অযোধ্যাক লৈ মন্তব্য দিয়া পাকিস্তানক প্ৰত্যুত্তৰ

অযোধ্যাৰ ৰাম মন্দিৰৰ ধ্বজাৰোহণ অনুষ্ঠানত প্ৰধানমন্ত্ৰী মোদীয়ে অংশগ্ৰহণ কৰাক লৈ পাকিস্তানে অনৰ্গল বিৰূপ মন্তব্য কৰি আহিছে । চুবুৰীয়া দেশখনৰ এই মন্তব্যৰ প্ৰতিক্ৰিয়া প্ৰকাশ কৰি বৈদেশিক পৰিক্ৰমা মন্ত্ৰালয়ে কয় যে আমি তেওঁলোকৰ মন্তব্যক সেই অৱজ্ঞাৰে নাকচ কৰিছোঁ যিমানখিনি তেওঁলোকৰ প্ৰাপ্য ।

বৈদেশিক মন্ত্ৰালয়ৰ মুখপাত্ৰ ৰণধীৰ জয়ছোৱালে কয় যে কুসংস্কাৰ, দমন আৰু সংখ্যালঘুৰ ওপৰত ব্যৱস্থাগত নিৰ্যাতনৰ অসংখ্য অভিলেখ থকা পাকিস্তানৰ আনক উপদেশ দিয়া কোনো নৈতিক অধিকাৰ নাই । তেওঁ কয় যে ভণ্ডামি প্ৰচাৰৰ পৰিৱৰ্তে পাকিস্তানে নিজৰ মানৱ অধিকাৰৰ দুৰ্বল অভিলেখৰ ওপৰত গুৰুত্ব দিব লাগে ।

কি কৈছিল পাকিস্তানে ?

পাকিস্তানৰ বৈদেশিক পৰিক্ৰমা মন্ত্ৰালয়ে এক আনুষ্ঠানিক বিবৃতিযোগে অযোধ্যাৰ ৰাম মন্দিৰৰ ধ্বজাৰোহণ কাৰ্যক ইছলামোফ’বিয়াৰ কাম আৰু ঐতিহ্যক গুৰুতৰ অপমান বুলি অভিহিত কৰে । পাকিস্তানে কয় যে ইয়াৰ দ্বাৰা ভাৰতৰ ধৰ্মীয় সংখ্যালঘুসকলৰ ওপৰত হেঁচা প্ৰয়োগৰ বৃহত্তৰ আৰ্হি আৰু হিন্দুত্ববাদী মতাদৰ্শৰ প্ৰভাৱত মুছলমান সাংস্কৃতিক আৰু ধৰ্মীয় ঐতিহ্য নিৰ্মূল কৰাৰ ইচ্ছাকৃত প্ৰচেষ্টা প্ৰতিফলিত হয় ।

চীনলৈ ভাৰতৰ স্পষ্ট বাৰ্তা-

প্ৰেমা থাংডক বিষয়ত ভাৰতে চীনলৈ এক কঠোৰ বাৰ্তা প্ৰেৰণ কৰি অৰুণাচল প্ৰদেশ ভাৰতৰ এক অবিচ্ছেদ্য অংগ বুলি স্পষ্ট কৰি দিছে । বৈদেশিক মন্ত্ৰালয়ৰ মুখপাত্ৰ ৰণধীৰ জয়ছোৱালে উল্লেখ কৰে যে চাংহাই আন্তঃৰাষ্ট্ৰীয় বিমানবন্দৰত বৈধ পাছপ’ৰ্ট লৈ জাপানলৈ যোৱা অৰুণাচল প্ৰদেশৰ এগৰাকী ভাৰতীয় নাগৰিকক স্বেচ্ছাচাৰীভাৱে আটক কৰাৰ বাবে ভাৰতে তীব্ৰ প্ৰতিবাদ দাখিল কৰিছে । তেওঁ লগতে কয় যে চীনে যিমানেই অস্বীকাৰ নকৰক কিয় অৰুণাচল প্ৰদেশৰ ভাৰতীয় পৰিচয় সলনি কৰিব নোৱাৰি ।

লগতে পঢ়ক : চাংহাই বিমানবন্দৰৰ ঘটনাক লৈ চীনক তীব্ৰ সমালোচনা মুখ্যমন্ত্ৰী পেমা খাণ্ডুৰ