দ্বিতীয় বিশ্বযুদ্ধত জাৰ্মানীৰ বিৰুদ্ধে জয়লাভৰ ৮০ বছৰীয়া জয়ন্তী উপলক্ষে ৯ মে’ত অনুষ্ঠিত হ’বলগীয়া উদযাপনত অংশগ্ৰহণ কৰিবলৈ ৰাছিয়াই প্ৰধানমন্ত্ৰী নৰেন্দ্ৰ মোদীক আমন্ত্ৰণ জনাইছে । উপ-বিদেশ মন্ত্ৰী আন্দ্ৰে ৰুডেংকোৱে এই তথ্য দিছে । ইফালে মস্কোৱে আশা কৰিছে যে ভাৰতৰ প্ৰধানমন্ত্ৰীয়ে ৯ মে’ৰ পেৰেডত অংশগ্ৰহণ কৰিব । উপ-বিদেশ মন্ত্ৰীৰ উদ্ধৃতি দি ৰাছিয়াৰ এটা সংবাদ সংস্থাই কয় যে ইতিমধ্যে নিমন্ত্ৰণ পত্ৰ প্ৰেৰণ কৰা হৈছে আৰু এই ভ্ৰমণৰ পৰিকল্পনা কৰা হৈছে ।

বহু বন্ধুত্বপূৰ্ণ দেশৰ নেতালৈ নিমন্ত্ৰণ-

মঙলবাৰে এণ্ড্ৰি ৰুডেংকোৱে কয় যে ‘ইয়াৰ ওপৰত কাম চলি আছে, এয়া এই বছৰত হ’ব লাগে । তেওঁলোকে নিমন্ত্ৰণ লাভ কৰিছে ।‘ ৰাছিয়াই এইবাৰৰ বিজয় দিৱসৰ পেৰেডত অংশগ্ৰহণ কৰিবলৈ কেইবাখনো বন্ধুত্বপূৰ্ণ দেশৰ নেতাকো আমন্ত্ৰণ জনাইছে । ১৯৪৫ চনৰ জানুৱাৰী মাহত ছোভিয়েট সেনাই জাৰ্মানীৰ বিৰুদ্ধে আক্ৰমণ আৰম্ভ কৰে । ৯ মে’ত কমাণ্ডাৰ ইন চিফে জাৰ্মানীৰ নিঃচৰ্ত আত্মসমৰ্পণৰ আইনত স্বাক্ষৰ কৰি যুদ্ধৰ অন্ত পেলায় ।

২০২৪ চনৰ জুলাইত ৰাছিয়া ভ্ৰমণ কৰিছিল প্ৰধানমন্ত্ৰী মোদীয়ে-

প্ৰধানমন্ত্ৰী মোদীয়ে ২০২৪ চনৰ জুলাই মাহত ৰাছিয়া ভ্ৰমণ কৰিছিল, যিটো প্ৰায় পাঁচ বছৰৰ পিছত প্ৰথমবাৰৰ বাবে ৰাছিয়া ভ্ৰমণ আছিল । ২০১৯ চনত তেওঁ ভ্লাডিভষ্টক চহৰ ভ্ৰমণ কৰি অৰ্থনৈতিক সন্মিলনত অংশগ্ৰহণ কৰিছিল । বিগত ভ্ৰমণৰ সময়ত প্ৰধানমন্ত্ৰী মোদীয়ে ৰাছিয়াৰ ৰাষ্ট্ৰপতি ভ্লাদিমিৰ পুটিনক ভাৰত ভ্ৰমণৰ বাবে আমন্ত্ৰণ জনাইছিল । ইতিমধ্যে ভাৰত ভ্ৰমণৰ বাবে প্ৰধানমন্ত্ৰী মোদীৰ আমন্ত্ৰণ মানি লৈছে পুটিনে ।

ভ্ৰমণৰ তাৰিখ এতিয়াও প্ৰকাশ কৰা হোৱা নাই-

অৱশ্যে ৰাছিয়াৰ ৰাষ্ট্ৰপতিগৰাকীৰ ভ্ৰমণৰ তাৰিখ এতিয়াও প্ৰকাশ কৰা হোৱা নাই । পুটিন আৰু মোদীয়ে নিয়মীয়া যোগাযোগ বজাই ৰাখে, দুমাহৰ মূৰে মূৰে এবাৰ টেলিফোনযোগে বাৰ্তালাপ কৰে । বিশেষকৈ আন্তঃৰাষ্ট্ৰীয় অনুষ্ঠানৰ সময়ত দুয়োগৰাকী নেতাই ব্যক্তিগতভাৱেও সাক্ষাৎ কৰে ।

