনপটীয়াকৈ প্লে-অফৰ টিকট পাব। আনকি গুজৰাট আৰু হায়দৰাবাদ হাৰিলে তেওঁলোকৰ শীৰ্ষ দুই স্থানলৈ যোৱাৰো সম্ভাৱনা আছে। কিন্তু যদি আৰ আৰ হাৰে, তেন্তে তেওঁলোকে আশা কৰিব লাগিব যাতে পঞ্জাৱ আৰু কলকাতা দুয়োটা দলেই নিজৰ খেলত পৰাজয়বৰণ কৰে।

পঞ্জাৱ কিংছ (পইণ্ট : ১৩, খেল বাকী : ১ বনাম লক্ষ্ণৌ)

একেৰাহে ৬খন খেলত হাৰিও পঞ্জাৱৰ আশা এতিয়াও জীয়াই আছে । শনিবাৰে লক্ষ্ণৌৰ বিৰুদ্ধে তেওঁলোকে জয়লাভ কৰিব লাগিব আৰু দেওবাৰে ৰাজস্থান হাৰিব লাগিব । পঞ্জাৱৰ নেট ৰান-ৰেট (+০.২২৭) বহুত ভাল হোৱা বাবে তেওঁলোক এক সুবিধাজনক স্থিতিত আছে ।

কলকাতা নাইট ৰাইডাৰ্ছ (পইণ্ট : ১৩, খেল বাকী : ১ বনাম দিল্লী)

মুম্বাইৰ বিৰুদ্ধে জয়েৰে কে কে আৰ দৌৰত টিকি আছে । দেওবাৰে দিল্লীক হৰুৱাৰ পিছত যদি ৰাজস্থান আৰু পঞ্জাৱ হাৰে, তেন্তে কলকাতা সহজেই কোৱালিফাই কৰিব । কিন্তু পঞ্জাৱে নিজৰ খেলখন জিকিলে, কলকাতা দিল্লীৰ বিৰুদ্ধে এক বৃহৎ ব্যৱধানত (অন্ততঃ ৫২ ৰ পৰা ৬১ ৰানত) জিকিব লাগিব ।

চেন্নাই ছুপাৰ কিংছ (পইণ্ট : ১২, খেল বাকী : ১ বনাম গুজৰাট)

চি এছ কেৰ পথ আটাইতকৈ কঠিন । তেওঁলোকক নিজৰ জয়ৰ উপৰিও ৰাজস্থান, পঞ্জাৱ আৰু কলকাতা- তিনিওটা দলৰে পৰাজয়ৰ প্ৰয়োজন । এই সকলোবোৰ মিলি গ’লে, চি এছ কেই মাত্ৰ ২৫ ৰানৰ এক সন্মিলিত ব্যৱধানত ৰাজস্থান ৰয়েলছক ৰান-ৰেটত পিছ পেলাই প্লে-অফত প্ৰৱেশ কৰিব পাৰিব ।

শীৰ্ষ দুই স্থানৰ বাবে গুজৰাট আৰু হায়দৰাবাদৰ যুঁজ-

আনহাতে, ১৬ পইণ্ট লাভ কৰা গুজৰাট টাইটানছ আৰু ছানৰাইজাৰ্ছ হায়দৰাবাদৰ মাজত দ্বিতীয় স্থান লাভৰ বাবে তীব্ৰ প্ৰতিযোগিতা চলিছে । গুজৰাটে চি এছ কেক ২০ ৰানত হৰুৱালে, হায়দৰাবাদে দ্বিতীয় স্থান পাবলৈ হ’লে আৰ চি বিক অন্ততঃ ৩৩ ৰানৰ ব্যৱধানত হৰুৱাব লাগিব ।

লীগ পৰ্যায়ৰ অন্তিম দিন ২৪ মে’ৰ পূৰ্বে প্লে-অফৰ এই অন্তিমখন ছবি স্পষ্ট নহ’ব, যাৰ বাবে ক্ৰীড়াপ্ৰেমীৰ মাজত উৎকণ্ঠা এতিয়া তুংগত ।

