বিনাচৰ্ত যুদ্ধবিৰতিৰ সহমতত উপনীত হৈছে থাইলেণ্ড-কম্বোডিয়া

বিশ্বৰ বিভিন্ন প্ৰান্তত সীমান্ত সংঘাত চলি আছে । ক’ৰবাত যুদ্ধৰ ৰূপ লৈছে আৰু ক’ৰবাত অনিৰ্দিষ্টকালীন আলোচনাৰ পৰ্যায় চলি আছে । ইয়াৰ মাদতে দক্ষিণ এছিয়াত থাইলেণ্ড আৰু কম্বোডিয়াৰ মাজত সীমান্ত সংঘাত আৰম্ভ হয় আৰু পঞ্চম দিনা যুদ্ধবিৰতিৰে সমাপ্ত হয় । এই উত্তেজনাৰ চতুৰ্থ দিনলৈকে কমেও ৩৪ জন লোকৰ মৃত্যু হৈছে আৰু ২ লাখৰো অধিক লোকক পলায়ন কৰিবলগীয়া হৈছে । কিন্তু সকাহৰ খবৰটো হ’ল দুয়োখন দেশে বিনাচৰ্তে যুদ্ধবিৰতিৰ বাবে সন্মতি প্ৰকাশ কৰিছে ।

সোমবাৰে মালয়েছিয়াত শান্তি বৈঠকৰ বাবে থাইলেণ্ড আৰু কম্বোডিয়াৰ নেতা বৈঠকত মিলিত হয় । মালয়েছিয়াৰ প্ৰধানমন্ত্ৰী আনোৱাৰ ইব্ৰাহিমৰ মধ্যস্থতাত কুৱালালামপুৰত এই আলোচনা অনুষ্ঠিত হয় । বৰ্তমান মালয়েছিয়া দক্ষিণ এছিয়াৰ সংগঠন আছিয়ানৰ অধ্যক্ষ, যাৰ দুয়োখন দেশ সদস্য । ছ’চিয়েল মিডিয়াত বহু সাংবাদিকে নিশ্চিত কৰিছে যে দুয়োখন দেশে যুদ্ধবিৰতিৰ বাবে সন্মতি প্ৰকাশ কৰিছে ।

বৃহস্পতিবাৰে লেণ্ডমাইন বিস্ফোৰণত ৫ গৰাকী থাইলেণ্ডৰ জোৱান আহত হোৱাৰ পিছতে এই সংঘাত আৰম্ভ হয় । ইয়াৰ পিছত দুয়োপক্ষই টেংক, জেট আৰু কামানেৰে আক্ৰমণ আৰম্ভ কৰে । থাইলেণ্ডে কম্বোডিয়াক চিকিৎসালয় আক্ৰমণ কৰাৰ অভিযোগ উত্থাপন কৰাৰ বিপৰীতে কম্বোডিয়াই দাবী কৰিছে যে থাইলেণ্ডৰ সেনাই ক্লাষ্টাৰ বোমা ব্যৱহাৰ কৰিছিল । থাইলেণ্ডৰ তথ্য অনুসৰি ৮ জন জোৱান আৰু ১৩ জন সাধাৰণ নাগৰিকৰ মৃত্যু হোৱাৰ বিপৰীতে কম্বোডিয়াই ৫ জন জোৱান আৰু ৮ জন সাধাৰণ নাগৰিকৰ মৃত্যু হোৱা বুলি নিশ্চিত কৰিছে । থাইলেণ্ডৰ ১,৩৮০০০ আৰু কম্বোডিয়াৰ ৮০ হাজাৰৰো অধিক লোকক নিৰাপদ স্থানলৈ স্থানান্তৰ কৰা হয় । দেওবাৰে আকৌ এবাৰ দুটা প্ৰাচীন মন্দিৰৰ সমীপত কামানৰ শব্দ শুনা যায় । অৱশেষত দুয়োখন দেশে শান্তি আলোচনাত সন্মতি দিয়ে আৰু ইয়াৰ ফলত যুদ্ধবিৰতি হয় ।