ইউক্ৰেইনৰ ৰাষ্ট্ৰপতি ভ্লাদিমিৰ জেলেনস্কিয়ে আমেৰিকাই প্ৰস্তাৱ কৰা ৩০ দিনীয়া যুদ্ধবিৰতি চুক্তিক সমৰ্থন জনাইছে যদিও এতিয়া ৰাছিয়াক এই কথাত সন্মতি দিয়াটো আমেৰিকাৰ দায়িত্ব বুলিও কয় । ইউক্ৰেইনে যুদ্ধবিৰতি চুক্তিত সন্মতি দিয়াৰ পিছত জেলেনস্কিৰ এই বক্তব্য প্ৰকাশ পাইছে । ইফালে ফ্ৰান্সৰ ৰাষ্ট্ৰপতি ইমানুৱেল মেক্ৰনেও যুদ্ধবিৰতি চুক্তিৰ প্ৰস্তাৱক প্ৰশংসা কৰি কয় যে এতিয়া বল ৰাছিয়াৰ পক্ষত আছে ।

যুদ্ধবিৰতি চুক্তিক লৈ কি ক’লে ইউক্ৰেইনৰ ৰাষ্ট্ৰপতিয়ে-

ইউক্ৰেইনৰ ৰাষ্ট্ৰপতি জেলেনস্কিয়ে যুদ্ধবিৰতি চুক্তিক আদৰণি জনাই কয় যে ‘ইউক্ৰেইনে যুদ্ধবিৰতি চুক্তিক আদৰণি জনাইছে । আমি ইয়াক ইতিবাচকভাৱে লৈছো । আমি এনে পদক্ষেপ ল’বলৈ সাজু । এতিয়া আমেৰিকাই এইটোৰ বাবেও ৰাছিয়াক পতিয়ন নিয়াব লাগে । আমি সাজু আৰু যদি ৰাছিয়াইও সন্মতি দিয়ে তেন্তে যুদ্ধবিৰতিয়ে কাম কৰিব ।

চৌদি আৰৱৰ জেদ্দা চহৰত ইউক্ৰেইন আৰু আমেৰিকাৰ প্ৰতিনিধি দলৰ মাজত আলোচনা হয় । ইউক্ৰেইনৰ ফালৰ পৰা ৰাষ্ট্ৰপতিৰ উপদেষ্টা এণ্ড্ৰি য়েৰমাক, বৈদেশিক মন্ত্ৰী এণ্ড্ৰি ছিবিহা আৰু প্ৰতিৰক্ষা মন্ত্ৰী ৰুষ্টাম উমেৰভে আলোচনাত অংশগ্ৰহণ কৰে । আমেৰিকাৰ হৈ বৈদেশিক মন্ত্ৰী মাৰ্কো ৰুবিঅ’ আৰু ৰাষ্ট্ৰীয় নিৰাপত্তা উপদেষ্টা মাইক ৱাল্টজে এই বৈঠকত অংশগ্ৰহণ কৰে ।

শেহতীয়াকৈ আমেৰিকাই ইউক্ৰেইনক চোৰাংচোৱা তথ্য প্ৰদান কৰা বন্ধ কৰিছিল, এতিয়া যুদ্ধবিৰতি চুক্তিৰ অধীনত ৩০ দিনৰ বাবে আমেৰিকাই পুনৰ ইউক্ৰেইনক চোৰাংচোৱা তথ্য প্ৰদান কৰিব । এতিয়া আমেৰিকাই ৰাছিয়াকো এই যুদ্ধবিৰতি চুক্তিত সন্মতি দিয়াবলৈ চেষ্টা কৰিব । ইউক্ৰেইনেও যুদ্ধবিৰতি চুক্তিত ইউৰোপীয় সংঘক অন্তৰ্ভুক্ত কৰাৰ দাবী জনাইছে ।

ৰাছিয়াৰ কাজান চহৰত সংঘটিত হৈছে এক বৃহৎ ড্ৰোন আক্ৰমণ । ৰাছিয়াৰ সংবাদ মাধ্যমৰ মতে কাজানৰ কেইবাটাও বহুমহলীয়া অট্টালিকাত ড্ৰোনে আঘাত হানিছে । এই আক্ৰমণ ২০০১ চনত আমেৰিকাত সংঘটিত হোৱা ৯/১১ আক্ৰমণৰ দৰেই সংঘটিত হৈছে । এই আক্ৰমণত হোৱা ক্ষয়-ক্ষতিৰ তথ্য এতিয়াও জানিব পৰা হোৱা নাই যদিও ড্ৰোনে যিদৰে আৱাসিক অট্টালিকাসমূহত আঘাত কৰে আৰু অট্টালিকাসমূহত বিস্ফোৰণ আৰু অগ্নিকাণ্ড সংঘটিত হয়, তাত বৃহৎ ক্ষতি হোৱাৰ সম্ভাৱনা আছে । এই আক্ৰমণৰ ভিডিঅ’ পোহৰলৈ আহিছে । একে সময়তে ৰাছিয়াৰ কুৰ্স্ক অঞ্চলৰ ৰিলস্ক চহৰত ইউক্ৰেইনৰ ক্ষেপণাস্ত্ৰ আক্ৰমণত শিশুসহ ৬জন লোকৰ মৃত্যু হোৱাৰ খবৰ পোৱা গৈছে । আন ১০ জন লোকো আহত হয় এই আক্ৰমণত ।

