দেশত অনুষ্ঠিত হৈ যোৱা নিৰ্বাচনত ৰাইজে উৎসাহেৰে অংশগ্ৰহণ কৰিছে । নিৰ্বাচন আয়োগে লোকসভা নিৰ্বাচন আৰু চাৰিখন ৰাজ্যত অনুষ্ঠিত নিৰ্বাচন সম্পৰ্কীয় তথ্য প্ৰকাশ কৰিছে । এই তথ্য অনুসৰি লোকসভা নিৰ্বাচনত ৬৪.৬৪ কোটি ভোটাৰে নিজৰ ভোটাধিকাৰ সাব্যস্ত কৰিছিল । বিশেষ কথাটো হ’ল যে, এই নিৰ্বাচনত মহিলা ভোটাৰৰ সংখ্যা পুৰুষতকৈ বেছি আছিল । আয়োগে কয় যে ভাৰতৰ গণতন্ত্ৰ আন দেশৰ তুলনাত অভূতপূৰ্ব ।
বৃহস্পতিবাৰে নিৰ্বাচন আয়োগে লোকসভা নিৰ্বাচনৰ তথ্যৰ সৈতে জড়িত ৪২টা প্ৰতিবেদন আৰু চাৰিটা ৰাজ্যিক বিধানসভা নিৰ্বাচনৰ (অৰুণাচল প্ৰদেশ, অন্ধ্ৰপ্ৰদেশ, ওড়িশা আৰু ছিকিম) ১৪টাকৈ প্ৰতিবেদন প্ৰকাশ কৰে । আয়োগে কয় যে এই প্ৰতিবেদনসমূহে সমগ্ৰ বিশ্বৰ শিক্ষাবিদ, গৱেষক, নিৰ্বাচনী পৰ্যবেক্ষকৰ বাবে সহায়ক বুলি প্ৰমাণিত হ’ব । প্ৰতিবেদনত কোৱা হৈছে যে লোকসভা নিৰ্বাচনত ৬৪.৬৪ কোটি ভোটাৰে নিজৰ ভোটাধিকাৰ সাব্যস্ত কৰি বিশ্ব অভিলেখ গঢ়িছিল । ২০২৪ চনত ১২,৪৫৯ খন মনোনয়ন দাখিল হোৱাৰ বিপৰীতে ২০১৯ চনত এই সংখ্যা আছিল ১১,৬৯২ । আনহাতে ২০২৪ চনত ৮,৩৬০ জন প্ৰাৰ্থীয়ে নিৰ্বাচনত প্ৰতিদ্বন্দ্বিতা কৰিছিল । আনহাতে ২০১৯ চনত ৮,০৫৪ গৰাকী প্ৰাৰ্থীয়ে নিৰ্বাচনত প্ৰতিদ্বন্দ্বিতা কৰিছিল ।
আয়োগে কয় যে নিৰ্বাচনত মহিলা ভোটাৰৰ অংশগ্ৰহণ ক্ৰমাগতভাৱে বৃদ্ধি পাইছে । প্ৰতিবেদন অনুসৰি লোকসভা নিৰ্বাচনত পুৰুষতকৈ মহিলা ভোটাৰে অধিক অংশগ্ৰহণ কৰিছিল । এয়া অতি উৎসাহজনক ফলাফল । আয়োগে কয় যে লোকসভা নিৰ্বাচনত ৬৫.৭৮% মহিলা ভোটাৰে নিজৰ ভোটাধিকাৰ সাব্যস্ত কৰিছিল । আনহাতে ৬৫.৫৫% পুৰুষ ভোটাৰে ইয়াত অংশগ্ৰহণ কৰিছিল । ২০২৪ চনত নিৰ্বাচনত প্ৰতিদ্বন্দ্বিতা কৰা মহিলা প্ৰাৰ্থীৰ সংখ্যা আছিল ৮০০ গৰাকী । আনহাতে ২০১৯ চনত এই সংখ্যা আছিল ৭২৬ ।
আয়োগে কয় যে ২০১৯ চনৰ তুলনাত তৃতীয় লিংগৰ ভোটাৰৰ সংখ্যা ৪৬.৪% বৃদ্ধি পাইছে । ২০২৪ চনত ৯০,২৮,৬৯৬ জন দিব্যাংগ ভোটাৰ পঞ্জীয়ন হৈছিল । আনহাতে ২০১৯ চনত এই সংখ্যা আছিল ৬১,৬৭,৪৮২ । আয়োগে লগতে কয় যে ২০১৯ চনত ৫৪০টা ভোটকেন্দ্ৰত পুনৰ ভোটগ্ৰহণ অনুষ্ঠিত হৈছিল । আনহাতে ২০২৪ চনত মাত্ৰ ৪০টা ভোটকেন্দ্ৰতহে পুনৰ ভোটগ্ৰহণ হয় । যিটো মুঠ ১০.৫২ লাখ ভোটকেন্দ্ৰৰ ০.০০৩৮ শতাংশ ।
প্ৰতিবেদনত লোকসভাৰ আসন, বিধানসভাৰ আসন, ৰাজ্যভিত্তিক ভোটাৰৰ সংখ্যা, ভোট কেন্দ্ৰৰ সংখ্যা, ৰাজ্য আৰু লোকসভাৰ আসন অনুসৰি ভোটদান, দলভিত্তিক ভোটৰ ভাগ, লিংগভিত্তিক ভোটদান, ৰাজ্যভিত্তিক মহিলা ভোটাৰৰ অংশগ্ৰহণ, ৰাজ্যিক দলৰ প্ৰদৰ্শন, বিজয়ী প্ৰাৰ্থীৰ বিশ্লেষণ, সমষ্টিভিত্তিক বিশদ ফলাফল ইত্যাদি আৰু বহুত আছে ।
