বৰষুণৰ ফলত দক্ষিণ ভাৰতত স্বাভাৱিক জীৱন যাত্ৰাত ব্যাঘাত জন্মিছে । বতৰ বিজ্ঞান বিভাগে তামিলনাডু আৰু অন্ধ্ৰপ্ৰদেশত আগন্তুক ২৪ ঘন্টাত ধাৰাসাৰ বৰষুণৰ সতৰ্কবাণী জাৰি কৰিছে । এক প্ৰতিবেদন অনুসৰি বেয়া বতৰৰ সতৰ্কবাণীৰ প্ৰতি লক্ষ্য ৰাখি তামিলনাডুৰ চেন্নাই আৰু আন ১০খন জিলাত আজি অৰ্থাৎ ২০২৪ চনৰ ১২ ডিচেম্বৰত বিদ্যালয় বন্ধ ঘোষণা কৰা হৈছে ।
এই জিলাসমূহত বিদ্যালয় বন্ধ ঘোষণা-
বৃহস্পতিবাৰে ৰাজ্যখনৰ ১১খন জিলাৰ ভিতৰত ভিল্লুপুৰম, থাঞ্জাভুৰ, মায়লাদুথুৰাই, পুডুক্কোট্টাই, কুড্ডালোৰ, ডিণ্ডিগুল, ৰামনাথাপুৰম, তিৰুভাৰুৰ, ৰানিপেট, তিৰুভাল্লুৰ আৰু চেন্নাইত বিদ্যালয় বন্ধ ঘোষণা কৰা হৈছে । আই এম ডিয়ে তামিলনাডু, পুডুচেৰী আৰু কাৰাইকালৰ ওপৰত লঘুৰ পৰা মধ্যমীয়া বৰষুণৰ ভৱিষ্যদ্বাণী কৰাৰ বিপৰীতে আৰিয়ালুৰ, থাঞ্জাভুৰ, তিৰুভাৰুৰ আৰু পুডুক’টাই জিলাৰ ওপৰত প্ৰচণ্ডৰ পৰা অতি প্ৰচণ্ড বৰষুণৰ সম্ভাৱনা প্ৰকাশ কৰিছে । ইয়াৰ উপৰিও আন বিভিন্ন ঠাইত বৰষুণ আৰু বজ্ৰপাতৰ সম্ভাৱনাও আছে ।
প্ৰচণ্ড বৰষুণ সন্দৰ্ভত আই এম ডিয়ে জাৰি কৰিছে সতৰ্কবাণী-
তামিলনাডু, পুডুচেৰী, কৰাইকাল, কেৰালা আৰু মাহেত হোৱা ধাৰাসাৰ বৰষুণৰ বাবে আগন্তুক দুদিনলৈ অৰেঞ্জ এলাৰ্ট জাৰি কৰা হৈছে । উপকূলীয় অন্ধ্ৰপ্ৰদেশ, য়ানাম, ৰায়ালাসীমা আৰু দক্ষিণ অভ্যন্তৰীণ কৰ্ণাটকত বৰষুণৰ বাবে য়েল্ল এলাৰ্ট জাৰি কৰা হৈছে । বৰষুণৰ প্ৰভাৱ কমোৱাৰ বাবে এন ডি আৰ এফ আৰু ৰাজ্যিক জৰুৰীকালীন দল মোতায়েন কৰা হৈছে । ১৩ ডিচেম্বৰলৈকে মাছমৰীয়াসকলক সাগৰত নাযাবলৈ পৰামৰ্শ দিয়া হৈছে । তামিলনাডুত চলিত বৰ্ষত মুষলধাৰ বৰষুণৰ ৰেকৰ্ড কৰা হৈছে ।
সাধাৰণ নাগৰিকক ঘৰৰ ভিতৰতে থাকিবলৈ পৰামৰ্শ-
নৱেম্বৰ মাহত তিৰুভাৰুৰ, কুড্ডালোৰ, নাগাপট্টিনাম আৰু মায়লাদুথুৰাই জিলাত একেধৰণৰ বতৰৰ বাবে বিদ্যালয়-মহাবিদ্যালয়সমূহ বন্ধ কৰি দিয়া হয় । সাধাৰণ নাগৰিকসকলক ঘৰৰ ভিতৰতে থাকিবলৈ আৰু স্থানীয় কৰ্তৃপক্ষৰ নিৰ্দেশনা পালন কৰি তেওঁলোকৰ সুৰক্ষা নিশ্চিত কৰিবলৈ পৰামৰ্শ দিয়া হৈছে । বংগ উপসাগৰৰ দক্ষিণ-পশ্চিম অংশত গঠিত গভীৰ নিম্ন চাপৰ অঞ্চলটো পশ্চিম-উত্তৰ-পশ্চিম দিশলৈ গতি কৰি শ্ৰীলংকা আৰু তামিলনাডুৰ উপকূলৰ ওচৰলৈ আহিছে । এই কাৰণেই তামিলনাডুত জাৰি কৰা হৈছে বৰষুণৰ সতৰ্কবাণী ।
