ইউক্ৰেইনত ৰাছিয়াৰ আটাইতকৈ ডাঙৰ এয়াৰ ষ্ট্ৰাইক

ইউক্ৰেইনৰ ৰাজধানী কিয়েভত ৰাছিয়াই নতুনকৈ আক্ৰমণ চলাইছে । এই আক্ৰমণত পেচাৰস্কি জিলাৰ কেবিনেট ভৱনত অগ্নিকাণ্ড সংঘটিত হয় । ইউক্ৰেইনৰ সামৰিক প্ৰশাসনৰ মুৰব্বীয়ে দেওবাৰে ছ’চিয়েল মিডিয়াত এই তথ্য প্ৰদান কৰে । প্ৰকাশিত এক প্ৰতিবেদন অনুসৰি প্ৰত্যক্ষদৰ্শীয়ে ইউক্ৰেইন চৰকাৰৰ মূল ভৱনৰ পৰা ক’লা ধোঁৱা ওলোৱা দেখিছিল ।

৮০০ৰো অধিক ড্ৰোন নিক্ষেপ কৰে ৰাছিয়াই-

ইউক্ৰেইনে জনোৱা মতে, ৰাছিয়াই কিয়েভত নিশাটোৰ ভিতৰতে আক্ৰমণ চলাইছিল, য’ত এটি নৱজাতককে ধৰি তিনিজন লোকৰ মৃত্যু হোৱাৰ বিপৰীতে ১৮জন লোক আহত হৈছে । চৰকাৰী মুখ্য কাৰ্যালয়কে ধৰি ৰাজধানীৰ কেইবাটাও অট্টালিকাত জ্বলি উঠে । কিয়েভৰ মেয়ৰে কয় যে এই আক্ৰমণ আৰম্ভ হৈছিল চহৰখনত ড্ৰ’ন আক্ৰমণৰ পৰা আৰু তাৰ পিছতে ক্ষেপণাস্ত্ৰ আক্ৰমণ হৈছিল ।

ইউক্ৰেইনৰ প্ৰধানমন্ত্ৰী ইউলিয়া শ্বিৰিডেংকোৱে কয় যে যুদ্ধৰ সময়ত প্ৰথমবাৰৰ বাবে শত্ৰুৰ আক্ৰমণত ইউক্ৰেইন চৰকাৰৰ মূল ভৱন ক্ষতিগ্ৰস্ত হৈছে । ইউক্ৰেইনৰ বায়ুসেনাই জনোৱা মতে, ৰাছিয়াই নিশাৰ ভিতৰতে ইউক্ৰেইনলৈ ৮০৫টা ড্ৰোন আৰু ১৩টা ক্ষেপণাস্ত্ৰ নিক্ষেপ কৰিছে তেওঁ কয় যে ড্ৰোন আক্ৰমণত এটি শিশু আৰু এগৰাকী যুৱতী নিহত হোৱাৰ বিপৰীতে এগৰাকী গৰ্ভৱতী মহিলাকে ধৰি পাঁচজন লোকক চিকিৎসালয়ত ভৰ্তি কৰা হৈছে । ইয়াৰ পূৰ্বে ড্নিপাৰ নদীৰ পূব দিশৰ আশ্ৰয় শিবিৰত এগৰাকী বৃদ্ধাৰ মৃত্যু হৈছিল, য’ত আন দুজন লোকৰ মৃত্যু হোৱাৰ বাতৰি পোৱা গৈছিল ।

দ্বিতীয়টো বৃহৎ আক্ৰমণ-

দেওবাৰৰ এই আক্ৰমণ হৈছে যোৱা দুসপ্তাহৰ ভিতৰত কিয়েভক লক্ষ্য কৰি ৰাছিয়াৰ দ্বিতীয়টো বৃহৎ ড্ৰোন আৰু মিছাইল আক্ৰমণ । শান্তি আলোচনাৰ আশাক লৈ এই আক্ৰমণে সংকট আৰু অধিক গভীৰ কৰি তুলিছে ।

লগতে পঢ়ক : অক্টোবৰত হ’ব পাৰে ট্ৰাম্প-জিনপিঙৰ বৈঠক… দক্ষিণ কোৰিয়া ভ্ৰমণৰ বাবে সাজু হৈছে আমেৰিকাৰ ৰাষ্ট্ৰপতি

ৰাছিয়া-ইউক্ৰেইন যুদ্ধ সন্দৰ্ভত ভ্লাদিমিৰ পুটিনৰ সৈতে সাক্ষাৎ-আলোচনা কৰিব ট্ৰাম্পে

শুকুৰবাৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে কয় যে ১৫ আগষ্টত আলাস্কাত ৰাছিয়াৰ ৰাষ্ট্ৰপতি ভ্লাদিমিৰ পুটিনক তেওঁ সাক্ষাৎ কৰিব । তথ্য অনুসৰি দুয়োগৰাকী নেতাই ৰাছিয়া-ইউক্ৰেইন যুদ্ধৰ বিষয়ে আলোচনা কৰিব । ট্ৰাম্পে কয় যে মোৰ আৰু ৰাছিয়াৰ ৰাষ্ট্ৰপতি ভ্লাদিমিৰ পুটিনৰ মাজত বহু প্ৰত্যাশিত বৈঠক অহা শুকুৰবাৰে অৰ্থাৎ ২০২৫ চনৰ ১৫ আগষ্টত গ্ৰেট ষ্টেট অৱ আলাস্কাত অনুষ্ঠিত হ’ব । অধিক সবিশেষ পৰৱৰ্তী সময়ত দিয়া হ’ব ।

যদি এই বৈঠক হয় তেন্তে ২০২১ চনৰ পিছত আমেৰিকা আৰু ৰাছিয়াৰ মাজত হ’ব প্ৰথমখন শীৰ্ষ সন্মিলন । তেতিয়া প্ৰাক্তন ৰাষ্ট্ৰপতি জো বাইডেনে জেনেভাত পুটিনক সাক্ষাৎ কৰিছিল । ৰাছিয়া আৰু ইউক্ৰেইনৰ শান্তিৰ চৰ্ত এতিয়াও দুয়োখন দেশৰ বাবে বহু বেলেগ, গতিকে যুদ্ধ বন্ধ হোৱাৰ নিশ্চয়তা নাই ।

ট্ৰাম্পৰ এই ঘোষণাৰ মাজতে ফ্ৰণ্টত যুঁজি থকা ইউক্ৰেইনৰ সৈন্যসকলৰ কূটনৈতিক সমাধানৰ বিশেষ আশা নাই । প্ৰায় দুসপ্তাহ পূৰ্বে ট্ৰাম্পে ভ্লাদিমিৰ পুটিনক আক্ৰমণ বন্ধ কৰিবলৈ আলটিমেটাম দিছিল আৰু যদি ৰাছিয়াই পিছুৱাই নাযায় তেন্তে ৰাছিয়াৰ তেল ক্ৰয় কৰা দেশসমূহৰ ওপৰত অতিৰিক্ত নিষেধাজ্ঞা আৰু শুল্ক আৰোপ কৰা হ’ব বুলি ভাবুকি দিছিল । ৰাছিয়ান সেনাই ইউক্ৰেইনত লাহে লাহে আগবাঢ়িছে আৰু অহৰহ চহৰবোৰত আক্ৰমণ চলাই আছে । ডনেস্কৰ পক্ৰ’ভস্ক অঞ্চলত এই যুদ্ধ আটাইতকৈ তীব্ৰতৰ হৈ পৰিছে, য’ত ৰাছিয়াই ড্নিপ্ৰ’পেট্ৰ’ভস্কৰ দিশে আগবাঢ়ি যাবলৈ চেষ্টা কৰিছে । ইফালে ইউক্ৰেইনত জনশক্তিৰ অভাৱ যদিও  সৈন্যসকল দৃঢ়তাৰে থিয় দিছে ।

ক্ৰেমলিনৰ মতে, চীনৰ ৰাষ্ট্ৰপতি জি জিনপিঙৰ সৈতে ফোনযোগে কথা পাতি পুটিনে ট্ৰাম্পৰ দূত ষ্টিভ উইটকফৰ সৈতে হোৱা বৈঠকৰ বিষয়ে অৱগত কৰে । ইউক্ৰেইনৰ সংকটৰ ‘দীৰ্ঘম্যাদী সমাধান’ৰ বাবে জিয়ে সমৰ্থন প্ৰকাশ কৰে । ভাৰতৰ প্ৰধানমন্ত্ৰী নৰেন্দ্ৰ মোদীয়েও ফোনযোগে পুটিনৰ সৈতে কথা পাতিছিল । এই সপ্তাহত ট্ৰাম্পে ভাৰতৰ ওপৰত ২৫% অতিৰিক্ত শুল্ক আৰোপ কৰিছিল কাৰণ ভাৰতে ৰাছিয়াৰ পৰা তেল ক্ৰয় কৰি আছে, যাক ট্ৰাম্পে যুদ্ধৰ বাবে আৰ্থিক সাহায্য বুলি গণ্য কৰে । দক্ষিণ আফ্ৰিকা, কাজাখস্তান, উজবেকিস্তান আৰু বেলাৰুছৰ নেতাসকলৰ সৈতেও ফোনযোগে কথা পাতিছিল পুটিনে । বিশ্লেষকসকলৰ মতে পুটিনে ট্ৰাম্পৰ সৈতে সম্ভাৱ্য চুক্তিৰ বিষয়ে নিজৰ ঘনিষ্ঠ মিত্ৰসকলক অৱগত কৰিছে ।