লগতে পঢ়ক : আফগানিস্তানৰ বিৰুদ্ধে আগন্তুক টেষ্ট আৰু এদিনীয়া শৃংখলাৰ বাবে ভাৰতীয় দল ঘোষণা

দিল্লীৰ বিৰুদ্ধে লাভ কৰা ব্যৰ্থতাৰ পিছত ৰাজস্থানৰ অধিনায়ক ৰিয়ান পৰাগক যথেষ্ট খঙাল আৰু আশাহত ৰূপত দেখা গ’ল

আইপিএল ২০২৬ ৰ দেওবাৰৰ খেলখনত দিল্লী কেপিটেলছৰ বিৰুদ্ধে এক গুৰুত্বপূৰ্ণ মেচত পৰাজয়ৰ মুখ দেখিবলগীয়া হয় ৰাজস্থান ৰয়েলছে । এই পৰাজয়ৰ ফলত ৰাজস্থানৰ দলটো পইণ্টছ টেবুলৰ ষষ্ঠ স্থানলৈ অৱনমিত হৈছে । প্লে অফৰ দৌৰত টিকি থাকিবলৈ হ’লে এতিয়া দলটোৱে বাকী থকা দুয়োখন খেলতে যিকোনো প্ৰকাৰে জয়লাভ কৰিবই লাগিব । দিল্লীৰ বিৰুদ্ধে লাভ কৰা এই ব্যৰ্থতাৰ পিছত ৰাজস্থানৰ অধিনায়ক ৰিয়ান পৰাগক যথেষ্ট খঙাল আৰু আশাহত ৰূপত দেখা গ’ল । মেচৰ অন্তত তেওঁ স্পষ্টকৈ কয় যে যদি দলটোৱে এনেদৰেই খেলি থাকে, তেন্তে তেওঁলোকে প্লে অফত স্থান লাভ কৰিব নোৱাৰিব ।

“এনেকৈ খেলিলে আমি প্লে অফলৈ যাব নোৱাৰিম”- ৰিয়ান পৰাগ

মেচৰ অন্তত নিজৰ ক্ষোভ আৰু নিৰাশা প্ৰকাশ কৰি অধিনায়ক ৰিয়ান পৰাগে কয়, “মই ভাবো যদি আমি ট্ৰফী জিকিব বিচাৰো, তেন্তে আমি ইয়াতকৈ বহু উন্নত খেল প্ৰদৰ্শন কৰিব লাগিব । মই অতি আশাহত হৈছো । যোৱা চাৰি-পাঁচখন খেলত আমি যেনে প্ৰদৰ্শন কৰিছো, বাস্তৱত আমি তাতকৈ বহুত বেছি ভাল দল । অৱশ্যে, বিৰতিৰ পৰা উভতি অহাৰ পিছত আজি আমি যি শক্তি, দক্ষতা আৰু পৰিকল্পনাৰ প্ৰয়োগ দেখুৱালোঁ, সেয়া তেনেই পুতৌলগা আছিল । যদি আমি এনেকৈয়ে খেলি থাকো, তেন্তে আমি শীৰ্ষ চাৰিৰ দৌৰৰ পৰা সম্পূৰ্ণ বাহিৰ হৈ পৰিম ।”

বেটিং বিপৰ্যয় আৰু দুৰ্বল ফিল্ডিং-

দিল্লী কেপিটেলছৰ বিৰুদ্ধে কেৱল বেটিঙতে নহয়, ফিল্ডিঙৰ ক্ষেত্ৰতো ৰাজস্থান ৰয়েলছৰ প্ৰদৰ্শন অতি দুৰ্বল আছিল । মেচৰ আৰম্ভণিতে যশৰাজ পুঞ্জাই দিল্লীৰ তাৰকা বেটছমেন কে এল ৰাহুলৰ এটা গুৰুত্বপূৰ্ণ কেচ এৰে, যেতিয়া ৰাহুলে আনকি খাতা খুলিবলৈও সক্ষম হোৱা নাছিল । ইয়াৰ উপৰি বৈভৱ সূৰ্যবংশী আৰু স্বয়ং অধিনায়ক ৰিয়ান পৰাগেও ফিল্ডিঙত কেইবাটাও ডাঙৰ ভুল কৰে ।

