এন চি পি নেতা বাবা চিদ্দিকীৰ হত্যাৰ পিছত চাঞ্চল্যৰ সৃষ্টি হৈছে । ১২ অক্টোবৰত তেওঁক গুলীয়াই হত্যা কৰা হৈছিল । লৰেন্স বিষ্ণোই গেঙে তেওঁৰ হত্যাৰ দায়িত্ব লৈছে । এই হত্যাকাণ্ডত সকলো হতবাক আৰু দুখিত । বাবা ছিদ্দিকীৰ মৃত্যুত বলীউডতো শোকৰ ছাঁ পৰিছে । ছলমান খানে তেওঁৰ ঘনিষ্ঠ বন্ধুক হেৰুওৱাৰ পিছত ভাগি পৰিছে । বাবা চিদ্দিকীৰ ওপৰত হোৱা আক্ৰমণৰ পিছত, নৱী মুম্বাই আৰক্ষীকো ছলমানৰ নিৰাপত্তা সম্পৰ্কে সতৰ্ক কৰি দিয়া হৈছে ।
ছলমানৰ ফাৰ্মহাউচত নিৰাপত্তা বৃদ্ধি-
নৱী মুম্বাইৰ পানভেলত আছে ছলমান খানৰ ফাৰ্মহাউচ । এই ফাৰ্মহাউচলৈ যাবলৈ মাত্ৰ এটা পথ আছে যি এখন গাঁৱৰ মাজেৰে পাৰ হৈ যায় । কোনো সন্দেহজনক ব্যক্তি দেখা গৈছে নেকি আৰক্ষীক জনাবলৈ কোৱা হৈছে । দ্বিতীয়টো ডাঙৰ কথা হ’ল যে সংস্থাবোৰক যিকোনো ধৰণৰ ইনপুটৰ ওপৰত নজৰ ৰাখিবলৈ সতৰ্ক কৰি দিয়া হৈছে । যাতে সময়মতে পদক্ষেপ ল’ব পাৰি ।
নৱী মুম্বাই আৰক্ষীয়ে জনোৱা মতে তেওঁলোকে পানভেল ফাৰ্মহাউচত টহল বৃদ্ধি কৰাৰ লগতে অতিৰিক্ত সুৰক্ষা কৰ্মী নিয়োগ কৰিছে যাক ফাৰ্মহাউচৰ ভিতৰত আৰু বাহিৰত নিয়োজিত কৰা হ’ব । বহু ঠাইত অৱৰোধো আৰোপ কৰা হৈছে যাতে বাহনবোৰ পৰীক্ষা কৰিব পৰা যায় । যি কি নহওক, বিষ্ণোই গেঙে বহুবাৰ দাবাং খানৰ ফাৰ্মহাউচত প্ৰৱেশৰ চেষ্টা কৰিছে । জানুৱাৰী ২০২৪-ত, দুজন লোকে ছলমানৰ পানভেল ফাৰ্মহাউচত বলপূৰ্বক প্ৰৱেশ কৰিবলৈ চেষ্টা কৰিছিল । কিন্তু ফাৰ্মহাউচত এই আক্ৰমণ সফল হোৱা নাছিল । অৱশ্যে ছলমানৰ ঘৰ গেলেক্সী এপাৰ্টমেণ্টত গুলীচালনা কৰা হৈছিল ।
কাৰাগাৰত থাকিয়েই ছলমানক ভাবুকি গেংষ্টাৰৰ-
লৰেন্স বিষ্ণোই বৰ্তমান গুজৰাটৰ সবৰমতী কাৰাগাৰত বন্দী হৈ আছে । তথাপিও এই গেংষ্টাৰটোৱে ছলমানৰ পৰিয়ালক নিৰন্তৰ ভাবুকি দিবলৈ সক্ষম হৈছে । বিষ্ণোই গেঙে ছলমানৰ ঘৰৰ বাহিৰত গুলীচালনা কৰিছিল । পাঞ্জাৱী গায়ক সিদ্ধু মুছেৱালাক হত্যা কৰোৱাইছিল বিষ্ণোইয়ে, এতিয়া বাবা চিদ্দিকীক হত্যা কৰে এই গেংষ্টাৰৰ দলে । লৰেন্সৰ এই ভাবুকি দেখি ছলমান খানৰ অনুৰাগীসকল তেওঁক লৈ চিন্তিত হৈ পৰিছে । পূৰ্বে, ছলমানৰ পিতৃ চেলিম খানে পাৰ্কত জগিং কৰাৰ সময়ত বিষ্ণোই দলৰ পৰা ভাবুকি লাভ কৰিছিল ।
