অতি শীঘ্ৰেই টীম ইণ্ডিয়াই শ্ৰীলংকাৰ বিৰুদ্ধে দুখন মেচৰ টেষ্ট শৃংখলাত অৱতীৰ্ণ হ’ব
আইপিএল ২০২৬ সমাপ্ত হোৱাৰ পিছতেই পুনৰ ক্ৰিকেটৰ ব্যস্ত সূচীত সোমাই পৰিব ভাৰতীয় ক্ৰিকেট দল । আফগানিস্তানৰ বিৰুদ্ধে টেষ্ট আৰু এদিনীয়া শৃংখলাৰ সফল সামৰণিৰ পিছত ভাৰতীয় ক্ৰিকেট নিয়ন্ত্ৰণ ব’ৰ্ডে (BCCI) এতিয়া আন এক গুৰুত্বপূৰ্ণ শৃংখলা চূড়ান্ত কৰিছে । অতি শীঘ্ৰেই টীম ইণ্ডিয়াই শ্ৰীলংকাৰ বিৰুদ্ধে দুখন মেচৰ টেষ্ট শৃংখলাত অৱতীৰ্ণ হ’ব । বিশ্ব টেষ্ট চেম্পিয়নশ্বিপৰ অংশ হোৱাৰ বাবে এই শৃংখলাটো ভাৰতৰ বাবে অত্যন্ত গুৰুত্বপূৰ্ণ হিচাপে বিবেচিত হৈছে ।
ক্ৰিকবাজৰ এক প্ৰতিবেদন অনুসৰি, লংকা প্ৰিমিয়াৰ লীগ (LPL) সমাপ্ত হোৱাৰ পিছতেই এই টেষ্ট শৃংখলাটো অনুষ্ঠিত হ’ব । উল্লেখ্য যে, অহা ৯ আগষ্টত লংকা প্ৰিমিয়াৰ লীগৰ ফাইনেল মেচখন অনুষ্ঠিত হোৱাৰ কথা আছে । ইয়াৰ পিছতেই ১৫ আগষ্টৰ পৰা ২৭ আগষ্টৰ ভিতৰত ভাৰত আৰু শ্ৰীলংকাৰ মাজত টেষ্ট মেচ দুখন খেলা হ’ব, যদিও এতিয়ালৈকে খেলৰ সঠিক তাৰিখসমূহ ঘোষণা কৰা হোৱা নাই । অৱশ্যে এই ভ্ৰমণকালতে ভাৰতে তিনিখন মেচৰ এটা টি-২০ শৃংখলাও খেলিব নে নাই, সেই সন্দৰ্ভত বৰ্তমানলৈকে কোনো আনুষ্ঠানিক নিশ্চিতি পোৱা হোৱা নাই ।
শ্ৰীলংকাত বিচিচিআইৰ সচিব দেৱজিৎ শইকীয়া-
বৰ্তমান বিচিচিআইৰ সচিব দেৱজিৎ শইকীয়া শ্ৰীলংকাত উপস্থিত আছে । জানিব পৰা মতে তেওঁ শ্ৰীলংকা ক্ৰিকেট ব’ৰ্ডৰ সৈতে এই টেষ্ট শৃংখলাৰ ৰূপৰেখা সন্দৰ্ভত আলোচনা কৰাৰ সম্ভাৱনা আছে । ইয়াৰ উপৰিও পূৰ্বতে প্ৰস্তাৱিত টি-২০ শৃংখলাটোৰ সূচীক লৈও কথা-বতৰা হ’ব পাৰে । উল্লেখ্য যে, অলপতে শ্ৰীলংকাত আঘাত সনা ‘দিতৱাহ’ ঘূৰ্ণীবতাহৰ ভুক্তভোগীসকলৰ সাহায্যৰ বাবে পুঁজি সংগ্ৰহৰ উদ্দেশ্যে বিচিচিআইয়ে শ্ৰীলংকা ক্ৰিকেট ব’ৰ্ডক এটা টি-২০ শৃংখলা খেলাৰ প্ৰতিশ্ৰুতি দিছিল । কিন্তু যদি এই টি-২০ শৃংখলাটো অনুষ্ঠিত হয়, তেন্তে সেয়া ছেপ্টেম্বৰ মাহতহে সম্ভৱ হ’ব, যিটো সময়ত টীম ইণ্ডিয়াৰ সূচী ইতিমধ্যে অত্যন্ত ব্যস্ত হৈ আছে ।
ছেপ্টেম্বৰত টীম ইণ্ডিয়াৰ ব্যস্ততা-
ছেপ্টেম্বৰ মাহটোত ভাৰতীয় ক্ৰিকেট দলৰ বাবে অপেক্ষা কৰি আছে এটাৰ পিছত আনটো শৃংখলা-
বাংলাদেশ ভ্ৰমণ (প্ৰস্তাৱিত): ছেপ্টেম্বৰ মাহত ভাৰতে বাংলাদেশৰ বিৰুদ্ধে ৩ খন এদিনীয়া আৰু ৩ খন টি-২০ মেচৰ এখন হোৱাইট বল শৃংখলা খেলাৰ কথা আছে । বিগত বৰ্ষত দুয়োখন দেশৰ মাজত সৃষ্টি হোৱা ৰাজনৈতিক উত্তেজনাৰ বাবে এই শৃংখলাটো স্থগিত ৰখা হৈছিল । অৱশ্যে এই ভ্ৰমণক লৈ বিচিচিআইয়ে এতিয়াও চূড়ান্ত সিদ্ধান্ত লোৱা নাই ।
ৱেষ্ট ইণ্ডিজৰ বিৰুদ্ধে ঘৰুৱা শৃংখলা : বাংলাদেশ ভ্ৰমণৰ ঠিক পিছতেই ভাৰতে নিজৰ মাটিত ৱেষ্ট ইণ্ডিজৰ বিৰুদ্ধে খেলিব লাগিব ।
এছিয়ান গেমছ ২০২৬ : অহা ৯ ছেপ্টেম্বৰৰ পৰা ৪ অক্টোবৰলৈ অনুষ্ঠিত হ’বলগীয়া এছিয়ান গেমছৰ বাবেও ভাৰতীয় দলে প্ৰস্তুতি চলাব লাগিব ।
আফগানিস্তানৰ বিৰুদ্ধে টি-২০ শৃংখলা : এই সকলোবোৰৰ মাজতে, ছেপ্টেম্বৰ মাহতেই ইউএই-ৰ মাটিত আফগানিস্তানৰ বিৰুদ্ধে ৩ খন মেচৰ এটা টি-২০ শৃংখলাতো অংশ ল’ব ভাৰতে ।
অহা কেইটামান মাহত ভাৰতীয় খেলুৱৈসকলে জিৰণি অবিৰাজিতভাৱে ক্ৰিকেট খেলিব লাগিব । এতিয়া দেৱজিৎ শইকীয়াৰ শ্ৰীলংকা ভ্ৰমণৰ পিছত এই সমগ্ৰ ক্ৰীড়া সূচীত কি নতুন ৰূপ আহে, তালৈকে দৃষ্টি আকৰ্ষণ কৰিছে ক্ৰীড়াপ্ৰেমীসকলে ।
লগতে পঢ়ক : ‘তেওঁ মোতকৈ ভাল খেলুৱৈ…’; বৈভৱ সূৰ্য্যবংশীৰ বেটিঙত মন্ত্ৰমুগ্ধ ৰাজস্থান ৰয়েলছৰ মুখ্য প্ৰশিক্ষক
