প্ৰখ্যাত চলচ্চিত্ৰ নিৰ্মাতা তথা সাংবাদিক প্ৰীতিশ নন্দীয়ে ৮ জানুৱাৰীত ৭৩ বছৰ বয়সত শেষ নিশ্বাস ত্যাগ কৰে । তেওঁৰ মৃত্যুত চিনেমা আৰু সাংবাদিকতাৰ জগতখনত শোকৰ সৃষ্টি হৈছে । তেওঁৰ বন্ধু তথা অভিনেতা অনুপম খেৰে নন্দীৰ মৃত্যুত গভীৰ শোক প্ৰকাশ কৰিছে ।

তেওঁ ছ’চিয়েল মিডিয়াত লিখিছে যে প্ৰীতিশ মোৰ চাপৰ্ট ছিষ্টেম আছিল । তেওঁ আছিল এজন মেধাৱী কবি, সাহিত্যিক আৰু চলচ্চিত্ৰ নিৰ্মাতা । তেওঁৰ মৃত্যুৰ লগে লগে মই এজন ঘনিষ্ঠ বন্ধুক হেৰুৱালোঁ । অভিনেতা নীল নীতিন মুকেশৰ লগতে অন্যান্য চলচ্চিত্ৰ ব্যক্তিসকলেও তেওঁৰ মৃত্যুত শোক প্ৰকাশ কৰে ।

কোন আছিল প্ৰীতিশ নন্দী ?

১৯৫১ চনত বিহাৰৰ ভাগলপুৰত জন্মগ্ৰহণ কৰা প্ৰীতিশ নন্দীয়ে সাংবাদিকতা, চলচ্চিত্ৰ নিৰ্মাণ আৰু সাহিত্যত নিজৰ নাম উজলাইছিল । তেখেত আছিল এজন মহান কবি, সাহিত্যিক আৰু চলচ্চিত্ৰ নিৰ্মাতা । ১৯৯৩ চনত প্ৰীতিশ নন্দী কমিউনিকেচন প্ৰতিষ্ঠা কৰি ইয়াৰ বেনাৰত কেইবাখনো সফল ছবি নিৰ্মাণ কৰিছিল তেওঁ ।

সাংবাদিকতাৰ পৰা চিনেমালৈ যাত্ৰা-

প্ৰীতিশ নন্দীয়ে সাংবাদিকতাৰ জৰিয়তে নিজৰ কেৰিয়াৰ আৰম্ভ কৰিছিল । তেওঁৰ দূৰদৰ্শন অনুষ্ঠান The Pritish Nandy Show ৯০ দশকত অত্যন্ত জনপ্ৰিয় হৈ পৰিছিল । দ্য ইলাষ্ট্ৰেটেড উইকলি অৱ ইণ্ডিয়াৰ সম্পাদক হিচাপেও তেওঁ ইয়াক দেশৰ অন্যতম সন্মানীয় প্ৰকাশন হিচাপে গঢ়ি তুলিছিল ।

চলচ্চিত্ৰ নিৰ্মাণত অৱদান-

প্ৰীতিশ নন্দীয়ে তেওঁৰ প্ৰডাকচন হাউচৰ অধীনত বহুতো ডাঙৰ ডাঙৰ চিনেমা নিৰ্মাণ কৰিছিল । তেওঁৰ কিছুমান স্মৰণীয় চিনেমা হ’ল-

সুৰ, কাঁটে, ঝংকাৰ বিটছ, চামেলী, হাজাৰো খোৱাইছি এইছি, প্যাৰ কা ছাইড এফেক্ট ।

ৱেব ছিৰিজৰ জগতখনতো খোজ দি ফোৰ ম’ৰ শ্বটছ প্লিজ আৰু মডাৰ্ণ লাভ মুম্বাইৰ দৰে হিট ছিৰিজ নিৰ্মাণ কৰিছিল তেওঁ ।

ৰাজনীতিত প্ৰৱেশ-

১৯৯৮ চনত শিৱসেনাৰ টিকটত ৰাজ্যসভাৰ সদস্য হিচাপেও ৰাজনীতিত নিজৰ নাম উজলাইছিল প্ৰীতিশ নন্দীয়ে । ছবছৰ সংসদত থাকি সামাজিক বিষয়ত নিজৰ মতামত প্ৰকাশৰ বাবে জনাজাত আছিল তেওঁ ।

