ভাৰত এৰি ডিচেম্বৰত ঘূৰি যাব বাংলাদেশলৈ! শ্বেখ হাছিনাৰ বিস্ফোৰক ঘোষণা
শ্বেখ হাছিনাই চলিত বছৰৰ ডিচেম্বৰ মাহত ভাৰতৰ পৰা বাংলাদেশলৈ ঘূৰি যোৱাৰ এক অভূতপূৰ্ব ঘোষণা কৰিছে
বাংলাদেশৰ ৰাজনীতিৰ এক অতি ডাঙৰ আৰু চাঞ্চল্যকাৰী খবৰ পোহৰলৈ আহিছে । দেশখনৰৰ প্ৰাক্তন প্ৰধানমন্ত্ৰী শ্বেখ হাছিনাই চলিত বছৰৰ ডিচেম্বৰ মাহত ভাৰতৰ পৰা বাংলাদেশলৈ ঘূৰি যোৱাৰ এক অভূতপূৰ্ব ঘোষণা কৰিছে । নিজ দেশত মৃত্যুদণ্ডৰ ৰায় পোৱাৰ পিছতো হাছিনাই স্পষ্ট কৰি দিছে যে তেওঁ বাংলাদেশলৈ ঘূৰি যাব আৰু তাত থকা আদালতৰ সন্মুখত আত্মসমৰ্পণ কৰিব ।
আৱামী লীগৰ এই ৭৮ বছৰীয়া নেত্ৰীগৰাকীয়ে আন্তঃৰাষ্ট্ৰীয় সংবাদ মাধ্যমত দিয়া এক বিশেষ দূৰভাষিক সাক্ষাৎকাৰত কয় যে তেওঁৰ জীৱনৰ প্ৰতি চৰম ভাবুকি আছে, কিন্তু তথাপিও তেওঁ নিজৰ এই সিদ্ধান্ত সলনি নকৰে ।
“মই যাবই লাগিব, মোক হত্যা কৰিবও পাৰে”
প্ৰায় এঘণ্টা ধৰি চলা এই সাক্ষাৎকাৰত শ্বেখ হাছিনাই আবেগিক হৈ কয়,
“যেতিয়া মই বাংলাদেশলৈ ঘূৰি যাম, তেতিয়া মোক গ্ৰেপ্তাৰ কৰা হ’ব পাৰে, আনকি মোক হত্যাও কৰা হ’ব পাৰে । কিন্তু তথাপিও মই যাবই লাগিব । মোৰ দলৰ নেতা আৰু কৰ্মীসকলৰ ওপৰত বৰ্তমান বাংলাদেশত ভয়াৱহ অত্যাচাৰ আৰু দমন চলোৱা হৈছে । যদি মোৰ মৃত্যু লিখা আছে, তেন্তে মই বিচাৰোঁ সেই মৃত্যু মোৰ নিজৰ মাটিত হওক, য’ত মোৰ পিতৃ-মাতৃৰ কবৰ আছে আৰু য’ত তেওঁলোকৰ তেজ বৈ গৈছিল ।”
হাছিনাই লগতে প্ৰকাশ কৰে যে কেৱল তেওঁ অকলেই নহয়, বৰ্তমান দেশৰ বাহিৰত নিৰ্বাসিত হৈ থকা আৱামী লীগৰ বহু জ্যেষ্ঠ নেতাও তেওঁৰ সৈতে বাংলাদেশলৈ ঘূৰি যাব আৰু ন্যায়িক প্ৰক্ৰিয়াৰ সন্মুখীন হ’ব । এই নেতাসকলৰ তালিকাত বাংলাদেশৰ প্ৰাক্তন গৃহমন্ত্ৰী আছাদুজ্জামান খান কামালৰ নামো অন্তৰ্ভুক্ত থকাৰ সম্ভাৱনা আছে, যাক ইতিমধ্যে বাংলাদেশৰ আদালতে মৃত্যুদণ্ড বিহিছে ।
কিয় দেশ এৰিছিল শ্বেখ হাছিনাই?
উল্লেখ্য যে, ২০২৪ চনৰ ৫ আগষ্টত বাংলাদেশত তীব্ৰ হিংসাত্মক ছাত্ৰ আন্দোলন আৰু বিদ্ৰোহৰ পিছত শ্বেখ হাছিনাই প্ৰধানমন্ত্ৰী পদৰ পৰা পদত্যাগ কৰি ভাৰতলৈ পলাই আহিছিল । তেতিয়াৰে পৰা ভাৰত চৰকাৰে তেওঁক সুৰক্ষিত আশ্ৰয় প্ৰদান কৰি আহিছে ।
ইয়াৰ পিছত, ২০২৫ চনৰ নৱেম্বৰ মাহত বাংলাদেশৰ আন্তঃৰাষ্ট্ৰীয় অপৰাধ ট্ৰাইবিউনেলে ২০২৪ চনৰ প্ৰতিবাদৰ সময়ত হোৱা গণ-হত্যা আৰু দমনৰ গোচৰত শ্বেখ হাছিনাক তেওঁৰ অনুপস্থিতিতে মৃত্যুদণ্ডৰ ৰায় শুনাইছিল । অৱশ্যে হাছিনাই এই সকলোবোৰ অভিযোগক ৰাজনৈতিকভাৱে প্ৰেৰিত বুলি অভিহিত কৰি প্ৰত্যাখ্যান কৰি আহিছে ।
বৰ্তমান ঢাকাৰ শাসনত থকা প্ৰধানমন্ত্ৰী তাৰেক ৰহমানৰ নেতৃত্বাধীন বিএনপি চৰকাৰে ধাৰাবাহিকভাৱে ভাৰতৰ পৰা শ্বেখ হাছিনাক বাংলাদেশলৈ প্ৰত্যৰ্পণ কৰাৰ দাবী জনাই আহিছে । গতিকে ২০২৬ চনৰ শেষৰ ফালে শ্বেখ হাছিনাৰ এই প্ৰত্যাৱৰ্তনে বাংলাদেশৰ ৰাজনীতিত কেনেধৰণৰ ধুমুহাৰ সৃষ্টি কৰে, সেয়া সমগ্ৰ বিশ্বৰ বাবে এক ডাঙৰ চৰ্চাৰ বিষয় হৈ পৰিছে ।
লগতে পঢ়ক : ‘ট্ৰাম্পক হত্যা কৰক…’; খামেইনীৰ অন্ত্যেষ্টিক্ৰিয়াত ইৰাণৰ সমৰ্থকৰ ক্ষোভৰ জুই