দক্ষিণ কোৰিয়াৰ ৰাষ্ট্ৰপতি ইউন চুক-ইয়লে সামৰিক আইন জাপি দিয়াৰ প্ৰচেষ্টাৰ বাবে ৰাজহুৱাভাৱে ক্ষমা বিচাৰিছে । ৰাষ্ট্ৰীয় টেলিভিছনত সম্প্ৰচাৰিত ভাষণত তেওঁ মূৰ দোৱাই ভুল স্বীকাৰ কৰে । তেওঁৰ সম্ভাৱ্য মহাভিযোগ প্ৰক্ৰিয়াৰ ওপৰত ভোটদান হোৱাৰ পূৰ্বে এই ক্ষমা প্ৰাৰ্থনা কৰিছে ৰাষ্ট্ৰপতিগৰাকীয়ে ।
ৰাষ্ট্ৰপতিক পদৰ পৰা অপসাৰণ কৰাটো প্ৰয়োজনীয়!
শুকুৰবাৰে হানে কয় যে ইউন দেশৰ বাবে ভাবুকি আৰু তেওঁক কাৰ্যভাৰৰ পৰা অপসাৰণ কৰাৰ প্ৰয়োজন আছে, যাৰ ফলত ইউনৰ ওপৰত পদত্যাগ কৰাৰ হেঁচা বৃদ্ধি পাইছে যদিও তেওঁৰ পিপল পাৱাৰ পাৰ্টিৰ সদস্যসকলে এতিয়াও তেওঁৰ মহাভিযোগৰ বিৰোধিতা কৰিছে । বিৰোধী দল ডেম’ক্ৰেটিক পাৰ্টিৰ মহাভিযোগৰ প্ৰস্তাৱৰ ওপৰত ভোটদান শনিবাৰে অৰ্থাৎ আজি অনুষ্ঠিত হ’ব ।
ৰাষ্ট্ৰপতিয়ে হঠাতে সামৰিক আইন ঘোষণা কৰে-
ৰাষ্ট্ৰপতি ইউনে মঙলবাৰে নিশা দেশত সামৰিক আইন ঘোষণা কৰি সেনাবাহিনীক অতিৰিক্ত ক্ষমতা প্ৰদান কৰিছিল যাতে সেনাবাহিনীয়ে ‘ৰাষ্ট্ৰ বিৰোধী শক্তি’ আৰু ৰাজনৈতিক বিৰোধীৰ বিৰুদ্ধে ব্যৱস্থা ল’ব পাৰে । ২০১৬ চনত তেতিয়াৰ ৰাষ্ট্ৰপতি পাৰ্ক গেউন-হাইৰ বিৰুদ্ধে মহাভিযোগ দাখিলৰ দৰে পৰিস্থিতিৰ পৰা হাত সাৰিবলৈ পি পি পিৰ কিছু সদস্যই ইউনক ভোটদানৰ পূৰ্বে পদত্যাগ কৰিবলৈ পৰামৰ্শ দিছিল ।
দুৰ্নীতিৰ কেলেংকাৰীৰ সময়ত ৰাজহুৱা প্ৰতিবাদৰ পিছত পাৰ্কৰ বিৰুদ্ধে অভিযোগনামা দাখিল কৰা হৈছিল, যাৰ ফলত শেষত দলটোৰ পৰাজয় হয় । এই প্ৰতিবাদৰ কথা মনত পেলাই শুকুৰবাৰে নিশা সংসদৰ বাহিৰত হাজাৰ হাজাৰ লোক সমবেত হৈ ইউনৰ বিৰুদ্ধে অভিযোগনামা দাখিল কৰে । ভোটদানৰ পূৰ্বে আৰু অধিক বিক্ষোভৰ সম্ভাৱনা আছে ।