লগতে পঢ়ক : যুদ্ধ বন্ধ কৰক অন্যথা… কম্বোডিয়া আৰু থাইলেণ্ডক সকীয়নি ট্ৰাম্পৰ

কম্বোডিয়াৰ তাৎক্ষণিক যুদ্ধবিৰতিৰ দাবী

থাইলেণ্ড আৰু কম্বোডিয়াৰ মাজত সীমা বিবাদে বিপদজনক ৰূপ ধাৰণ কৰিছে আৰু ২৭ জন লোকৰ মৃত্যু হৈছে।

এতিয়ালৈকে কম্বোডিয়াতবিমান, আৰ্টিলাৰী আৰু স্থল সৈন্যৰ সৈতে চলি থকা হিংসাত্মক সংঘৰ্ষত ১৫ জন লোকৰ মৃত্যু হৈছে আৰু বৃহৎ সংখ্যক লোকে প্ৰব্ৰজন কৰিবলগীয়া হৈছে।

ইফালে, থাইলেণ্ডৰ স্বাস্থ্যমন্ত্ৰীয়ে জনোৱা মতে, এই সংঘাতত এতিয়ালৈকে ১২ জন থাইলেণ্ডৰ নাগৰিকৰো মৃত্যু হৈছে।

এই তীব্ৰ সংঘাতৰ মাজতে কম্বোডিয়াই শুকুৰবাৰে ৰাষ্ট্ৰসংঘৰ নিৰাপত্তা পৰিষদৰ বৈঠকৰ পিছত তাৎক্ষণিকভাৱে বিনাচৰ্ত যুদ্ধবিৰতিৰ বাবে আবেদন জনায়।

ৰাষ্ট্ৰসংঘত কম্বোডিয়াৰ ৰাষ্ট্ৰদূত চিয়া কেওৱে সংবাদ মাধ্যমৰ সৈতে হোৱা কথা-বতৰাত কয় যে, “কম্বোডিয়াই তাৎক্ষণিকভাৱে বিনা চৰ্তত এই বিৰতিৰ আহ্বান জনাইছে, আৰু আমি বিবাদৰ শান্তিপূৰ্ণ সমাধানৰ বাবেও আহ্বান জনাইছো।”

চেয়া কিয়’ৱে থাইলেণ্ডৰ এই দাবীকো নাকচ কৰে য’ত কোৱা হৈছিল যে এই সংঘাতৰ আগ্ৰাসী আছিল কম্বোডিয়া। তেখেতে প্ৰশ্ন কৰে, “কম্বোডিয়াৰ দৰে সৰু চুবুৰীয়াই থাইলেণ্ডৰ দৰে সামৰিক শক্তিক কেনেকৈ আক্ৰমণ কৰিব পাৰে?”

তেওঁ আৰু কয় যে নিৰাপত্তা পৰিষদে দুয়োপক্ষকে ‘সৰ্বোচ্চ সংযম দেখুৱাবলৈ আৰু কূটনৈতিক সমাধানৰ আশ্ৰয় লোৱা’ৰ আহ্বান জনাইছে, “আমিও একে দাবী কৰিছো।”

একে সময়তে থাইলেণ্ডে এই বিবাদ সমাধানৰ বাবে তৃতীয় পক্ষৰ কোনো মধ্যস্থতা সম্পূৰ্ণৰূপে নাকচ কৰিছে আৰু ইয়াৰ পৰিৱৰ্তে দ্বিপাক্ষিক আলোচনাত গুৰুত্ব দিছে।

লগতে পঢ়ক: থাইলেণ্ড আৰু কম্বোডিয়াৰ মাজত তীব্ৰ হৈছে যুদ্ধ; থাইলেণ্ডৰ F-16 যুদ্ধ বিমান ধ্বংস

