বৰ্তমান সময়ত ভাৰতত অব্যাহত আছে আই পি এল ২০২৫ৰ উত্তেজনা। ইফালে পাকিস্তানৰ দলটোৱে এইকেইদিন নিউজিলেণ্ড ভ্ৰমণত নামিছে।ইফালে পাকিস্তান ক্ৰিকেট দলৰ বিৰুদ্ধে ব্যৱস্থা গ্ৰহণ কৰিছে আইচিচিয়ে।
পাকিস্তান ক্ৰিকেট দলৰ বিৰুদ্ধে কঠোৰ ব্যৱস্থা গ্ৰহণ কৰিছে আইচিচিয়ে। লেহেমীয়া অভাৰ ৰেটৰ বাবে পুনৰবাৰ জৰিমনা বিহা হৈছে পাকিস্তানক।
বুধবাৰে হেমিল্টনত অনুষ্ঠিত নিউজিলেণ্ডৰ বিৰুদ্ধে অনুষ্ঠিত দ্বিতীয়খন এদিনীয়া খেলৰ সময়ত পাকিস্তান ক্ৰিকেট দলটোক লেহেমীয়া অভাৰ ৰেটৰ বাবে দোষী সাব্যস্ত কৰা হৈছে।
মেচ ৰেফাৰী জেফ ক্ৰ’ৱে পাকিস্তান ক্ৰিকেট দলটোক মেচ মাচুলৰ পাঁচ শতাংশ জৰিমনা বিহিছে। নিৰ্ধাৰিত সময়ত নিৰ্ধাৰিত অভাৰত বলিং কৰিবলৈ ব্যৰ্থ হৈছে পাকিস্তান ক্ৰিকেট দল।
নিৰ্ধাৰিত সময়ৰ পৰা এক অভাৰ পিছ পৰি আছিল পাকিস্তানী দলটো। বৃহস্পতিবাৰে আইচিচিয়ে জনোৱা মতে, পাকিস্তানৰ অধিনায়ক মহম্মদ ৰিজৱানে এই অপৰাধ স্বীকাৰ কৰি জৰিমনা মানি লৈছে, যাৰ ফলত আনুষ্ঠানিক শুনানিৰ প্ৰয়োজনীয়তা নাইকিয়া হৈছে।
এইখন একেৰাহে দ্বিতীয়খন মেচ, য’ত পাকিস্তান ক্ৰিকেট দলটোক লেহেমীয়া অভাৰ ৰেটৰ বাবে শাস্তি প্ৰদান কৰা হৈছে।নেপিয়াৰত অনুষ্ঠিত হোৱা প্ৰথমখন এদিনীয়া খেলৰ সময়ত দলটোৱে দুটা অভাৰ কমকৈ বলিং কৰিছিল।
ইয়াৰ পিছতে পাকিস্তান ক্ৰিকেট দলটোৱে মেচখনত ৭৩ ৰানত পৰাস্ত হোৱাৰ লগতে মেচ মাচুলৰ ১০ শতাংশ জৰিমনা বিহা হয়।
এই শৃংখলাত ০-১ ত পিছ পৰি থকা পাকিস্তান ক্ৰিকেট দলটোৱেও হেমিল্টনত ৮৪ ৰানত শোচনীয় পৰাজয়ৰ সন্মুখীন হ’বলগীয়া হয়।
