বিহু নৃত্যৰ পিছত এইবাৰ বিশ্ব অভিলেখ গঢ়িবলৈ সাজু হৈছে ঝুমুৰ নৃত্যই।একেলগে একেস্থানত আঠ সহস্ৰাধিক নাচনীয়ে পৰিৱেশন কৰিব ঝুমুৰ নৃত্য ।
ইতিমধ্যে সৰুসজাইত অন্তিম অনুশীলনত ব্যস্ত হাজাৰ হাজাৰ শিল্পী।২৪ ফেব্ৰুৱাৰী সোমবাৰে সৰুসজাই ক্রীড়া প্রকল্পত অনুষ্ঠিত হ’বলগীয়া ‘ঝুমইৰ বিনন্দিনী’ অনুষ্ঠানত অংশগ্ৰহণ কৰিব ৬০ দেশৰ ৰাষ্ট্ৰদূতে ।
চাহ বাগিচা অঞ্চলৰ ৮ হাজাৰৰো অধিক যুৱক-যুৱতীৰ ঝুমুৰ নৃত্য প্ৰদৰ্শনৰ ঐতিহাসিক মুহূৰ্তৰ সাক্ষী হ’ব এই ৬০ দেশৰ ৰাষ্ট্ৰদূতসকল । ইতিমধ্যে এই কথা সদৰী কৰিছে মুখ্যমন্ত্ৰী ড০ হিমন্ত বিশ্ব শৰ্মাই।
সোমবাৰে সৰুসজাই ষ্টেডিয়ামত প্ৰধানমন্ত্ৰী নৰেন্দ্ৰ মোদীৰ উপস্থিতিত পৰিবেশন কৰা হ’ব ঝুমুৰ নৃত্য। কাইলৈ ৫.৩০ বজাত প্ৰধানমন্ত্ৰীৰ সন্মুখত প্ৰদৰ্শন কৰা হ’ব ঝুমুইৰ বিনন্দিনী।
তাৰ বাবে দৰ্শক সকলে সোমবাৰে বিয়লি ৩ বজাৰ লগে লগে ষ্টেডিয়ামৰ ভিতৰত প্ৰৱেশ কৰিব লাগিব। ঝুমুইৰ প্ৰদৰ্শনৰ পূৰ্বে প্ৰধানমন্ত্ৰীয়ে বিশেষ বাহনেৰে ষ্টেডিয়ামখন পৰিভ্ৰমণ কৰিব বুলি উল্লেখ কৰে মুখ্যমন্ত্ৰী গৰাকীয়ে।
ইফালে ‘ঝুমইৰ বিনন্দিনী’ কাৰ্যসূচীত অংশগ্ৰহণ কৰা ৮৫০০ গৰাকী অংশগ্ৰহণকাৰীক ২৫ হাজাৰ টকাকৈ আগবঢ়োৱাৰ কথা ঘোষণা কৰিথে মুখ্যমন্ত্ৰী গৰাকীয়ে ।
সকলো প্ৰস্তুতি সম্পূৰ্ণ কৰি তোলা হৈছে । অপেক্ষা মাথোঁ সেই ঐতিহাসিক ক্ষণৰ । যিটো ক্ষণত দেশৰ প্ৰধানমন্ত্ৰী নৰেন্দ্ৰ মোদীৰ উপস্থিতিত উদ্ভাসিত হ’ব ঝুমুৰ নৃত্য ।