লগতে পঢ়ক : ইণ্টেলৰ CEO ক শীঘ্ৰেই পদত্যাগ কৰিবলৈ নিৰ্দেশ ট্ৰাম্পৰ; চীনৰ সৈতে সংযোগ স্থাপনৰ পিছতে ক্ষোভৰ সৃষ্টি

ভয়ংকৰ ভূমিকম্পত কঁপি উঠিল ৰাছিয়া

বুধবাৰে এক বৃহৎ ভূমিকম্পই কঁপাই যায় ৰাছিয়া । ৰাছিয়াৰ কামচাটকা উপদ্বীপত সংঘটিত হৈছে এই ভূমিকম্প । ৰিখটাৰ স্কেলত এই ভূমিকম্পৰ প্ৰাবল্য আছিল ৮.৮ । জাপান আৰু আমেৰিকাৰ উপৰিও নিউজিলেণ্ড আৰু ইণ্ডোনেছিয়াতো এই ভূমিকম্পৰ প্ৰভাৱ দেখা গৈছে আৰু ছুনামীৰ সতৰ্কবাণী জাৰি কৰা হৈছে । কিছুমান ঠাইত ছুনামীৰ প্ৰভাৱো দেখা দিবলৈ আৰম্ভ কৰিছে ।

জাপানৰ বতৰ বিজ্ঞান সংস্থাই বুধবাৰে প্ৰকাশ কৰা অনুসৰি ৰাছিয়াৰ কামচাটকা উপদ্বীপৰ সমীপত ৮.০ প্ৰাবল্যৰ বৃহৎ ভূমিকম্পই জাপানৰ বাবে ছুনামীৰ সতৰ্কবাণী জাৰি কৰিছে । সংস্থাটোৱে জনোৱা মতে, পুৱা ৮:২৫ বজাত এই ভূমিকম্পৰ প্ৰাৰম্ভিক প্ৰাবল্য ৮.০ বুলি ৰেকৰ্ড কৰা হৈছে । জাপানৰ প্ৰশান্ত মহাসাগৰীয় উপকূলত ১ মিটাৰ পৰ্যন্ত ছুনামীৰ সতৰ্কবাণীও জাৰি কৰিছে সংস্থাটোৱে । পিছলৈ ইয়াক ৮.৮লৈ সংশোধন কৰা হয় ।

ৰাছিয়াৰ প্ৰশান্ত মহাসাগৰীয় উপকূলৰ কামচাটকা অঞ্চলত প্ৰথম ছুনামী ঢৌৱে আঘাত কৰে । ভূমিকম্পৰ ফলত সাগৰৰ জলপৃষ্ঠ যথেষ্ট বৃদ্ধি পায় । ইয়াৰ বাবে উপকূলীয় চহৰৰ অট্টালিকাত জলস্তৰ বৃদ্ধি হোৱা দেখা যায় ।

জাপানৰ চাৰিটা ডাঙৰ দ্বীপৰ ভিতৰত আটাইতকৈ উত্তৰত থকা হোকাইডোৰ পৰা প্ৰায় ২৫০ কিলোমিটাৰ দূৰত্বত এই ভূমিকম্পৰ প্ৰভাৱ অতি কম অনুভৱ কৰা হৈছে । ইউ এছ জি চিয়ে জনোৱা মতে, ১৯.৩ কিলোমিটাৰ গভীৰতাত এই ভূমিকম্পটো সংঘটিত হৈছিল । প্ৰাৰম্ভিক খবৰৰ পিছতে ইউ এছ জি চিয়ে কয় যে ভূমিকম্পৰ প্ৰাবল্য ৮.৭ ।

এই ভূমিকম্পৰ পিছতে ৰাছিয়া আৰু জাপানৰ লগতে ইন্দোনেছিয়া, নিউজীলেণ্ড আৰু আমেৰিকাতো ছুনামীৰ সতৰ্কতা জাৰি কৰা হৈছে । জাপানত ৯ লাখ লোকক স্থানান্তৰ কৰাৰ বাবে নিৰ্দেশ জাৰি কৰা হৈছে ।

লগতে পঢ়ক : ভয়ংকৰ বিমান দুৰ্ঘটনাৰ পৰা কথমপি ৰক্ষা পৰিল আমেৰিকা; সৌভাগ্যক্ৰমে প্ৰাণ ৰক্ষা ১৭৯গৰাকী যাত্ৰীৰ