শেহতীয়াকৈ হিন্দী চিনেমাৰ বিখ্যাত চলচ্চিত্ৰ নিৰ্মাতা অনুৰাগ কাশ্যপে প্ৰকাশ কৰিছে যে তেওঁ মুম্বাই এৰি এতিয়া দক্ষিণ ভাৰতত নিজৰ স্থান গঢ়িবলৈ চেষ্টা কৰিছে । বলীউডক ‘বিষাক্ত’ বুলি অভিহিত কৰি তেওঁ কয় যে এই উদ্যোগটো এতিয়া সৃষ্টিশীলতাৰ পৰিৱৰ্তে ধনৰ পিছতহে দৌৰি আছে । অনুৰাগে কয় যে তেওঁ এই ছবি জগতৰ পৰা আঁতৰি থাকিব বিচাৰে কাৰণ ইয়াত সকলোৱে ৫০০-৮০০ কোটি টকাৰ ছবি নিৰ্মাণৰ দৌৰত ব্যস্ত ।
তেওঁৰ মতে, এতিয়া ছবি নিৰ্মাণৰ মজা শেষ হৈছে আৰু এই কাৰণেই তেওঁ মুম্বাই এৰি যোৱাৰ সিদ্ধান্ত লৈছে । সূত্ৰ অনুসৰি অনুৰাগ কাশ্যপ বৰ্তমান বাংগালুৰুত বাস কৰি আছে । ইয়াৰ পূৰ্বেও তেওঁ হিন্দী চলচ্চিত্ৰ জগতৰ প্ৰতি অসন্তুষ্টি প্ৰকাশ কৰিছিল । হলিউড ৰিপ’ৰ্টাৰ ইণ্ডিয়াৰ সৈতে হোৱা এক বাৰ্তালাপত তেওঁ কয় যে তেওঁ দক্ষিণ ভাৰতীয় চলচ্চিত্ৰ নিৰ্মাতাসকলৰ প্ৰতি ঈৰ্ষা অনুভৱ কৰে কাৰণ তেওঁলোকে কোনো ধৰণৰ হেঁচা নোহোৱাকৈ নিজৰ পছন্দ অনুসৰি ছবি নিৰ্মাণ কৰিব পাৰে ।
বলিউড এৰিলে অনুৰাগ কাশ্যপে-
তেওঁ লগতে কয় যে এতিয়া ছবি নিৰ্মাণ কৰাৰ আগতে প্ৰযোজকসকলে কেৱল ইয়াৰ লাভ-লোকচানৰ ওপৰতহে গুৰুত্ব দিয়ে । ইয়াৰ ফলত সৃষ্টিশীল পৰিবেশ ধ্বংস হয় আৰু চলচ্চিত্ৰ নিৰ্মাণক বোজাৰ দৰে অনুভৱ কৰিবলৈ আৰম্ভ কৰে । অনুৰাগ কাশ্যপে কয় যে শিল্পতকৈ ধনক অধিক গুৰুত্ব দিয়া পৰিৱেশত তেওঁ এতিয়া কাম কৰিব নিবিচাৰে । তেওঁ কয় যে আগতে চলচ্চিত্ৰ নিৰ্মাণ এক সৃষ্টিশীল প্ৰক্ৰিয়া আছিল যদিও এতিয়া ই কেৱল এটা ব্যৱসায়ত পৰিণত হৈছে ।
বলীউডক বিষাক্ত বুলি ক’লে-
অনুৰাগে লগতে কয় যে অতি সোনকালে তেওঁ মুম্বাই সম্পূৰ্ণৰূপে এৰি দক্ষিণত বসতি স্থাপন কৰিব । তেওঁ কয়, ‘এতিয়া মোৰ বাবে পৰীক্ষা-নিৰীক্ষা কৰাটো কঠিন হৈ পৰিছে, কাৰণ নিৰ্মাতাসকলে কেৱল লাভৰ কথাহে চিন্তা কৰে ।’ তেওঁ বলীউডক বিষাক্ত বুলিও অভিহিত কৰে । সম্প্ৰতি অনুৰাগ কাশ্যপ মালয়ালম ছবি ‘ফুটেজ’ৰ প্ৰচাৰত ব্যস্ত । এই ছবিখন পৰিচালনা কৰিছে ছাইজু শ্ৰীধৰণে ।
দক্ষিণৰ চিনেমাৰ প্ৰৱণতা-
ছবিখনত দেখা যাব মঞ্জু ৱাৰিয়ৰ, বিশক নাইৰ, গায়ত্ৰী অশোকৰ দৰে অভিনেতাক । এই ছবিখন যোৱা বছৰৰ আগষ্ট মাহত মুক্তি পাইছিল যদিও ইয়াৰ হিন্দী সংস্কৰণ ২০২৫ চনৰ ৭ মাৰ্চত মুক্তি পাব । অনুৰাগে বিশ্বাস কৰে যে দক্ষিণ উদ্যোগত এতিয়াও সঁচা আৰু ভাল কাহিনীৰ ওপৰত কাম চলি আছে । আগন্তুক সময়ত অনুৰাগ কাশ্যপকো অভিনেতা হিচাপে দেখা যাব । ‘ডকাইত’ ছবিখনত তেওঁ এজন আৰক্ষী বিষয়াৰ চৰিত্ৰত অভিনয় কৰিছে ।
