ভব্য-গব্য দীপোৎসৱৰ বাবে সম্পূৰ্ণৰূপে সাজু হৈ উঠিছে অযোধ্যা । ৰামলালাৰ অভিষেকৰ পিছত অনুষ্ঠিত হ’বলগীয়া প্ৰথমটো দীপোৎসৱ বহু দিশত বিশেষ হ’বলৈ গৈ আছে । ইতিমধ্যে সৰজু নদীৰ ৫৫ টা ঘাটত ২৮ লাখ চাকি লগোৱা হৈছে । এইবাৰ ২৫ লাখ চাকি জ্বলাই বিশ্ব অভিলেখ গঢ়ি তোলাৰ পৰিকল্পনা কৰা হৈছে । আনহাতে সমগ্ৰ অযোধ্যাত এই দীপাৱলীত ৩৫ লাখতকৈও অধিক চাকি জ্বলোৱাৰ সম্ভাৱনা আছে ।
মন্দিৰৰ চৌহদ ফুলেৰে সজাই তোলা হ’ব-
শ্ৰী ৰাম জন্মভূমি মন্দিৰ ফুলেৰে সজাই তোলা হ’ব । মন্দিৰ কমপ্লেক্স কেইবাটাও খণ্ড আৰু উপ-শাখাত বিভক্ত কৰি সাজ-সজ্জাৰ কাম দিয়া হৈছে । বিহাৰ কেডাৰৰ অৱসৰপ্ৰাপ্ত আই জি আশু শুক্লাক মন্দিৰৰ প্ৰতিটো কোণ সঠিকভাৱে পোহৰাই তোলাৰ লগতে সকলো প্ৰৱেশদ্বাৰ তোৰণেৰে সজাই-পৰাই তোলাৰ দায়িত্ব দিয়া হৈছে । ইয়াৰ বাবে সকলো ভক্তই সুন্দৰ ফুল আৰু দীপেৰে সজোৱা মন্দিৰৰ ঐশ্বৰিক দৰ্শন কৰিব পাৰিব ।
ৰামকথা পাৰ্কত সাজু হৈছে ৰামদৰবাৰ । ৯০ ফুট দৈৰ্ঘ্যৰ ৰাম দৰবাৰ ৰাজপ্ৰসাদৰ থিমেৰে সজাই তোলা হৈছে । দৰবাৰৰ আঁৰৰ সমগ্ৰ দৃশ্য ডিজিটেলভাৱে দেখুৱাবলৈ পৰিকল্পনা কৰা হৈছে । ঠিক ৰামদাৰবৰৰ সন্মুখতে সাধু আৰু সন্তসকল বহিব পৰাকৈ এখন মঞ্চ তৈয়াৰ কৰা হৈছে । যেতিয়া লেজাৰ শ্ব’ আৰু প্ৰজেকচন মেপিঙৰ আখৰা হৈছিল, তেতিয়া মানুহৰ বিশাল ভিৰ পৰিলক্ষিত হৈছিল ।
এইবাৰৰ দীপাৱলী অতি বিশেষ : প্ৰধানমন্ত্ৰী মোদী
৫০০ বছৰৰ পাছত প্ৰথমবাৰৰ বাবে ভগৱান ৰামে অযোধ্যাত দীপাৱলী উৎসৱ পালন কৰিব বুলি কয় প্ৰধানমন্ত্ৰী মোদীয়ে । ভিডিঅ’ কনফাৰেন্সৰ জৰিয়তে তেওঁ কয়, ‘দুদিনৰ পাছত আমিও দীপাৱলী উদযাপন কৰিম আৰু এইবাৰৰ দীপাৱলী অতি বিশেষ । ৫০০ বছৰৰ পাছত অযোধ্যাৰ ভব্য মন্দিৰত তেওঁ বিৰাজমান হৈছে আৰু তেওঁৰ সৈতে ভব্য মন্দিৰত এয়াই হ’ব প্ৰথম দীপাৱলী । আমি সকলো বহুত ভাগ্যৱান যে আমি ইমান বিশেষ আৰু ভব্য দীপাৱলী চাবলৈ পাইছো ।‘
২০১৭ চনত উত্তৰ প্ৰদেশত যোগী আদিত্যনাথ চৰকাৰ গঠন হোৱাৰ পিছত অযোধ্যাৰ পৰ্যটন উন্নয়নৰ বাবে দীপোৎসৱৰ কাৰ্যসূচী আৰম্ভ কৰা হয় । এতিয়া প্ৰতি বছৰে এই উৎসৱ নিজৰ অভিলেখ ভংগ কৰি আছে ।
