বুধবাৰে হাৰিয়ানা বিজেপি বিধায়িনী দলৰ বৈঠকত নায়ব সিং ছৈনী বিধায়িনী দলৰ নেতা হিচাপে নিৰ্বাচিত হয় । বিধায়িনী দলৰ নেতা হিচাপে, নায়ব সিং ছৈনীৰ নাম সৰ্বসন্মতি ক্ৰমে অনুমোদন দিয়া হয় ।
পঞ্চকুলাত অনুষ্ঠিত বিধায়িনী দলৰ বৈঠকত তেওঁক বিধানয়িনী দলৰ নেতা নিৰ্বাচিত কৰা হয় । বৈঠকত অনিল ভিজ আৰু মনোহৰ লালে বিধায়িনী দলৰ নেতা হিচাপে নয়াব সিং ছৈনীৰ নাম প্ৰস্তাৱ কৰে, যাক সকলো বিধায়কে সমৰ্থন কৰে । এই সময়ছোৱাত কেন্দ্ৰীয় গৃহমন্ত্ৰী অমিত শ্বাহ আৰু মধ্যপ্ৰদেশৰ মুখ্যমন্ত্ৰী মোহন যাদৱো উপস্থিত আছিল । মন কৰিবলগীয়া যে বৃহস্পতিবাৰে পুৱা ১১ বজাত পঞ্চকুলাৰ শালিমাৰ খেলপথাৰত শপত গ্ৰহণ অনুষ্ঠান অনুষ্ঠিত হ’ব ।
বৈঠকত ভাষণ প্ৰদান কৰি কেন্দ্ৰীয় গৃহমন্ত্ৰী অমিত শ্বাহে ঘোষণা কৰে যে নৱ নিৰ্বাচিত বিধায়কসকলে সৰ্বসন্মতিক্ৰমে নায়ব সিং ছৈনীক বিধায়িনী দলৰ নেতা হিচাপে বাছনি কৰিছে । এই ঘোষণাৰ পিছত, মুখ্যমন্ত্ৰী ছৈনীয়ে থিয় হৈ হাত জোৰ কৰে, আৰু সকলো বিধায়কক ধন্যবাদ জ্ঞাপন কৰে । মুখ্যমন্ত্ৰী ছৈনীৰ শপত গ্ৰহণ অনুষ্ঠানৰ বাবে এক বৃহৎ মঞ্চ প্ৰস্তুত কৰা হৈছে । প্ৰধানমন্ত্ৰী নৰেন্দ্ৰ মোদীকে ধৰি বিজেপি আৰু ইয়াৰ সহযোগী দলৰ কেইবাজনো নেতা শপত গ্ৰহণ অনুষ্ঠানত উপস্থিত থাকিব । ইয়াৰ বাবে প্ৰস্তুতি এতিয়া অন্তিম পৰ্যায়ত আছে ।
উল্লেখ্য যে, চলিত বৰ্ষৰ মাৰ্চ মাহত, বিজেপিয়ে মনোহৰ লালৰ ঠাইত নায়ব সিং ছৈনীক মুখ্যমন্ত্ৰী হিচাপে নিযুক্তি দিছিল । তেওঁ ১৭ অক্টোবৰত দ্বিতীয়বাৰৰ বাবে মুখ্যমন্ত্ৰী কাৰ্যালয়ৰ শপত গ্ৰহণ কৰিব । নিৰ্বাচনত বিজেপিয়ে একেৰাহে তৃতীয়বাৰৰ বাবে সম্পূৰ্ণ সংখ্যাগৰিষ্ঠতাৰে ৰাজ্যখনত ক্ষমতালৈ আহিছে ।
প্ৰধানমন্ত্ৰী নৰেন্দ্ৰ মোদীক ইতিমধ্যে শপত গ্ৰহণ অনুষ্ঠানৰ বাবে সময় দিয়া হৈছে । ইয়াৰ উপৰিও, দলটোৰ শীৰ্ষ নেতৃত্বও অনুষ্ঠানটোত উপস্থিত থাকিব । মন কৰিবলগীয়া যে হাৰিয়ানা বিধানসভাৰ বাবে ভোটদান ৫ অক্টোবৰত হৈছিল আৰু ভোটগণনা ৮ অক্টোবৰত অনুষ্ঠিত হৈছিল । নিৰ্বাচনৰ ফলাফলত, বিজেপি সংখ্যাগৰিষ্ঠ দল হিচাপে আত্মপ্ৰকাশ কৰে । দলটোৱে ৯০ খন আসনৰ ভিতৰত ৪৮ খন জিকি সংখ্যাগৰিষ্ঠতা লাভ কৰে ।