ফেৰেইৰাক বলিং দিয়াৰ সিদ্ধান্ত-

ফিল্ডিঙৰ ইমান ভুলৰ পিছতো ৰাজস্থান শেষৰ অভাৰকেইটাত মেচখনত বৰ্তি আছিল । শেষৰ ৩ অভাৰত দিল্লী কেপিটেলছক জয়ৰ বাবে ৩৫ ৰানৰ প্ৰয়োজন আছিল । ক্ৰীজত অক্ষৰ পেটেলৰ সৈতে নতুনকৈ নামিছিল ডেভিদ মিলাৰ । দাসুন শনাকা আৰু এডাম মিলনেৰ দৰে অভিজ্ঞ বলাৰৰ অভাৰ বাকী থকাৰ পিছতো অধিনায়ক পৰাগে ১৮ নম্বৰ অভাৰটো ডনোভান ফেৰেইৰাৰ হাতত অৰ্পণ কৰে । ৰিয়ানৰ এই সিদ্ধান্ত একেবাৰে ওলোটা পৰিল আৰু অক্ষৰ-মিলাৰে সেই অভাৰৰ পৰা ১৬ ৰান সংগ্ৰহ কৰি মেচখন দিল্লীৰ পক্ষলৈ লৈ যায় ।

এই সন্দৰ্ভত আত্মপক্ষ সমৰ্থন কৰি ৰিয়ানে কয়, “এয়া কোনো জুৱা নাছিল । টিভিৰ পৰ্দাত হয়তো ইয়াক এটা জুৱাৰ দৰে দেখাব পাৰে, কিন্তু সেই সময়ত ক্ৰীজত দুজন বাওঁহতীয়া বেটছমেন আছিল । মই শনাকাক আন এটা অভাৰ দিয়াৰ পৰিৱৰ্তে ফেৰেইৰাৰ অফ-স্পীনেৰে এটা সুযোগ লোৱাটোৱেই সঠিক বুলি ভাবিছিলোঁ ।”

শেষৰ ৭ অভাৰত ধূলিস্যাৎ হ’ল ইনিংছ-

প্ৰথমে বেটিং কৰাৰ সময়ত ১৪ অভাৰৰ অন্তত ৰাজস্থানৰ স্ক’ৰ আছিল ২ উইকেতৰ বিনিময়ত ১৬০ ৰান । কিন্তু ১৫ নম্বৰ অভাৰত মিচেল ষ্টাৰ্কে ৰিয়ান পৰাগকে ধৰি একেলগে তিনিটাকৈ ডাঙৰ উইকেট কাঢ়ি লৈ ৰাজস্থানক বৃহৎ মোক্ষম আঘাত দিয়ে । ইয়াৰ পিছত শেষৰ ৭ অভাৰত দলটোৱে মাত্ৰ ৪১ ৰানতে ৬ টা উইকেট হেৰুৱায় ।

অধিনায়ক পৰাগৰ মতে, তেওঁ আউট হোৱাৰ পিছত বাকী থকা বেটছমেনসকলে ছেট প্লেটফৰ্মৰ কোনো সুযোগ ল’ব নোৱাৰিলে । তেওঁ কয়, “যিটো পৰিস্থিতি আছিল, আমাৰ স্ক’ৰ ২২০-২৩০ হ’ব লাগিছিল । একেদৰে বলিঙৰ ক্ষেত্ৰতো আমাৰ প্ৰদৰ্শন অতি বেয়া আছিল । আমি আশা কৰা ধৰণে প্ৰদৰ্শন কৰাত সম্পূৰ্ণ ব্যৰ্থ হ’লোঁ ।”

লগতে পঢ়ক : ভাৰতৰ নতুন টেষ্ট শৃংখলা ঘোষণা, বিচিচিআইৰ তৰফৰ পৰা অনুৰাগীসকললৈ বিশেষ উপহাৰ

