ভাৰতৰ তাৰকা জেভেলিন থ্ৰ’ৱাৰ নীৰজ চোপ্ৰাই জীৱনৰ এক নতুন অধ্যায় আৰম্ভ কৰিছে । সকলোকে আচৰিত কৰি তেওঁ বিবাহপাশত আৱদ্ধ হৈছে । দেওবাৰে তেওঁৰ ছ’চিয়েল মিডিয়া হেণ্ডেলৰ জৰিয়তে এই কথা ঘোষণা কৰে । নিজৰ বিয়াৰ ফটো ইনষ্টাগ্ৰামত শ্বেয়াৰ কৰি তেওঁ লিখিছে, ‘পৰিয়ালৰ সৈতে জীৱনৰ এক নতুন অধ্যায় আৰম্ভ কৰিছোঁ । এই মুহূৰ্তত আমাক একত্ৰিত কৰা প্ৰতিটো আশীৰ্বাদৰ বাবে কৃতজ্ঞ ।’ উল্লেখ্য যে, নীৰজৰ জীৱন সংগীৰ নাম হিমানী । ১৯ জানুৱাৰী দেওবাৰে, ছ’চিয়েল মিডিয়া প্লেটফৰ্মত নিজৰ বিয়াৰ ৩খন ফটো শ্বেয়াৰ কৰি অনুৰাগীসকলক এই বিষয়ে অৱগত কৰে নীৰজে ।
ফটো শ্বেয়াৰ কৰি অৱগত কৰিলে অনুৰাগীক-
২৭ বছৰীয়া নীৰজে নিজৰ ছ’চিয়েল মিডিয়া প্লেটফৰ্মত পত্নী হিমানীৰ সৈতে তেওঁৰ বিয়াৰ ফটো শ্বেয়াৰ কৰে য’ত পৰিয়ালৰ দুই এজন সদস্যকহে দেখা গৈছে । মাতৃৰ সৈতেও এখন ফটো পোষ্ট কৰে তেওঁ ।
উল্লেখ্য যে, বৰ্তমান সময়ত নীৰজৰ পত্নী হিমানী কোন আৰু তেওঁ কি কৰে সেই সন্দৰ্ভত কোনো তথ্য পোৱা হোৱা নাই আৰু নীৰজেও এই সন্দৰ্ভত একো প্ৰকাশ কৰা নাই । দুয়োৰে পুৰণি সম্পৰ্ক আছে নে পৰিয়ালৰ পছন্দ অনুসৰি নীৰজে বিবাহপাশত আবদ্ধ হৈছে সেয়াও স্পষ্ট হোৱা নাই ।
২৭ বছৰীয়া নীৰজ চোপ্ৰাই টকিঅ’ অলিম্পিকত জেভলিন থ্ৰ’ ইভেণ্টত স্বৰ্ণ পদক লাভ কৰাৰ বিপৰীতে পেৰিছ অলিম্পিকত ৰূপৰ পদক লাভ কৰিছিল ।
