বুধবাৰে (৪ ডিচেম্বৰ) ফ্ৰান্সৰ ৰাজনৈতিক ইতিহাসত এক বৃহৎ পৰিৱৰ্তন ঘটে । এই গুৰুত্বপূৰ্ণ পৰিঘটনাত বিৰোধী সাংসদে দেশখনৰ মিচেল বাৰ্নিয়াৰৰ চৰকাৰক উফৰাই দিয়ে । বাৰ্নিয়াৰ চৰকাৰে সংসদত অনাস্থা প্ৰস্তাৱ হেৰুৱাই । বিগত ৬০ বছৰৰ ভিতৰত এইবাৰ এনেদৰে কোনো চৰকাৰক দেশখনৰ ক্ষমতাৰ পৰা অপসাৰণ কৰা হৈছে ।
বাওঁপন্থী দ্য নিউ পপুলাৰ ফ্ৰণ্ট (এন এফ পি) মিত্ৰজোঁটে উত্থাপন কৰা এই অনাস্থা প্ৰস্তাৱৰ সপক্ষে ৩৩১ জন সাংসদে ভোটদান কৰে, আনহাতে চৰকাৰক উফৰাই পেলাবলৈ মাত্ৰ ২৮৮ টা ভোটৰ প্ৰয়োজন আছিল । উল্লেখ্য যে, বাৰ্নিয়েৰ চৰকাৰ মাত্ৰ তিনিমাহহে ক্ষমতাত আছিল । এতিয়া মিচেল বাৰ্নিয়ে ৰাষ্ট্ৰপতি ইমানুৱেল মেক্ৰনৰ ওচৰত পদত্যাগ পত্ৰ দাখিল কৰিব লাগিব ।
বাৰ্নিয়াৰ চৰকাৰ সংখ্যাগৰিষ্ঠতা নাছিল-
জুলাই মাহত অনুষ্ঠিত হোৱা সাধাৰণ নিৰ্বাচনত কোনো দলেই সংখ্যাগৰিষ্ঠতা লাভ কৰিব নোৱাৰিলে । ৰাষ্ট্ৰপতি মেক্ৰনে ছেপ্টেম্বৰ মাহত মিচেল বাৰ্নিয়াৰৰ নেতৃত্বত চৰকাৰ গঠন কৰিছিল । ৭৩ বছৰীয়া বাৰ্নিয়াৰে সংখ্যাগৰিষ্ঠতা নথকা সত্ত্বেও মিত্ৰতাৰে চৰকাৰ চলাবলৈ চেষ্টা কৰিছিল ।
কিয় চৰকাৰৰ বিৰোধিতা কৰিলে সাংসদসকলে ?
বাৰ্নিয়াৰ চৰকাৰৰ বিৰুদ্ধে অনাস্থা প্ৰস্তাৱৰ মূল কাৰণ আছিল শেহতীয়াকৈ দাখিল কৰা সামাজিক সুৰক্ষাৰ বাজেট । এই বাজেটত কৰ বৃদ্ধি আৰু খৰচ কৰ্তনৰ সিদ্ধান্ত লোৱা হৈছিল, যাৰ তীব্ৰ বিৰোধিতা কৰিছিল বাওঁ আৰু সোঁপন্থীয়ে । সংসদৰ ভোটদান অবিহনে চৰকাৰে এই বাজেট গৃহীত কৰাৰ সিদ্ধান্ত লোৱাৰ ফলত পৰিস্থিতি অধিক উত্তেজিত হৈ পৰে । ইয়াৰ পিছত বিৰোধী দলসমূহে চৰকাৰৰ বিৰুদ্ধে অনাস্থা প্ৰস্তাৱ আনিবলৈ ঘোষণা কৰে, যাৰ বাবে অৱশেষত বাৰ্নিয়েৰ চৰকাৰে পৰাজয়ৰ সন্মুখীন হ’বলগীয়া হয় ।
মেক্ৰনৰ কৌশলক লৈ উত্থাপিত প্ৰশ্ন-
তিনিমাহৰ ভিতৰত ফ্ৰান্সৰ ক্ষমতাৰ পৰা মিচেল বাৰ্নিয়াৰ চৰকাৰক উৎখাত কৰিলে ৰাজনৈতিক অস্থিৰতা বৃদ্ধি পাব পাৰে । বৰ্তমান সমগ্ৰ বিশ্বতে ৰাষ্ট্ৰপতি মেক্ৰনৰ কৌশলক লৈ প্ৰশ্ন উত্থাপন হৈছে ।
