বাংলাদেশত হিন্দুৰ ওপৰত সংঘটিত হৈ থকা ঘটনাক লৈ উদ্বিগ্নতা প্ৰকাশ মুখ্যমন্ত্ৰী হিমন্ত বিশ্ব শৰ্মাৰ । এই সন্দৰ্ভত আজি মুখ্যমন্ত্ৰীগৰাকীয়ে প্ৰতিক্ৰিয়া প্ৰকাশ কৰি কয় যে, মুছলমান ৰাষ্ট্ৰত সংখ্যালঘু হিন্দুক কিদৰে নিৰ্মম ঘটনা সংঘটিত হৈছে সেয়া বিশ্ববাসীয়ে দেখা পাইছে । পূৰ্বে পাকিস্তানত এনেকুৱা ঘটনা সংঘটিত হৈছিল । বৰ্তমান বাংলাদেশত এই ঘটনাৰ সূচনা হৈছে ।
মুখ্যমন্ত্ৰী ড০ শৰ্মাই কয়, ‘ধৰ্মৰ নামত গোড়ামি কৰা দেশত সংখ্যালঘুৰ নিৰাপত্তা নিশ্চিত নহয় । ভাৰত এখন ধৰ্মনিৰপেক্ষ দেশ । পাকিস্তান, বাংলাদেশে ভাৰতৰ পৰা শিকাৰ প্ৰয়োজন আছে । দেশৰ ভিতৰত একাংশই পাকিস্তানে ক্ৰিকেটত জয়লাভ কৰিলে ফটকা ফুটায় । বাংলাদেশ, পাকিস্তানৰ নিচিনা দেশে সংখ্যালঘুক সুৰক্ষা দিব নোৱাৰে । এইসমূহ দেশক অন্ধ অনুকৰণ কৰা বন্ধ কৰিব লাগে । আমি আমাৰ সমাজ সুৰক্ষিত কৰিব লাগে । বাংলাদেশৰ সংখ্যালঘুৰ ওপৰত সংঘটিত ঘটনাক লৈ মুখ্যমন্ত্ৰী হিমন্ত বিশ্ব শৰ্মাই এই মন্তব্য প্ৰকাশ কৰিছে ।