১৫ বছৰ বয়সত বৈভৱ সূৰ্যবংশীয়ে যি আত্মবিশ্বাস আৰু আক্ৰমণাত্মকতাৰে বেটিং কৰি আছে, যিয়ে ভাৰতীয় ক্ৰিকেটত তেওঁক সৰ্বাধিক চৰ্চিত যুৱ খেলুৱৈ হিচাপে গঢ়ি তুলিছে।

২০২৬ চনৰ আই পি এল (ইণ্ডিয়ান প্ৰিমিয়াৰ লীগ)ত যদি কোনো খেলুৱৈয়ে সৰ্বাধিক শিৰোনাম দখল কৰিছে, তেন্তে সেয়া হ’ল ৰাজস্থান ৰয়েলছ (আৰ আৰ)ৰ বিস্ফোৰক বেটছমেন বৈভৱ সূৰ্য্যবংশী।মাত্ৰ ১৫ বছৰ বয়সতে বৈভৱে যি নিৰ্ভীকভাৱে বেটিং কৰে, তাক দেখি ক্ৰিকেট জগতখনৰ সকলো স্তম্ভিত হৈ পৰে।বৈভৱ সূৰ্য্যবংশীয়ে এই ছিজনত নিজৰ বাবে এক সুকীয়া পৰিচয়ও খোদিত কৰিছে।

এতিয়া ৰাজস্থান ৰয়েলছৰ মুখ্য প্ৰশিক্ষক তথা শ্ৰীলংকাৰ প্ৰাক্তন অধিনায়ক কুমাৰ ছাংগাকাৰাইও যুৱ বেটছমেনগৰাকীক প্ৰশংসা কৰিছে।ইমান কম বয়সতে এনে পৰিপক্ক খেলুৱৈক দেখা পোৱাটো বিৰল বুলি মন্তব্য কৰে সাংগককাৰাই।বৈভৱ সূৰ্য্যবংশীক চলিত ছিজনৰ আৰম্ভণিৰে পৰাই আক্ৰমণাত্মক বেটিং কৰা দেখা গৈছে। তেওঁ বলাৰসকলক থিতাপি লোৱাৰ সুযোগ নিদিয়ে আৰু পাৱাৰপ্লেৰ সময়ত ধাৰাবাহিকভাৱে ডাঙৰ ডাঙৰ শ্বট খেলে।যাৰ বাবে ৰাজস্থান ৰয়েলছে কেইবাখনো মেচত প্ৰথম ছয় অভাৰৰ ভিতৰতে ৬০–৭০ ৰানৰ সীমা অতিক্ৰম কৰিবলৈ সক্ষম হৈছে।

বৈভৱ সূৰ্য্যবংশীক প্ৰশংসা কৰি কুমাৰ সাংগাকাৰাই কয়-“বৈভৱক অলপ সহায়ৰ প্ৰয়োজন, কিন্তু বেছি নহয়।সঁচা কথা ক’বলৈ গ’লে তেওঁ মোতকৈও ভাল খেলুৱৈ।তেওঁৰ লগত ক্ৰিকেটৰ বিষয়ে বৰ বেছি দীঘলীয়া কথা-বতৰা নহয়।বৈভৱক মই মাত্ৰ শিথিল হৈ থাকি বেটিং কৰিবলৈ দিব বিচাৰো।”

লগতে পঢ়ক: বিৰাট কোহলীৰ নতুন ইতিহাস; ডেভিদ ৱাৰ্নাৰক চেৰ পেলাই শীৰ্ষত স্থান লাভ

গুজৰাট টাইটানছে ৰাজস্থান ৰয়েলছক ৭৭ ৰাণৰ বৃহৎ ব্যৱধানত পৰাস্ত কৰি এক দৰ্শনীয় জয় সাব্যস্ত কৰে

আইপিএল ২০২৬-ৰ শনিবাৰে অনুষ্ঠিত হোৱা হাই-ভল্টেজ মেচত গুজৰাট টাইটানছে ৰাজস্থান ৰয়েলছক ৭৭ ৰাণৰ বৃহৎ ব্যৱধানত পৰাস্ত কৰি এক দৰ্শনীয় জয় সাব্যস্ত কৰে । এই বিজয়ৰ লগে লগে গুজৰাটে পইণ্ট তালিকাত এক দীঘলীয়া জাঁপ মাৰি পঞ্চম স্থানৰ পৰা পোনপটীয়াকৈ দ্বিতীয় স্থান দখল কৰিছে ।

