থাইলেণ্ডৰ প্ৰধানমন্ত্ৰী পাটংটাৰ্ণ শ্বিনাৱাত্ৰাৰ আমন্ত্ৰণত প্ৰধানমন্ত্ৰী নৰেন্দ্ৰ মোদীয়ে দুদিনীয়া থাইলেণ্ড ভ্ৰমণৰ বাবে ৰাওনা হৈছে । প্ৰধানমন্ত্ৰী মোদীয়ে ২০২৫ চনৰ ৪ এপ্ৰিলত অনুষ্ঠিত হ’বলগীয়া ষষ্ঠ বিমষ্টেক (BIMSTEC) শীৰ্ষ সন্মিলনত অংশগ্ৰহণ কৰিব । এয়া হ’ব প্ৰধানমন্ত্ৰীৰ তৃতীয়টো থাইলেণ্ড ভ্ৰমণ । ইয়াৰ পিছতে শ্ৰীলংকালৈ ৰাওনা হ’ব প্ৰধানমন্ত্ৰী মোদী ।
প্ৰথমে থাইলেণ্ডত অনুষ্ঠিত হ’বলগীয়া বিমষ্টেক শীৰ্ষ সন্মিলনত অংশগ্ৰহণ কৰিব প্ৰধানমন্ত্ৰী মোদীয়ে য’ত ৭খন দেশৰ ৰাষ্ট্ৰৰ মুৰব্বীয়ে অংশগ্ৰহণ কৰিব । এই সন্মিলনত থাইলেণ্ড, বাংলাদেশ, শ্ৰীলংকা, নেপাল, ম্যানমাৰ আৰু ভূটানৰ নেতাসকলে অংশগ্ৰহণ কৰিব । ইয়াৰ পিছত ৪ এপ্ৰিলৰ পৰা ৬ এপ্ৰিললৈ শ্ৰীলংকা ভ্ৰমণলৈ যাব প্ৰধানমন্ত্ৰীগৰাকী । ভাৰতৰ আৰ্থিক সাহায্যত দেশখনত ৰূপায়িত হৈ থকা উন্নয়নমূলক প্ৰকল্পসমূহ উদ্বোধন কৰিব প্ৰধানমন্ত্ৰীয়ে ।
বিমষ্টেকৰ অধ্যক্ষতা কৰিছে থাইলেণ্ডে-
এই সন্মিলনৰ মূল উল্লেখযোগ্য দিশসমূহৰ ভিতৰত আছে ষষ্ঠ বিমষ্টেক শীৰ্ষ সন্মিলন ঘোষণাপত্ৰ গ্ৰহণ কৰা, যিয়ে নেতাসকলৰ দৃষ্টিভংগী আৰু দিশসমূহৰ ওপৰত আলোকপাত কৰিব । লগতে, ঐতিহাসিক বেংকক ভিজন ২০৩০ ভৱিষ্যতৰ সহযোগিতা বৃদ্ধিৰ বাবে প্ৰথম কৌশলগত ৰোডমেপ হ’ব । আঞ্চলিক সংযোগৰ দিশত এক উল্লেখযোগ্য পদক্ষেপ হিচাপে সকলো দেশৰ নেতাই সামুদ্ৰিক পৰিবহণ সহযোগিতা চুক্তিতো স্বাক্ষৰ কৰিব, যাৰ লক্ষ্য হৈছে বংগোপসাগৰত বাণিজ্য আৰু ভ্ৰমণ সম্প্ৰসাৰণ কৰা ।
বিমষ্টেক সন্দৰ্ভত এক বিবৃতি জাৰি কৰি বৈদেশিক পৰিক্ৰমা মন্ত্ৰালয়ে কয়, “বিমষ্টেকৰ কাঠামোৰ ভিতৰত সহযোগিতা বৃদ্ধিৰ বাবে বিভিন্ন প্ৰতিষ্ঠান আৰু সামৰ্থ্য বিকাশৰ ব্যৱস্থাৰ বিষয়েও নেতাসকলে আলোচনা কৰাৰ আশা কৰা হৈছে । নিৰাপত্তা বৃদ্ধি, বাণিজ্য আৰু বিনিয়োগৰ সুবিধা প্ৰদান, ভৌতিক, সামুদ্ৰিক আৰু ডিজিটেল সংযোগ স্থাপন, জলবায়ু, শক্তি, মানুহৰ মাজত সম্পৰ্ক বৃদ্ধি কৰা আৰু মানৱ নিৰাপত্তাৰ ক্ষেত্ৰত সহযোগিতা আগবঢ়োৱাকে ধৰি আঞ্চলিক সহযোগিতা আৰু অংশীদাৰিত্ব শক্তিশালী কৰাৰ বাবে ভাৰতে বিমষ্টেকত কেইবাটাও পদক্ষেপ গ্ৰহণ কৰিছে ।”
ভাৰত আটাইতকৈ প্ৰভাৱশালী সদস্য-
বিশেষজ্ঞসকলে বিশ্বাস কৰে যে এই বিমষ্টেক শীৰ্ষ সন্মিলনে ইয়াৰ কৌশলগত দিশ গঢ় দিয়াত সহায়ক বুলি প্ৰমাণিত হ’ব । ইয়াৰ উপৰিও বংগোপসাগৰ অঞ্চলত অৰ্থনৈতিক বিকাশ, নিৰাপত্তা সহযোগিতা আৰু বহনক্ষম উন্নয়নৰ বাবে ই এক গুৰুত্বপূৰ্ণ শক্তি হৈ থাকিব । নিৰাপত্তা, শক্তি আৰু দুৰ্যোগ ব্যৱস্থাপনাৰ ক্ষেত্ৰত আঞ্চলিক সহযোগিতাৰ নেতৃত্ব দিয়া বিমষ্টেকৰ চাৰি প্ৰতিষ্ঠাপক সদস্যৰ ভিতৰত ভাৰত অন্যতম ।
২০১৮ চনত নেপালৰ কাঠমাণ্ডুত অনুষ্ঠিত হোৱা চতুৰ্থ বিমষ্টেক শীৰ্ষ সন্মিলনৰ পিছত এইখন হ’ব বিমষ্টেকৰ নেতাসকলৰ প্ৰথমখন অফলাইন বৈঠক । এইবাৰ ষষ্ঠ বিমষ্টেক শীৰ্ষ সন্মিলনৰ বিষয়বস্তু “বিমষ্টেক – সমৃদ্ধিশালী, স্থিতিস্থাপক আৰু মুকলি” হিচাপে ৰখা হৈছে ।
