বাংলাদেশৰ হিন্দুৰ ওপৰত চলি থকা অত্যাচাৰৰ বিৰুদ্ধে দিল্লীত বৃহৎ বিক্ষোভ প্ৰদৰ্শন । বাংলাদেশ উচ্চায়ুক্তৰ বাহিৰত বিভিন্ন শ্লোগানেৰে এই বিক্ষোভ প্ৰদৰ্শন কৰিছে হাজাৰ হাজাৰ প্ৰতিবাদকাৰীয়ে । প্ৰতিবাদকাৰীসকলৰ ভিতৰত সাধু-সন্ত আৰু মহিলাও অন্তৰ্ভুক্ত আছে । প্ৰতিবাদত বাংলাদেশত হিন্দুৰ ওপৰত চলি থকা অত্যাচাৰ বন্ধ কৰাৰ দাবী উত্থাপন কৰিছে প্ৰতিবাদকাৰীসকলে ।
উল্লেখ্য যে, শ্বেখ হাছিনাৰ চৰকাৰ উৎখাত হোৱাৰ পিছত বাংলাদেশত সংখ্যালঘু, বিশেষকৈ হিন্দুৰ ওপৰত আক্ৰমণৰ ঘটনা বৃদ্ধি পাইছে । যোৱা মাহত হিন্দু ধৰ্মগুৰু চিন্ময় কৃষ্ণ দাসক গ্ৰেপ্তাৰ কৰাৰ পিছত এই আক্ৰমণ আৰু অধিক বৃদ্ধি পাইছিল ।
ভাৰতৰ বৈদেশিক সচিব বিক্ৰম মিশ্ৰী ঢাকাত থকাৰ সময়তে বাংলাদেশ উচ্চায়ুক্তৰ বাহিৰত এই বিক্ষোভ সংঘটিত হৈছে । মাত্ৰ এদিন পূৰ্বে বৈদেশিক সচিব মিশ্ৰীয়ে হিন্দুসকলৰ ওপৰত অত্যাচাৰৰ বিষয়টো উত্থাপন কৰিছিল । বিক্ৰম মিশ্ৰীয়ে এই বিষয়টো বাংলাদেশৰ বিদেশ উপদেষ্টা মহম্মদ তৌহিদ হুছেইনৰ আগত উত্থাপন কৰিছিল । হুছেইনক সাক্ষাৎ কৰাৰ পাছত বৈদেশিক সচিব মিশ্ৰীয়ে কয়, ‘… আমিও শেহতীয়া পৰিঘটনাসমূহৰ বিষয়ে আলোচনা কৰি সংখ্যালঘুৰ সুৰক্ষা আৰু কল্যাণ সন্দৰ্ভত আমাৰ উদ্বেগ প্ৰকাশ কৰিলোঁ… সাংস্কৃতিক আৰু ধৰ্মীয় সম্পত্তিৰ ওপৰত আক্ৰমণৰ দুখজনক ঘটনাক লৈ আমি উদ্বেগ প্ৰকাশ কৰিলোঁ ।’
ইয়াৰ পূৰ্বে চিন্ময় কৃষ্ণ দাসক গ্ৰেপ্তাৰ কৰা ঘটনাক ভাৰতৰ বৈদেশিক মন্ত্ৰালয়ে গৰিহণা দিছিল । বৈদেশিক পৰিক্ৰমা মন্ত্ৰালয়ে নিজৰ বিবৃতিত উল্লেখ কৰিছিল যে সংখ্যালঘু লোকৰ ঘৰ-দোকান অগ্নিসংযোগ আৰু লুণ্ঠনৰ লগতে মন্দিৰ অপবিত্ৰ কৰাৰ কেইবাটাও গোচৰ পঞ্জীয়ন কৰা হৈছে । এই ঘটনাৰ দোষীয়ে এতিয়াও মুক্তভাৱে ঘূৰি ফুৰিছে, আনহাতে শান্তিপূৰ্ণভাৱে বৈধ দাবী উত্থাপন কৰা ধৰ্মগুৰুসকলৰ বিৰুদ্ধে অভিযোগ উত্থাপন হৈছে ।
