গৰম বা হিট ৱেভ, ভয়ংকৰ ধুমুহা, আকস্মিক বানৰ দৰে ঘটনাই এইবাৰ পৃথিৱীৰ হাজাৰ হাজাৰ লোকৰ প্ৰাণ কাঢ়ি লৈছে । গোলকীয় উষ্ণতাৰ বাবে এনে ঘটনাই গতি লাভ কৰিছে । ইউৰোপীয় জলবায়ু সেৱাৰ অনুমান অনুসৰি ২০২৪ চনটোৱেই হ’ব এতিয়ালৈকে আটাইতকৈ উষ্ণ বা গৰম বছৰ । বছৰজোৰা বিশ্বব্যাপী গড় তাপমাত্ৰা প্ৰাক-ঔদ্যোগিক স্তৰতকৈ ১.৫ ডিগ্ৰী চেলচিয়াছ অধিক হ’ব বুলি আশা কৰা হৈছে । যদি এনেকুৱা হয় তেন্তে ২০২৪ চন হ’ব এই চিহ্ন অতিক্ৰম কৰা প্ৰথমটো কেলেণ্ডাৰ বৰ্ষ ।
পৃথিৱীৰ বাবে ‘বিপদ ঘণ্টা’-
বিজ্ঞানীসকলে কৈছে যে ইয়াক এক বিপদ ঘণ্টা হিচাপে চোৱা উচিত । অহা সপ্তাহত আজাৰবাইজানত অনুষ্ঠিত হ’বলগীয়া ৰাষ্ট্ৰসংঘৰ জলবায়ু সন্মিলন চিঅ’পি২৯ৰ পূৰ্বে অহা এই অনুমানে এতিয়া উদ্বেগ বৃদ্ধি কৰিছে । বি বি চিৰ প্ৰতিবেদন অনুসৰি, ৰয়েল মেটিৰ’লজিকেল চছাইটিৰ মুখ্য কাৰ্যবাহী লিজ বেণ্টলীয়ে কয়, “এই শেহতীয়া ৰেকৰ্ডে চিঅ’পি২৯ৰ চৰকাৰসমূহক আন এক শক্তিশালী সতৰ্কবাণী প্ৰদান কৰিছে যে তাপমাত্ৰা আৰু বৃদ্ধি প্ৰতিহত কৰিবলৈ জৰুৰী পদক্ষেপৰ প্ৰয়োজন ।”
২০২৩ চনত স্থাপিত গৰমৰ ৰেকৰ্ড, ২০২৪ চনত ভংগ হ’ব!
২০২৪ চনৰ প্ৰথম ১০ মাহত বিশ্বব্যাপী তাপমাত্ৰা ইমান বেছি আছিল যে বাকী দুমাহত কেৱল অপ্ৰত্যাশিত হ্ৰাসহে ৰেকৰ্ড তৈয়াৰ কৰাত বাধা দিব পাৰে । ইউৰোপীয় কোপাৰনিকছ জলবায়ু পৰিৱৰ্তন সেৱাৰ তথ্যই প্ৰকাশ কৰিছে যে ২০২৪ চনত তাপমাত্ৰা প্ৰাক-ঔদ্যোগিক সময়তকৈ কমেও ১.৫৫ ডিগ্ৰী চেলচিয়াছ অধিক হ’ব পাৰে ।
“প্ৰাক-ঔদ্যোগিক”ৰ অৰ্থ হৈছে ১৮৫০-১৯০০ চনৰ মানক সময়, যেতিয়া মোটামুটিভাৱে মানুহে গ্ৰহটোক যথেষ্ট উষ্ণ কৰিবলৈ আৰম্ভ কৰিছিল । শেহতীয়া অনুমানৰ অৰ্থ হৈছে যে ২০২৪ চনত বৰ্তমানৰ ১.৪৮ চেলচিয়াছৰ অভিলেখ ভংগ হ’ব পাৰে, যিটো কেৱল যোৱা বছৰহে স্থাপন হৈছিল ।