গীল আৰু চাই সুদৰ্শনৰ বেটিং তাণ্ডৱ-

টছত হাৰি প্ৰথমে বেটিং কৰিবলৈ নামি গুজৰাট টাইটানছে নিৰ্ধাৰিত ২০ অভাৰত ৪টা উইকেট হেৰুৱাই ২২৯ ৰাণৰ এক বিশাল লক্ষ্য থিয় কৰায় । অপেনাৰ শুভমন গীল আৰু চাই সুদৰ্শনে আৰম্ভণিৰে পৰাই ৰাজস্থানৰ বলাৰসকলৰ ওপৰত আক্ৰমণ চলায় । চাই সুদৰ্শনে মাত্ৰ ৩০ বলত অৰ্ধশতক অৰ্জন কৰি ৫৫ ৰাণত আউট হয় । আনহাতে, অধিনায়ক গীলে ৮৪ ৰাণৰ এক বিস্ফোৰক ইনিংছ খেলে । শেষৰ ফালে ৱাশ্বিংটন সুন্দৰে ৩৭ ৰাণৰ বৰঙণি যোগায় । দুয়োৰে মাজত হোৱা ১১৮ ৰাণৰ অংশীদাৰিত্বই গুজৰাটৰ বিশাল স্ক’ৰৰ ভেটি গঢ়ি তোলে ।

বিফল ৰাজস্থানৰ বেটিং লাইন আপ-

২৩০ ৰাণৰ লক্ষ্য অনুসৰণ কৰিবলৈ নামি ৰাজস্থানৰ আৰম্ভণি আশাব্যঞ্জক আছিল । বৈভৱে ১৬ বলত ৩৬ ৰাণ কৰি আশা জগাইছিল যদিও তেওঁ আউট হোৱাৰ পিছতেই দলটোৰ বেটিং বিপর্যয় আৰম্ভ হয় । তাৰকা বেটাৰ যশস্বী জয়ছোৱালে মাত্ৰ ৩ ৰাণ কৰি হতাশ কৰে । ধ্ৰুৱ জুৰেলে ২৪ ৰাণ আৰু ৰবীন্দ্ৰ জাদেজাই ৩৮ ৰাণ কৰি যুঁজ দিছিল যদিও সেয়া পৰ্যাপ্ত নাছিল । শেষত ৰাজস্থানৰ ইনিংছ ১৫২ ৰাণতে খহি পৰে ।

ৰছিদ খানৰ চমকপ্ৰদ বলিং-

গুজৰাটৰ জয়ৰ মূল নায়ক হিচাপে ধৰা দিলে তাৰকা স্পীনাৰ ৰছিদ খান । তেওঁ ধাৰাবাহিক উইকেট দখল কৰি ৰাজস্থানৰ বেটিং কঁকাল ভাঙি দিয়ে আৰু অকলেই ৪টা উইকেট দখল কৰে । তেওঁক যোগ্য সংগত দি জেছন হোল্ডাৰে ৩টা আৰু কাগিছো ৰাবাদাই ২টা উইকেট লাভ কৰে ।

পইণ্ট তালিকাৰ সমীকৰণ এই জয়ৰ পাছত পইণ্ট তালিকাত ডাঙৰ সালসলনি ঘটিছে । গুজৰাট এতিয়া দ্বিতীয় স্থানত থকাৰ বিপৰীতে পঞ্জাৱ কিংছ তৃতীয় আৰু আৰ চি বি চতুৰ্থ স্থানলৈ অৱনমিত হৈছে । আনহাতে, পৰাজয়ৰ গ্লানিৰে ৰাজস্থান ৰয়েলছ চতুৰ্থৰ পৰা পঞ্চম স্থানলৈ পিছুৱাই গৈছে ।

লগতে পঢ়ক : আই পি এলত সঞ্জু চেমছনৰ ইতিহাস; বিৰাট কোহলীৰ অভিলেখ স্পৰ্শ