সোমবাৰে প্ৰধানমন্ত্ৰী নৰেন্দ্ৰ মোদীয়ে জম্মু-কাশ্মীৰৰ সোণমাৰ্গ অঞ্চলত কৌশলগতভাৱে গুৰুত্বপূৰ্ণ Z-Morh সুৰংগ বা টানেল উদ্বোধন কৰে । ইয়াৰ লগে লগে এই পৰ্যটনস্থলীটো গোটেই বছৰটোৰ বাবে উপলদ্ধ হৈ পৰে । এই উপলক্ষে কেন্দ্ৰীয় মন্ত্ৰী নীতিন গাডকাৰী, জম্মু-কাশ্মীৰৰ উপ-ৰাজ্যপাল মনোজ সিনহা, মুখ্যমন্ত্ৰী ওমৰ আব্দুল্লাকে ধৰি অন্যান্য বিষয়াসকলো উপস্থিত থাকে ।
২৭০০ কোটি টকা ব্যয় সাপেক্ষে নিৰ্মাণ কৰা প্ৰকল্পটো উদ্বোধন কৰাৰ পিছত প্ৰধানমন্ত্ৰীয়ে সুৰংগটো পৰিদৰ্শন কৰি নিৰ্মাণ বিষয়াৰ সৈতে মত বিনিময় কৰে । এই সময়ত প্ৰধানমন্ত্ৰীয়ে নিৰ্মাণ দলৰ পৰা সুৰংগ নিৰ্মাণৰ ক্ষেত্ৰত সন্মুখীন হোৱা অসুবিধা আৰু প্ৰত্যাহ্বানৰ তথ্য গ্ৰহণ কৰে ।
৬.৫ কিলোমিটাৰ দৈৰ্ঘ্যৰ এই দুইলেনযুক্ত দ্বিমুখী সুৰংগটো গণ্ডাৰবল জিলাৰ গগনগীৰ আৰু সোণমাৰ্গৰ মাজত নিৰ্মাণ কৰা হৈছে । জৰুৰীকালীন পৰিস্থিতিৰ বাবে এই সুৰংগটোত ৭.৫ মিটাৰ বহল পলায়ন পথো নিৰ্মাণ কৰা হৈছে । সমুদ্ৰপৃষ্ঠৰ পৰা ৮৬৫০ ফুট উচ্চতাত অৱস্থিত এই সুৰংগটোৱে শ্ৰীনগৰ আৰু সোণমাৰ্গৰ মাজত সৰ্ববস্তৰৰ সংযোগ শক্তিশালী কৰাৰ লগতে ভূমিস্খলন আৰু হিমস্খলনৰ পৰা হাত সাৰিবলৈ সহায় কৰিব ।
প্ৰধানমন্ত্ৰী মোদীয়ে জম্মু-কাশ্মীৰ ভ্ৰমণৰ সময়ত এই প্ৰকল্পৰ গুৰুত্বৰ ওপৰত আলোকপাত কৰে । এই সুৰংগই সোণামাৰ্গক গোটেই বছৰটো পৰ্যটনৰ বাবে সুলভ কৰি তুলিব, যাৰ ফলত স্থানীয় পৰ্যটন, দুঃসাহসিক ক্ৰীড়া আৰু কৰ্মসংস্থাপন বৃদ্ধি পাব । জোজিলা সুৰংগৰ লগতে এই সুৰংগ প্ৰকল্পই কাশ্মীৰ উপত্যকা আৰু লাডাখৰ মাজত অধিক সহজ যাত্ৰাৰ সুবিধা প্ৰদান কৰাৰ লগতে প্ৰতিৰক্ষা, অৰ্থনৈতিক উন্নয়ন আৰু সাংস্কৃতিক সংহতিৰ ক্ষেত্ৰতো অৰিহণা যোগাব ।
২০১৫ চনৰ মে’ মাহত Z-Morh সুৰংগটোৰ কাম আৰম্ভ হৈছিল আৰু ইয়াৰ পূৰ্বে ২০১৬-২০১৭ চনত এই প্ৰকল্পটো সম্পূৰ্ণ হোৱাৰ কথা আছিল যদিও ২০১৮ চনত আৰ্থিক সংকটৰ বাবে কাম বন্ধ হৈ পৰে । ইয়াৰ পিছত ২০১৯ চনত এই প্ৰকল্পটো পুনৰ নিবিদা মুকলি কৰি এপকো ইনফ্ৰাটেকক প্ৰদান কৰা হয় ।
