ঈদৰ বন্ধৰ দিন উদযাপন কৰি ঢাকালৈ উভতি আহিছিল এই সকল লোক
বাংলাদেশত এখন যাত্ৰীবাহী বাছ নদীত বাগৰি পৰি ডুব যোৱাৰ ফলত ২৩ জন লোকৰ মৃত্যু হৈছে বুলি জানিব পৰা গৈছে । বুধবাৰে সন্ধিয়া প্ৰায় ৫.১৫ বজাত ৰাজবাৰী জিলাৰ দৌলতদিয়া টাৰ্মিনেলত এই ঘটনা সংঘটিত হয় । বাছখন ফেৰীত উঠিবলৈ চেষ্টা কৰি থকাৰ সময়তে হঠাৎ ভাৰসাম্য হেৰুৱাই পদ্মা নদীত বাগৰি পৰে ।
খবৰ অনুসৰি বাছখনত কেইবাটিও শিশুকে ধৰি প্ৰায় ৪০ জন যাত্ৰী আছিল । ঈদৰ বন্ধৰ দিন উদযাপন কৰি ঢাকালৈ উভতি আহিছিল এই সকল লোক । দুৰ্ঘটনাটোৰ পিছতে ততাতৈয়াকৈ উদ্ধাৰ আৰু সাহায্য অভিযান আৰম্ভ কৰা হয় । অত্যন্ত কঠিন পৰিস্থিতি আৰু বেয়া বতৰৰ মাজতো প্ৰায় ৬ ঘণ্টা কঠোৰ প্ৰচেষ্টাৰ অন্তত অৱশেষত ক্ৰেন ব্যৱহাৰ কৰি বাছখন নদীৰ পৰা ওলিয়াই অনা হয় ।
বাছখন উলিয়াই অনাৰ সময়ত ভিতৰত ১৪টা মৃতদেহ উদ্ধাৰ হোৱাৰ বিপৰীতে ডুবাৰুৱে ইয়াৰ পূৰ্বে দুগৰাকী মহিলাৰ মৃতদেহ উদ্ধাৰ কৰে । ইয়াৰ ফলত মুঠ মৃত্যু হোৱা নিশ্চিত লোকৰ সংখ্যা ১৬ জনলৈ বৃদ্ধি পাইছে । এতিয়াও কেইবাজনো লোক সন্ধানহীন হৈ আছে আৰু তেওঁলোকৰ সন্ধান অব্যাহত আছে । সেনা, আৰক্ষী, অগ্নিনিৰ্বাপক বাহিনী আৰু উপকূলৰক্ষী বাহিনীৰ দলসমূহে যৌথভাৱে অনুসন্ধান অভিযান চলাই আছে ।
প্ৰত্যক্ষদৰ্শীৰ মতে, বাছখন ফেৰীখনৰ কাষ চাপি অহাৰ লগে লগে এখন সৰু ইউটিলিটি ফেৰীয়ে খুন্দা মাৰে । ইয়াৰ ফলত বাছ চালকজনে নিয়ন্ত্ৰণ হেৰুৱাই আৰু বাছখন পোনে পোনে নদীত বাগৰি যায় । একাংশ যাত্ৰী সাঁতুৰি নিৰাপদ স্থানলৈ যাবলৈ সক্ষম হয় বা উদ্ধাৰ কৰা হয় যদিও বেছিভাগ যাত্ৰী বাছৰ ভিতৰত আবদ্ধ হৈ পৰে ।
লগতে পঢ়ক : পশ্চিম বংগৰ নিৰ্বাচনৰ পূৰ্বে চাঞ্চল্যৰ ঘটনা; উদ্ধাৰ ৮৪টা দেশত নিৰ্মিত বোমা
