বাংলাদেশৰ অন্তৱৰ্তীকালীন চৰকাৰৰ মুখ্য উপদেষ্টা মহম্মদ ইউনুছে প্ৰাক্তন প্ৰধানমন্ত্ৰী শ্বেখ হাছিনাৰ বিৰুদ্ধে এক বিস্ফোৰক অভিযোগ উত্থাপন কৰিছে।ইউনুছে কৈছে যে “শ্বেখ হাছিনাই সকলো শেষ কৰি পেলালে। ইউনুছে এইটোও কৈছিল যে নিৰ্বাচনী সংস্কাৰৰ পিছতহে বাংলাদেশত নিৰ্বাচন অনুষ্ঠিত হ’ব।
মহম্মদ ইউনুছে এটা সাক্ষাৎকাৰত কয় যে, “নিৰ্বাচন অনুষ্ঠিত হোৱাৰ পূৰ্বে আমি অৰ্থনীতি, শাসন, আমোলাতন্ত্ৰ আৰু ন্যায়পালিকা সংস্কাৰ কৰা প্ৰয়োজন”।
ইউনুছে পুনৰ কৈছিল যে “আন্তৰ্জাতিক অপৰাধ ন্যায়াধিকৰণৰ বিচাৰ শেষ হোৱাৰ পিছত ভাৰতে শ্বেখ হাছিনাক প্ৰত্যাৰ্পণ কৰা উচিত। বিচাৰ শেষ হোৱাৰ পিছত আৰু ৰায় প্ৰদান দিয়া পিছত, আমি শ্বেখ হাছিনাক ভাৰতৰ পৰা প্ৰত্যাৰ্পণৰ বাবে অনুৰোধ কৰিম।তেওঁ দৃঢ়তাৰে কয় যে আন্তঃৰাষ্ট্ৰীয় আইনৰ অধীনত ভাৰতে তেওঁক প্ৰত্যাৰ্পণ কৰিবলৈ বাধ্য”।
তেওঁ বাংলাদেশত হিন্দুসকলৰ ওপৰত হোৱা আক্ৰমণক প্ৰচাৰ বুলি বৰ্ণনা কৰিছিল।তেওঁ কয় “ভাৰত চৰকাৰে হিন্দুসকলৰ সুৰক্ষা আৰু নিৰাপত্তা সম্পৰ্কে প্ৰকাশ কৰা উদ্বেগ, এইটো তথ্যৰ ওপৰত আধাৰিত নহয়”।
হাছিনা চৰকাৰ যোৱাৰ পিছৰে পৰা ভাৰত আৰু বাংলাদেশৰ মাজৰ সম্পৰ্কৰ অৱনতি ঘটিছে।বাংলাদেশতো হিন্দুসকলৰ ওপৰত আক্ৰমণ বৃদ্ধি পাইছে। শেহতীয়াকৈ হিন্দু ধৰ্মগুৰু চিন্ময় কৃষ্ণ দাসক গ্ৰেপ্তাৰ কৰাৰ পিছত সম্পৰ্কৰ অৱনতি ঘটিছিল।
তেওঁ লগতে কয় যে “বাংলাদেশৰ অন্তৱৰ্তীকালীন চৰকাৰে নিৰ্বাচনী ব্যৱস্থা, সংবিধান আৰু ন্যায়পালিকাৰ সংস্কাৰৰ বাবে কেইবাটাও আয়োগ গঠন কৰিছে।এই সংস্কাৰবোৰ কাৰ্যকৰী হ’বলৈ সময় লাগিব কিয়নো আমি এখন নতুন বাংলাদেশ নিৰ্মাণ কৰি আছো।
ইউনুছে কয় “শ্বেখ হাছিনাৰ ১৫ বছৰীয়া শাসনকালত বাংলাদেশত সকলো ধ্বংস হৈ গ’ল।তেওঁৰ চৰকাৰৰ অধীনৰ প্ৰশাসনিক গাঁথনি সম্পূৰ্ণৰূপে বৰ্বাদ হৈ গৈছে”।ইউনুছে অভিযোগ কৰিছিল যে শ্বেখ হাছিনাই শ্বাম নিৰ্বাচন অনুষ্ঠিত কৰিছিল আৰু নিজকে আৰু তেওঁৰ দলৰ বিজয়ীসকলক বিনা প্ৰতিদ্বন্দিতাত ঘোষণা কৰিছিল।তেওঁ এজন ফেচিষ্ট শাসক হিচাপে শাসন কৰিছিল”।
