মঙলবাৰে ক্ৰেমলিনত ৰাছিয়াৰ ৰাষ্ট্ৰপতি ভ্লাদিমিৰ পুটিনক সাক্ষাৎ কৰে প্ৰতিৰক্ষা মন্ত্ৰী ৰাজনাথ সিঙে । প্ৰায় এঘণ্টা ধৰি দুয়োগৰাকী নেতাৰ মাজত কথা-বতৰা চলে । ৰাছিয়া-ইউক্ৰেইন যুদ্ধৰ মাজতে পুটিনৰ সৈতে ৰাজনাথৰ এই সাক্ষাৎ অতি গুৰুত্বপূৰ্ণ বুলি বিবেচিত হৈছে । ২০২২ চনত সংঘাত আৰম্ভ হোৱাৰ পিছত পুটিনে মাত্ৰ কেইজনমান নেতাকহে সাক্ষাৎ কৰে । অৱশ্যে প্ৰধানমন্ত্ৰী নৰেন্দ্ৰ মোদী হওক বা বৈদেশিক মন্ত্ৰী এছ জয়শংকৰ হওক বা আজি ৰাজনাথ সিং হওক, পুটিনে সদায় ভাৰতীয় নেতাক অগ্ৰাধিকাৰ দি আহিছে ।
প্ৰধানমন্ত্ৰী নৰেন্দ্ৰ মোদীৰ হৈ ৰাষ্ট্ৰপতি পুটিনক উষ্ম শুভেচ্ছা জ্ঞাপন কৰে প্ৰতিৰক্ষা মন্ত্ৰী সিঙে । ৰাজনাথ সিঙে দ্বিপাক্ষিক প্ৰতিৰক্ষা সহযোগিতাৰ বিভিন্ন বিষয়ত আলোচনা কৰে । ভাৰত-ৰাছিয়া আন্তঃচৰকাৰী সামৰিক আৰু সামৰিক সহযোগিতা আয়োগৰ একবিংশতম অধিৱেশন উপলক্ষে এই বৈঠক অনুষ্ঠিত হয় । দুয়োজন নেতাই কয় যে দুয়োখন দেশৰ অংশীদাৰিত্বত অপৰিসীম সম্ভাৱনা আছে আৰু যৌথ প্ৰচেষ্টাই উল্লেখযোগ্য ফলাফলৰ বাট মুকলি কৰিব ।
পুটিন আৰু ৰাজনাথ সিঙৰ বৈঠকত আৰু কি কি বিষয়ৰ ওপৰত আলোচনা কৰা হ’ল সেই সন্দৰ্ভত এতিয়ালৈকে কোনো আনুষ্ঠানিক বিবৃতি প্ৰকাশ হোৱা নাই । অনুমান কৰা হৈছে যে দুয়োগৰাকী নেতাই এছ-৪০০ প্ৰতিৰক্ষা ব্যৱস্থাৰ ডেলিভাৰী, ৰাছিয়া-ইউক্ৰেইন যুদ্ধ, ছিৰিয়া আৰু মধ্য এছিয়াৰ পৰিস্থিতিকে ধৰি প্ৰতিৰক্ষাৰ সৈতে জড়িত বহু বিষয়ত আলোচনা কৰে ।
ইফালে সোমবাৰে উপকূলীয় চহৰ কেলিনিংগ্ৰাডত ৰাছিয়া নিৰ্মিত মাল্টি ৰোল ষ্টীলথ গাইডেড মিছাইল ফ্ৰিগেট আই এন এছ তুছিল মুকলি কৰা হয় । বিশ্বৰ অন্যতম প্ৰযুক্তিগতভাৱে উন্নত ফ্ৰিগেট হিচাপে বিবেচিত এই যুদ্ধ জাহাজখনে ভাৰত মহাসাগৰত ভাৰতীয় নৌসেনাৰ কাৰ্যকৰী ক্ষমতা যথেষ্ট বৃদ্ধি কৰিব বুলি আশা কৰা হৈছে । এই অনুষ্ঠানত সিঙৰ সৈতে নৌসেনাৰ মুৰব্বী এডমিৰেল দিনেশ কে ত্ৰিপাঠীও উপস্থিত আছিল ।