ইউক্ৰেইনৰ বিৰুদ্ধে ড্ৰোন আক্ৰমণৰ অভিযোগ-

সংবাদ মাধ্যমৰ বাতৰি অনুসৰি এই আক্ৰমণ ইউক্ৰেইনৰ দ্বাৰা সংঘটিত হোৱা বুলি দাবী কৰিছে ৰাছিয়াই । ড্ৰোন আক্ৰমণৰ পিছতে কাজান বিমানবন্দৰত বিমান সেৱা বন্ধ কৰি দিয়া হৈছে । ৰাছিয়াৰ ৰাজধানী মস্কোৰ পৰা প্ৰায় ৮০০ কিলোমিটাৰ পূবে অৱস্থিত কাজান চহৰ । এই ড্ৰোন আক্ৰমণ কাজানৰ ছটা আৱাসিক অট্টালিকাত সংঘটিত হয় । সংবাদ মাধ্যমৰ বাতৰি অনুসৰি ইউক্ৰেইনৰ সীমান্তৰ পৰা প্ৰায় ৯০০ কিলোমিটাৰ পূবে কাজান চহৰ অৱস্থিত আৰু ইয়াৰ পূৰ্বেও ইউক্ৰেইনে কাজানত ড্ৰোন আক্ৰমণ চলাইছিল । ৰাছিয়াৰ প্ৰতিৰক্ষা মন্ত্ৰীয়ে দাবী কৰিছে যে তেওঁলোৰ বাহিনীয়ে ১২খন ইউক্ৰেইনৰ ড্ৰোন ধ্বংস কৰিছে । ইউক্ৰেইনৰ সংবাদ মাধ্যমে দাবী কৰিছে যে যোৱা নিশা ৰাছিয়াৰ ৰষ্টভত দুটা তেল ডিপোতো অগ্নিকাণ্ড সংঘটিত হয় । এই অগ্নিকাণ্ডও ইউক্ৰেইনৰ ড্ৰোন আক্ৰমণৰ বাবে সংঘটিত হোৱাৰ অভিযোগ উত্থাপন হৈছে ।

কাজান চহৰ ৰাছিয়াৰ অৰ্থনৈতিক শক্তিক্ষেত্ৰ-

বিগত অক্টোবৰ মাহত ব্ৰিকছ সন্মিলনৰ বাবে সমগ্ৰ বিশ্বতে বাতৰিৰ শিৰোনাম দখল কৰিছিল কাজান চহৰে । কাজানত ৰাছিয়াই আয়োজন কৰিছিল ব্ৰিকছ সন্মিলন । ভাৰতৰ প্ৰধানমন্ত্ৰী নৰেন্দ্ৰ মোদীয়েও সেই ব্ৰিকছ সন্মিলনত অংশ লৈছিল । ৰাছিয়াৰ ইতিহাসত কাজানৰ গুৰুত্বপূৰ্ণ স্থান আছে আৰু ৰাছিয়াৰ উদ্যোগ, সংস্কৃতি আৰু ধৰ্মৰ এক প্ৰধান কেন্দ্ৰ । ইয়াক ৰাছিয়াৰ তৃতীয় ৰাজধানী বা ক্ৰীড়া ৰাজধানী বুলিও কোৱা হয় । ৰাছিয়াই কাজানত কেইবাটাও আন্তঃৰাষ্ট্ৰীয় ক্ৰীড়া অনুষ্ঠান আয়োজন কৰিছে । অৰ্থনৈতিকভাৱে কাজান এক শক্তিশালী স্থান । ৰাছিয়াৰ প্ৰধান ট্ৰাক নিৰ্মাতা কোম্পানী KAMAZ য়ে যাত্ৰীবাহী বিমান আৰু হেলিকপ্টাৰ উৎপাদনতো গুৰুত্বপূৰ্ণ ভূমিকা পালন কৰে । কাজানৰ অভিযান্ত্ৰিক, বস্ত্ৰশিল্প আৰু খাদ্য প্ৰক্ৰিয়াকৰণ উদ্যোগ যথেষ্ট সমৃদ্ধিশালী ।