যোৱা কেইমাহমানৰ পৰা গায়ক দিলজিৎ দোছাঞ্জে সমগ্ৰ দেশতে নিজৰ সংগীত কনচাৰ্ট কৰি আছে । তেওঁৰ সংগীত ভ্ৰমণ দেশৰ বিভিন্ন ৰাজ্যত কৰিছিল, এই সংগীত ভ্ৰমণৰ নাম আছিল দিল লুমিনাটি । এই অনুষ্ঠানৰ জৰিয়তে দিলজিতে সমগ্ৰ দেশৰ সংগীতপ্ৰেমীৰ হৃদয় জয় কৰিছিল । তেওঁৰ সংগীত আৰু হৃদয় জয় কৰা কলাক প্ৰশংসা কৰিছে প্ৰধানমন্ত্ৰী মোদীয়ে । শেহতীয়াকৈ কণ্ঠশিল্পী দিলজিৎ দোছাঞ্জে প্ৰধানমন্ত্ৰী নৰেন্দ্ৰ মোদীক সাক্ষাৎ কৰে । দিলজিতে এই বৈঠকৰ ভিডিঅ’ নিজৰ ইনষ্টাগ্ৰাম পেজত শ্বেয়াৰ কৰিছে ।

প্ৰধানমন্ত্ৰীয়ে কয় হৃদয় জয় কৰা এজন ব্যক্তি-
ভিডিঅ’টোত প্ৰধানমন্ত্ৰী মোদীয়ে দিলজিতক কৈছে যে ভাৰতৰ এখন গাঁৱৰ ল’ৰাই যেতিয়া নিজৰ নাম পৃথিৱীত উজ্জ্বল কৰি তোলে ভাল লাগে । প্ৰধানমন্ত্ৰী মোদীয়ে আৰু কয় যে আপোনাৰ নাম দিলজিৎ আৰু আপুনি সকলোৰে হৃদয় জয় কৰি আছে ।

ভাৰতৰ মহত্ত্বৰ ওপৰত আলোচনা হৈছিল-
প্ৰধানমন্ত্ৰী মোদীৰ সৈতে কথা পাতি থাকোঁতে গায়ক দিলজিতে কয় যে তেওঁ শৈশৱতে শুনিছিল যে ভাৰত এখন মহান দেশ । কিন্তু যেতিয়া তেওঁ নিজৰ দেশখন দেখি আৰু বুজি পালে, তেতিয়া তেওঁ উপলব্ধি কৰিলে যে আমাৰ দেশখন সঁচাকৈয়ে মহান । এই সন্দৰ্ভত প্ৰধানমন্ত্ৰীয়ে কয় যে আমাৰ দেশ আৰু সংস্কৃতি অতি জীৱন্ত ।

যোগৰ গুৰুত্বৰ ওপৰত আলোচনা-
প্ৰধানমন্ত্ৰী মোদী আৰু দিলজিতৰ মাজত হোৱা বৈঠকৰ এই ভিডিঅ’টোত যোগৰ বিষয়েও আলোচনা কৰা দেখা গৈছে । দিলজিতে কয় যে যোগৰ শক্তি অপৰিসীম, প্ৰধানমন্ত্ৰী মোদীয়েও এই কথাত সন্মতি প্ৰকাশ কৰে ।
ইফালে এই সাক্ষাতৰ ভিডিঅ’ত দিলজিতে এটা ভক্তিমূলক গীত গোৱা দেখা গৈছিল, যাৰ বাবে প্ৰধানমন্ত্ৰী মোদীয়ে ওচৰতে ৰখা টেবুলত তবলা সদৃশ তাল দিবলৈ আৰম্ভ কৰে । এই কথা দেখি গায়ক দিলজিত বৰ আনন্দিত হৈছিল । সাক্ষাতৰ শেষত প্ৰধানমন্ত্ৰীয়ে গায়কজনৰ প্ৰতিভাৰ প্ৰশংসা কৰে ।