যদি আপুনি পুষ্পা-২ আৰু আল্লু অৰ্জুনক পৰ্দাত চাবলৈ অপেক্ষা কৰি আছে, তেন্তে এই আপডেট আপোনাৰ বাবে । আচলতে ছবিখনৰ মুক্তিৰ তাৰিখ আকৌ এবাৰ সলনি কৰা হৈছে । আপুনি চিন্তা কৰাৰ প্ৰয়োজন নাই কাৰণ ছবিখনৰ মুক্তিৰ তাৰিখ পিছুৱাই দিয়া হোৱা নাই, আগুৱাই দিয়া হৈছে । ইয়াৰ পূৰ্বে এই ছবিখন ৬ ডিচেম্বৰত মুক্তি পোৱাৰ কথা আছিল । মুক্তিৰ তাৰিখ সলনি হোৱাৰ কথা শুনি বহুতে মানসিক চাপ অনুভৱ কৰিছিল যদিও ভাল কথাটো হ’ল ছবিখনৰ মুক্তিৰ তাৰিখ ৬ ডিচেম্বৰৰ পৰা ৫ ডিচেম্বৰলৈ সলনি কৰা হৈছে ।
তাৰিখৰ ওপৰত তাৰিখ-
পুষ্পা-২ ৰ ট্ৰেক ৰেকৰ্ড চালে এই ছবিখনৰ মুক্তিৰ তাৰিখ কেইবাবাৰো সলনি হৈছে । পূৰ্বে এই ছবিখন জুন মাহত মুক্তি পাবলগীয়া আছিল যদিও তাৰ পিছত আগষ্ট মাহৰ তাৰিখ ঘোষণা কৰা হৈছিল আৰু তাৰ পিছত ক্ৰমান্বয়ে ডিচেম্বৰ মাহলৈকে পিছুৱাই আহিছিল । এতিয়া এই ছবিখন মুক্তিৰ তাৰিখ পিছুৱাই দিয়াৰ পৰিৱৰ্তে এদিন আগুৱাই দিয়াটো ভাল অনুৰাগীসকলৰ বাবে ভাল খবৰ ।
সুকুমাৰৰ পৰিচালনাত নিৰ্মিত পুষ্পা-২, ২০২১ চনত মুক্তি পোৱা পুষ্পাৰ ছিকুৱেল । অনুৰাগীসকলে এই ছিকুৱেলৰ বাবে তিনি বছৰ অপেক্ষা কৰিছে আৰু তৃতীয় বছৰতো ইমানেই অপেক্ষা কৰিবলৈ বাধ্য হৈছে যে তেওঁলোকৰ এতিয়া ছানী দেউলৰ এটা বিখ্যাত সংলাপ মনত পৰি গৈছে, যে-“তাৰিখ পে তাৰিখ, তাৰিখ পে তাৰিখ মিল ৰহী হে লেকিন ইনছাফ নেহি মিলা মাই লৰ্ড, মিলি হ্যে তৌ চিৰ্ফ ইয়ে তাৰিখ ।“
অৱশ্যে এতিয়া চলিত বৰ্ষৰ ৫ ডিচেম্বৰত ছবিখনে মুক্তি পোৱাৰ সম্ভাৱনা আছে । ইফালে আল্লু অৰ্জুনে এইবাৰ এই ছবিখনৰ যোগেদি অধিক বিস্ফোৰক ষ্টাইলত পৰ্দালৈ আহিব । ইতিমধ্যে তেওঁৰ লুক ছ’চিয়েল মিডিয়াত ভাইৰেল হৈ পৰাত অনুৰাগীসকলে ছবিখনৰ বাবে আগ্ৰহেৰে অপেক্ষা কৰি আছে ।
