ৰাছিয়াৰ ৰাষ্ট্ৰপতি পুটিনে ভাৰতৰ সৈতে এক বৃহৎ সামৰিক সহযোগিতা চুক্তি স্বাক্ষৰ কৰি আইনত পৰিণত কৰে । চুক্তিত ৰাছিয়া আৰু ভাৰতৰ মাজত সামৰিক সৈন্য, যুদ্ধজাহাজ, সামৰিক বিমানৰ চলাচলৰ লগতে ইখনে সিখন দেশৰ সেনাবাহিনীক লজিষ্টিক সহায় আগবঢ়োৱাৰ পদ্ধতি স্থাপন কৰা হৈছে ।
সোমবাৰে ৰাছিয়াৰ ৰাষ্ট্ৰপতি ভ্লাদিমিৰ পুটিনে ভাৰতৰ সৈতে এক বৃহৎ সামৰিক সহযোগিতা চুক্তি স্বাক্ষৰ কৰি ফেডাৰেল আইনত পৰিণত কৰে । চলিত মাহৰ আৰম্ভণিতে ৰাছিয়াৰ সংসদৰ দুয়োটা সদনে অনুমোদন জনোৱাৰ পিছত এই চুক্তিখন ৰাষ্ট্ৰপতিৰ চূড়ান্ত অনুমোদনৰ বাবে প্ৰেৰণ কৰা হৈছিল । ক্ৰেমলিনৰ মতে, এই পদক্ষেপে ৰাছিয়াৰ ঘৰুৱা বিধান প্ৰক্ৰিয়া সম্পূৰ্ণ কৰিছে ।
জানিব পৰা মতে, আনুষ্ঠানিকভাৱে ৰেচিপ্ৰ’কেল এক্সচেঞ্জ অৱ লজিষ্টিকছ চাপৰ্ট (RELOS) নামেৰে নামাকৰণ কৰা এই চুক্তিখন ২ ডিচেম্বৰত ষ্টেট ডুমা (সংসদৰ নিম্ন সদন) আৰু ৮ ডিচেম্বৰত ফেডাৰেচন কাউন্সিল (উচ্চ সদনে) অনুমোদন জনায় ।
সংসদৰ পৰা অনুমোদন লাভ কৰাৰ পিছত এই নথি চূড়ান্ত অনুমোদনৰ বাবে ৰাষ্ট্ৰপতিলৈ প্ৰেৰণ কৰা হয়, যাৰ ফলত ৰাছিয়াৰ ঘৰুৱা বিধান প্ৰক্ৰিয়া সম্পূৰ্ণ হয় ।
RELOS চুক্তিত ৰাছিয়া আৰু ভাৰতৰ মাজত সামৰিক সৈন্য, যুদ্ধজাহাজ, সামৰিক বিমানৰ চলাচলৰ লগতে ইখনে সিখন দেশৰ সেনাবাহিনীক লজিষ্টিক সহায় আগবঢ়োৱাৰ পদ্ধতি স্থাপন কৰা হৈছে ।
ৰাছিয়াৰ মন্ত্ৰীসভাই প্ৰস্তুত কৰা এক ব্যাখ্যামূলক টোকা অনুসৰি এই চুক্তিয়ে কেৱল সৈন্য আৰু সামৰিক সঁজুলিৰ নিয়োগ নিয়ন্ত্ৰণ কৰাই নহয়, বিশেষকৈ যেতিয়া এখন দেশৰ বাহিনী আনখন দেশৰ ভূখণ্ডত কাম কৰিব তেতিয়া আনুষংগিক লজিষ্টিক সেৱাসমূহো সামৰি লোৱা হ’ব ।
এই চুক্তি যৌথ সামৰিক অনুশীলন আৰু প্ৰশিক্ষণ কাৰ্য্যকলাপৰ লগতে মানৱীয় সাহায্য আৰু দুৰ্যোগ সাহায্য অভিযানৰ সৈতে জড়িত পৰিস্থিতিত প্ৰয়োগ কৰিবলৈ ডিজাইন কৰা হৈছে । চুক্তিত দুয়োপক্ষৰ পাৰস্পৰিক সন্মতি সাপেক্ষে অন্য পৰিস্থিতিত ইয়াৰ বিধানসমূহ প্ৰয়োগ কৰাৰ অনুমতি দিয়া হৈছে ।
ৰাছিয়াৰ কেবিনেটে ষ্টেট ডুমাৰ চৰকাৰী ৱেবছাইটত প্ৰকাশিত এক টোকাত উল্লেখ কৰিছে যে চুক্তিখন অনুমোদন কৰিলে ৰাছিয়া আৰু ভাৰতৰ সামৰিক বিমানে ইখনে সিখনৰ আকাশমাৰ্গ ব্যৱহাৰ কৰাত সুবিধা হ’ব । যুদ্ধজাহাজৰ বাবে বন্দৰ ষ্টপসমূহো পদ্ধতিগতভাৱে সৰল কৰা হ’ব । এই চুক্তিৰ জৰিয়তে দুয়োখন দেশৰ সামৰিক সহযোগিতা শক্তিশালী হ’ব বুলিও কেবিনেটে উল্লেখ কৰে ।