থাইলেণ্ডৰ F-16 যুদ্ধ বিমান ধ্বংস

থাইলেণ্ড আৰু কম্বোডিয়াৰ সীমান্তত তীব্ৰ যুদ্ধ অব্যাহত আছে।এই পৰ্যন্ত দুয়োপক্ষৰ মাজত চলি থকা সংঘাতত ৯ জন লোকৰ মৃত্যু হোৱাৰ খবৰ পোৱা গৈছে।

ইফালে কম্বোডিয়াৰ ৰকেট আক্ৰমণৰ প্ৰতি সঁহাৰি জনাই থাইলেণ্ডে F-16  যুঁজাৰু বিমানেৰে ফ্নম পেনত আক্ৰমণ কৰিছে।

থাইলেণ্ডে বৃহস্পতিবাৰে কম্বোডিয়াক ছখন F-16 যুঁজাৰু বিমানেৰে আক্ৰমণ কৰে।এই সময়ছোৱাত কম্বোডিয়াই থাইলেণ্ডৰ এখন যুদ্ধ বিমান ধ্বংস কৰিছে।

কম্বোডিয়াৰ টা মুয়েন থম মন্দিৰ, টা ক্ৰাবেই মন্দিৰ, মম বেই অঞ্চল আৰু প্ৰেহ ভিহেয়াৰ মন্দিৰৰ আশে-পাশে আক্ৰমণ সংঘটিত হৈছে।ৰাতিপুৱাৰ পৰা দুয়োখন দেশৰ মাজত যুদ্ধ আৰম্ভ হৈছে।

এই স্থানসমূহ সংঘাতৰ মূল বিন্দু হিচাপে চিনাক্ত কৰা হৈছে। কম্বোডিয়াৰ নেতৃত্বই কয় থাই সেনাই আক্ৰমণ আৰম্ভ কৰিছিল, যিটো তেওঁলোকে ঘোষণা কৰা “চাকপং ফুলনাট সামৰিক কৌশল”ৰ অধীনত আৰম্ভ কৰা প্ৰথমটো বৃহৎ আক্ৰমণ।

প্ৰধানমন্ত্ৰী হুন মানেটে কয় যে থাইলেণ্ডৰ বাহিনীয়ে অ’ডাৰ মেয়ানচেই প্ৰদেশত কম্বোডিয়াৰ সেনাৰ চকীত আক্ৰমণ চলাইছিল আৰু তাৰ পিছত আক্ৰমণটো মম বেই অঞ্চললৈকে সম্প্ৰসাৰিত কৰিলে।

“কম্বোডিয়াই সদায় শান্তিৰ জৰিয়তে সমস্যা সমাধানৰ পক্ষত আছে, কিন্তু এইবাৰ আমাৰ হাতত বলপূৰ্বক সঁহাৰি দিয়াৰ বাহিৰে আন কোনো বিকল্প নাছিল।

প্ৰধানমন্ত্ৰীয়ে আৰু কয় যে কম্বোডিয়া চৰকাৰ, সেনা আৰু প্ৰশাসনে সম্পূৰ্ণ শক্তিৰে ৰাষ্ট্ৰীয় সাৰ্বভৌমত্ব আৰু ভূখণ্ডৰ অখণ্ডতা ৰক্ষাৰ কামত নিয়োজিত।

ইয়াৰ উপৰিও থাইলেণ্ডৰ আক্ৰমণত ক্ষতিগ্ৰস্ত সাধাৰণ নাগৰিকক সহায় আগবঢ়োৱা হৈছে।

থাইলেণ্ডৰ আক্ৰমণৰ পিছত কম্বোডিয়াৰ প্ৰধানমন্ত্ৰী হুন চেনে নাগৰিকসকলক আতংকিত হোৱা, মজুত ৰখা বা মূল্য বৃদ্ধিৰ পৰা আঁতৰি থাকিবলৈ আহ্বান জনায়।

লগতে পঢ়ক: ৫০ জন যাত্ৰী কঢ়িয়াই নিয়া বিমান নিৰুদ্দেশ, চীন সীমান্তৰ সমীপত হৈছিল যোগাযোগ বিচ্ছিন্ন