পুটিনৰ বাসগৃহক আক্ৰমণৰ লক্ষ্য কৰি লোৱা বুলি প্ৰকাশ পোৱা বাতৰিক লৈ উদ্বেগ প্ৰকাশ প্ৰধানমন্ত্ৰী মোদীৰ । ইউক্ৰেইনে ৯১খন দীৰ্ঘ দূৰত্বৰ মানৱবিহীন বিমানেৰে পুটিনৰ বাসগৃহত আক্ৰমণ চলাইছিল বুলি অভিযোগ কৰিছিল ৰাছিয়াই ।
ৰাছিয়াৰ ৰাষ্ট্ৰপতিৰ বাসগৃহক ইউক্ৰেইনে আক্ৰমণৰ লক্ষ্য কৰি লোৱা বুলি প্ৰকাশ পোৱা বাতৰিক লৈ উদ্বেগ প্ৰকাশ কৰিছে প্ৰধানমন্ত্ৰী নৰেন্দ্ৰ মোদীয়ে । প্ৰধানমন্ত্ৰী মোদীয়ে কয় যে কূটনৈতিক প্ৰচেষ্টা শত্ৰুতা শেষ কৰি শান্তি অৰ্জনৰ সৰ্বোত্তম উপায় । ৰাছিয়া-ইউক্ৰেইন সংঘাত সন্দৰ্ভত প্ৰধানমন্ত্ৰী মোদীয়ে কয় যে আমি সংশ্লিষ্ট সকলো পক্ষকে কূটনৈতিক প্ৰচেষ্টাত মনোনিৱেশ কৰিবলৈ আহ্বান জনাইছো আৰু ইয়াক ভংগ কৰিব পৰা যিকোনো কাৰ্য্য এৰাই চলিবলৈ আহ্বান জনাইছো ।
শান্তিৰ বাবে আবেদন প্ৰধানমন্ত্ৰী মোদীৰ-
ছ’চিয়েল মিডিয়াত শ্বেয়াৰ কৰা এটা পোষ্টত প্ৰধানমন্ত্ৰী মোদীয়ে লিখিছে, “ৰাছিয়ান ফেডাৰেচনৰ ৰাষ্ট্ৰপতিৰ বাসগৃহক লক্ষ্য কৰি লোৱাৰ খবৰ পাই আমি গভীৰভাৱে চিন্তিত হৈছো । চলি থকা কূটনৈতিক প্ৰচেষ্টা হৈছে শত্ৰুতা শেষ কৰি শান্তি অৰ্জনৰ সৰ্বোত্তম পথ । আমি সকলো সংশ্লিষ্ট পক্ষকে আহ্বান জনাইছো যে এই সকলো দুৰ্বল কৰিব পৰা যিকোনো কাৰ্য্যৰ পৰা বিৰত থাকিব লাগে ।”
৯১খন ড্ৰ’নে পুটিনৰ বাসগৃহত আক্ৰমণ কৰাৰ দাবী ৰাছিয়াৰ-
উল্লেখযোগ্য যে ৰাছিয়াৰ বৈদেশিক মন্ত্ৰী ছাৰ্গেই লাভৰভে দাবী কৰিছিল যে যোৱা নিশা ইউক্ৰেইনে ৯১খন দীৰ্ঘ দূৰত্বৰ মানৱবিহীন বিমান (ইউএভি)ৰে ৰাছিয়াৰ ৰাষ্ট্ৰপতিৰ বাসগৃহত আক্ৰমণ চলাইছিল । উত্তৰ-পশ্চিম নভ’গ্ৰ’ড অঞ্চলত অৱস্থিত ৰাষ্ট্ৰপতি পুটিনৰ বাসগৃহ । লাভৰভে দাবী কৰে যে ৰাছিয়াৰ বায়ু প্ৰতিৰক্ষাই ৯১খন ড্ৰ’নকে বাধা দি ধ্বংস কৰে । অৱশ্যে ইউক্ৰেইনে এই অভিযোগ অস্বীকাৰ কৰিছে । ইউক্ৰেইনৰ ৰাষ্ট্ৰপতিয়ে এই অভিযোগ অস্বীকাৰ কৰি কয় যে ৰাছিয়াই এনে অভিযোগ উত্থাপন কৰি শান্তি আলোচনাক বিপথে পৰিচালিত কৰিবলৈ চেষ্টা কৰিছে ।
জেলেনস্কিয়ে লগতে কয় যে ৰাছিয়াই মিছা কথা কৈছে আৰু এয়া ইউক্ৰেইনৰ ওপৰত ৰাছিয়াই আক্ৰমণ অব্যাহত ৰখাৰ অজুহাতহে । জেলেনস্কিয়ে লগতে কয় যে ৰাছিয়াই কিয়েভৰ চৰকাৰী ভৱনসমূহক বাৰে বাৰে লক্ষ্য কৰি লৈছে ।
লগতে পঢ়ক : পুটিনৰ চৰকাৰী বাসগৃহত ইউক্ৰেইনৰ আক্ৰমণ… ৰাছিয়াৰ দাবী অস্বীকাৰ জেলেনস্কিৰ
