ইজৰাইলৰ প্ৰতিৰক্ষা বাহিনীয়ে তথা আই ডি এফে এক বিবৃতিত কৈছে যে এই সপ্তাহৰ শেষৰ ফালে আই ডি এফে এক নিৰ্ণায়ক অভিযানত ইজৰাইলৰ উত্তৰ সীমান্তৰ ওচৰত ২৫০ মিটাৰ দীঘল হিজবুল্লাহৰ এক সুৰংগ আৱিষ্কাৰ কৰি ধ্বংস কৰে । অনুমান কৰা হৈছে যে এই সুৰংগটো ৭ অক্টোবৰত দক্ষিণ ইজৰাইলত কৰাৰ দৰে বৃহৎ পৰিসৰৰ আক্ৰমণৰ উদ্দেশ্যেৰে নিৰ্মাণ কৰা হৈছিল ।
ইজৰাইলৰ প্ৰতিৰক্ষা বাহিনীৰ এগৰাকী মুখপাত্ৰই কয় যে, “এই সুৰংগটো ৭ অক্টোবৰত উত্তৰ ইজৰাইলক আক্ৰমণ কৰিবলৈ নিৰ্মাণ কৰা হৈছিল । কিন্তু এনে কোনো ভুল নকৰিব । যিসকলে ইজৰাইলৰ জনসাধাৰণৰ ক্ষতি কৰিছে তেওঁলোকে যথেষ্ট মূল্য দিব লাগিব ।” এই অভিযান ইজৰাইলে হিজবুল্লাহৰ পৰা অহা ভাবুকি নিষ্ক্ৰিয় কৰি নাগৰিকক সুৰক্ষা দিয়াৰ শেহতীয়া প্ৰচেষ্টা বুলি উল্লেখ কৰে তেওঁ ।
ইজৰাইলী বায়ু সেনাই দাবী কৰিছে যে তেওঁলোকে লেবানন অঞ্চলৰ পৰা হোৱা আকাশী আক্ৰমণ বন্ধ কৰিছে । বায়ু সেনাই আক্ৰমণৰ সতৰ্কবাণী লাভ কৰিছিল আৰু লগে লগে সক্ৰিয় হৈ পৰিছিল । এই আক্ৰমণ ইজৰাইলী ক্ষেত্ৰত উপস্থিত হ’ব নাছিল, যাৰ ফলত কোনো লোক হতাহত হোৱা নাছিল ।
ইফালে, শনিবাৰে বিশ্বৰ মুখ্য চহৰসমূহত হাজাৰ হাজাৰ প্ৰতিবাদকাৰী ৰাজপথলৈ ওলাই আহি গাজা আৰু মধ্য প্ৰাচ্যৰ সংঘৰ্ষৰ সমাপ্তিৰ দাবী জনাইছিল । প্ৰায় ৪০,০০০ পেলেষ্টাইন পন্থী প্ৰদৰ্শকে মধ্য লণ্ডনত সমদল কৰিছিল, আনহাতে হাজাৰ হাজাৰ লোক পেৰিছ, বাৰ্লিন, ৰোম, মেনিলা, কেপ টাউন আৰু নিউয়ৰ্ক চহৰতো সমবেত হৈছিল । গাজা আৰু লেবাননত সামৰিক অভিযানত ইজৰাইলৰ প্ৰতি আমেৰিকা যুক্তৰাষ্ট্ৰৰ সমৰ্থনৰ প্ৰতিবাদত ৱাশ্বিংটনৰ হোৱাইট হাউচৰ ওচৰতো প্ৰতিবাদ হৈছিল ।
নিউয়ৰ্ক চহৰৰ টাইমছ স্কোৱেৰত প্ৰতিবাদকাৰীসকলে শ্ল’গান দি ইজৰাইলৰ বিৰুদ্ধে অস্ত্ৰ নিষেধাজ্ঞা আৰোপ কৰাৰ আহ্বান জনায় ।
