মহাকাশচাৰী সুনীতা উইলিয়ামছ আৰু তেওঁৰ সহযোগী জুন মাহৰ পৰা মহাকাশত আবদ্ধ হৈ আছে । এই সময়ছোৱাত বৰদিনৰ দিনা আন্তঃৰাষ্ট্ৰীয় মহাকাশ কেন্দ্ৰৰ পৰা তোলা ছবিত সুনীতা উইলিয়ামছক অতি ক্ষীণ দেখা গৈছে । এই ফটো দেখি তেওঁৰ ওজন দ্ৰুতগতিত কমিছে বুলি জল্পনা-কল্পনা কৰা হৈছে । কিন্তু মহাকাশত কোনো মহাকাশচাৰী অসুস্থ হৈ পৰিলে কোন চিকিৎসকে চিকিৎসা প্ৰদান কৰে জানেনে ?
মহাকাশৰ পৰা কেতিয়া ঘূৰি আহিব সুনীতা উইলিয়ামছ ?
ভাৰতীয় মূলৰ মহাকাশচাৰী সুনীতা উইলিয়ামছ আৰু তেওঁৰ সহযোগী বুশ্ব উইলম’ৰ মহাকাশত আবদ্ধ হৈ আছে । তেওঁলোক এটা অভিযানৰ অধীনত মাত্ৰ ৮ দিনৰ বাবে মহাকাশলৈ গৈছিল, কিন্তু মহাকাশযানখনৰ সমস্যাৰ বাবে তেওঁলোকৰ উভতি অহাটো পিছুৱাই দিয়া হৈছিল । ছমাহ পাৰ হৈ গ’ল আৰু দুয়োজন মহাকাশচাৰী এতিয়াও আন্তঃৰাষ্ট্ৰীয় মহাকাশ কেন্দ্ৰতে আছে । মহাকাশৰ পৰা অহা ছবি মতে, সুনীতা উইলিয়ামছৰ অৱস্থালৈ চাই তেওঁৰ অতি অসুস্থ বুলি অনুমান কৰা হৈছে । ফটোবোৰত তেওঁৰ গাল দুখন সোমাই যোৱা যেন লাগিছে ।
মহাকাশত চিকিৎসক কোন ?
এতিয়া প্ৰশ্ন হয়, মহাকাশত অসুস্থ হ’লে কোনে চিকিৎসা কৰে, তাত কোনো চিকিৎসক উপস্থিত থাকে নেকি ? উল্লেখ্য যে, মহাকাশত চিকিৎসকৰ কোনো উপস্থিতি নাই । কিন্তু চিকিৎসাৰ বাবে বহুতো পদ্ধতি আৰু সামগ্ৰী উপলব্ধ থাকে । যেনেদৰে টেলিমেডিচিন থাকে । মহাকাশত চিকিৎসাৰ আটাইতকৈ ডাঙৰ পদ্ধতি হ’ল টেলিমেডিচিন । ইয়াত পৃথিৱীত বহি থকা চিকিৎসকে ভিডিঅ’ কল বা অন্য মাধ্যমেৰে সংযোগ কৰি মহাকাশচাৰীসকলৰ চিকিৎসা কৰে ।
চিকিৎসা সঁজুলি উপলব্ধ-
ইয়াৰ উপৰিও মহাকাশচাৰীসকলৰ চিকিৎসা সঁজুলিও আছে যাৰ সহায়ত সৰু সৰু চিকিৎসা কৰিব পাৰি । য’ত বেণ্ডেজ, বিষনাশক, এন্টিবায়টিক, বেজী আৰু কিছুমান অস্ত্ৰোপচাৰৰ সঁজুলিও অন্তৰ্ভুক্ত থাকে । জটিল পৰিস্থিতিৰ ক্ষেত্ৰত কিছুমান মহাকাশযানত অক্সিজেন চিলিণ্ডাৰ আৰু ভেণ্টিলেটৰ আদি সঁজুলিও থাকে । উল্লেখ্য যে মহাকাশলৈ যোৱাৰ আগতে মহাকাশচাৰীসকলক প্ৰশিক্ষণ দিয়া হয় যাতে তেওঁলোকে তাত থকা পৰিৱেশৰ লগত সহজে খাপ খাব পাৰে । ইয়াৰ লগত ঔষধ আৰু ভিটামিন টেবলেটো পঠিওৱা হয়, যিবোৰ তেওঁলোকে জৰুৰীকালীন অৱস্থাত ব্যৱহাৰ কৰিব পাৰে ।
মহাকাশৰ পৰা উভতি অহাৰ লগে লগে অসুস্থ হোৱাৰ আশংকা-
উল্লেখ্য যে মহাকাশত পৃথিৱীৰ তুলনাত খাদ্য আৰু পানীৰ ব্যৱহাৰ অলপ বেলেগ ধৰণে হয়, যাৰ ফলত পাচনতন্ত্ৰৰ সমস্যা হ’ব পাৰে । একে সময়তে পৃথিৱীৰ পৰা বহু দূৰত থাকিলে মানুহৰ নিসংগতা আৰু মানসিক চাপ বৃদ্ধি পাব পাৰে । ইয়াৰ বাহিৰেও মহাকাশৰ পৰা উভতি অহা প্ৰায়বোৰ যাত্ৰীৰ ৰক্তহীনতাৰ অভিযোগ দেখা যায় ।
